រាជធានីភ្នំពេញ ៖ សហគមន៍មូលនិធិនគរកាយវត្តព្រះពុទ្ធសាសនាកម្ពុជា កាលពីព្រឹកថ្ងៃទី២៥ វិច្ឆិកា បានរៀបចំពិធីប្រគល់អំណោយដល់អាជ្ញាធរសង្កាត់ទួលសង្កែ ដើម្បីយកទៅចែកជូនដល់គ្រួសាររងគ្រោះផ្សេងៗនិងគ្រួសារក្រីក្រចាស់ជរាក្នុងមូលដ្ឋាន។ ពិធីនេះរៀបចំនៅក្នុងវត្តញាណរង្សី ដោយមានការនិមន្តចូលរួមប្រគល់អំណោយពីព្រះតេជគុណសុវណ្ណជោតិ ខឹម សម្បត្តិ ជាប្រធានសហគមន៍និងជាចៅអធិការវត្តញាណរង្សី និងទទួលអំណោយដោយលោកអ៊ុក ខេមា ចៅសង្កាត់រងទួលសង្កែនិងជាតំណាងលោកសយ កុសល ចៅសង្កាត់ទួលសង្កែ ខណ្ឌឫស្សីកែវ ព្រមទាំងមានការចូលរួមពីព្រះសង្ឃ ពុទ្ធបរិស័ទប្រជាពលរដ្ឋយ៉ាងច្រើនកុះករ។
អំណោយដែលផ្តល់ដល់សាលាសង្កាត់ក្នុងឱការនោះមាន អង្ករ១តោន មី១០កេស ទឹកដោះគោ២០កំប៉ុង ស្ករស៣០គីឡូក្រាម និងថវិកាចំនួន៤លានរៀល ។ ព្រះតេជគុណសុវណ្ណជោតិ ខឹម សម្បត្តិ មានថេរដីកាឱ្យដឹងថា អំណោយទាំងនោះបានមកពីព្រះសង្ឃ គណៈកម្មការវត្ត និងពុទ្ធបរិស័ទដែលមានសទ្ធាជ្រះថ្លាក្នុងវិស័យព្រះពុទ្ធសាសនា ដើម្បីជួយដល់ជនរងគ្រោះផ្សេងៗនិងប្រជាពលរដ្ឋក្រីក្រចាស់ជរាគ្មានទីពឹង ។ ព្រះតេជគុណសុវណ្ណជោតិ ខឹម សម្បតិ្ត មានថេរដីកាទៀតថា រាជរដ្ឋាភិបាលក្រោមការដឹកនាំរបស់សម្តេចអគ្គមហាសេនាបតីតេជោហ៊ុន សែន បានធ្វើឱ្យប្រទេសជាតិមានសន្តិភាពនិងការអភិវឌ្ឍ ហើយព្រះពុទ្ធសាសនាបានរស់រានមានជីវិតឡើងធ្វើឱ្យពុទ្ធបរិស័ទមានឱកាសបានធ្វើបុណ្យទានទៅតាមជំនឿសាសនា ។
លោកអ៊ុក ខេមា ចៅសង្កាត់រងនិងជាតំណាងលោកសយ កុសល ចៅសង្កាត់ទួលសង្កែបានថ្លែងអំណរគុណដល់់ព្រះតេជគុណសុវណ្ណជោតិ ខឹម សម្បត្តិ ដែលតែងនាំអំណោយមកចែកជូនដល់ជនរងគ្រោះ ប្រជាពលរដ្ឋក្រីក្រចាស់ជរា អ្នកផ្ទុកមេរោគអេដស៍នៅក្នុងមូលដ្ឋានសង្កាត់ទួលសង្កែក៏ដូចជាក្នុងខណ្ឌឫស្សីកែវទាំងមូល ។លោកអ៊ុក ខេមា បានសន្យាថា នឹងនាំយកអំណាយទាំងនេះទៅចែកជូនដល់ដៃប្រជាពលរដ្ឋក្រីក្រនៅក្នុងមូលដ្ឋាន ដើម្បីជួយសម្រាលការលំបាកពួកគាត់នៅក្នុងជីវភាពរស់នៅ ៕
ចែករំលែកព័តមាននេះ