ទីភ្នាក់ងារព័ត៌មាន AP រាយការណ៍ថា ប្រធានក្រុមហ៊ុន TEPCO ដែលគ្រប់គ្រងមជ្ឈមណ្ឌលនុយក្លេអ៊ែរហ្វូគូស៊ីម៉ារបស់ជប៉ុនដែលរងប៉ះពាល់ធ្ងន់ធ្ងរដោយសារការរញ្ជួយដីដ៏ខ្លាំងកម្រិត៩រីស្ទ័រកាលពីថ្ងៃទី១១ មីនា កន្លងមក បានចូលមន្ទីរពេទ្យមួយក្នុងទីក្រុងតូក្យូដោយលោកកើតជំងឺលើសឈាម ។ លោក Masataka Shimizu ជាប្រធានក្រុមហ៊ុន TEPCO មានលេចឮព័ត៌មានថា លោកចូលសម្រាកព្យាបាលនៅមន្ទីរពេទ្យក្រោយពីលោកបាត់មុខរយៈពេលជិង២សប្តាហ៍ បន្ទាប់ពីបង្ហាញមុខជាសាធារណៈក្នុងឱកាសនៃសន្និសីទកាសែតមួយរៀបចំឡើងក្នុងទីក្រុងតូក្យូ រយៈពេល២ថ្ងៃក្រោយកើតមានបាតុភូតរញ្ជួយដីដ៏ខ្លាំងបង្កឱ្យកើតមានរលកយក្សស៊ូណាមីមក ។
ទីភ្នាក់ងារព័ត៌មាន AP ឱ្យដឹងទៀតថា លោក Masataka អាយុ៦៦ឆ្នាំ ត្រូវបានដឹកទៅកាន់មន្ទីរពេទ្យកាលពីថ្ងៃទី២៩ មីនា កន្លងមក ក្រោយពីលោកមានអារម្មណ៍ចេះតែវិលមុខ ដោយសារសម្ពាធឈាមឡើងខ្ពស់ ។ មុននេះ គេមានការព្រួយបារម្ភយ៉ាងខ្លាំងអំពី បញ្ហាសុខភាពរបស់លោក Masataka ក្រោយពីមជ្ឈមណ្ឌលហ្វូគូស៊ីម៉ា រងប៉ះពាល់ធ្ងន់ធ្ងរដោយសារការរញ្ជួយដីដ៏មានឥទ្ធិពលបណ្តាលឱ្យមនុស្ស និងស្លាប់បាត់ខ្លួនជាង២ម៉ឺននាក់ ៕
ចែករំលែកព័តមាននេះ