រាជធានីភ្នំពេញ ៖ លោកម៉ិញ សុផាត អ្នកបង្ហោះខ្លែងអាជីពម្នាក់បានទូរស័ព្ទមកការិយាល័យនិពន្ធកោះសន្តិភាព សូមឱ្យជួយផ្សាយសំណូមពររបស់គាត់ទៅក្រសួងវប្បធម៌ និងវិចិត្រសិល្បៈ ជួយធ្វើការបកស្រាយជូនប្រជាពលរដ្ឋទូទាំងប្រទេសបានដឹងពីអានុភាពខ្លែងឯកដែលជាសម្បត្តិបេតិកភណ្ឌវប្បធម៌ជាតិ ។ អ្វីដែលជាចម្ងល់នោះ ព្រោះតែមានការនិយាយតៗគ្នាថា ពេលដែលខ្លែងឯកនោះធ្លាក់លើដំបូលផ្ទះណាមួយគឺធ្វើឱ្យផ្ទះនោះមានភាពចង្រៃកើតឡើង ហើយទាល់តែម្ចាស់ផ្ទះនោះនិមន្តព្រះសង្ឃចំនួន៧វត្តសូត្ររំដោះគ្រោះចង្រៃចេញទើបបានសុខនិងរស់នៅក្នុងផ្ទះនោះបានតទៅទៀត បើមិនដូច្នេះទេប្រាកដជាមានរឿងអាក្រក់កើតឡើងជាមិនខាន ។
ត្រង់ចំណុចនេះ ក្នុងនាមលោកជាអ្នកបង្ហោះខ្លែងធ្លាប់ទទួលបានជោគជ័យនៅក្នុងមហោស្រពបង្ហោះខ្លែងនៅរាជធានីភ្នំពេញបានចំណាត់ថ្នាក់លេខ១ លេខ២ និងលេខ៣ ក្នុងពេលកន្លងមកលោកមានចម្ងល់ថា តើខ្លែងឯកនេះចង្រៃមែន ឬគ្រាន់តែជាពាក្យចចាមអារ៉ាមប៉ុណ្ណោះទេ? ហើយសំណូមពរនេះ គឺចង់ឱ្យប្រជាពលរដ្ឋនៅទូទាំងប្រទេសបានដឹងនិងយល់ពីបញ្ហានេះផងដែរ ។
លោកមិុញ សុផាត បាននិយាយថា បច្ចុប្បន្នលោកមានអាយុ៧០ឆ្នាំហើយ លោកគឺជាមន្ត្រីក្រសួងសង្គមកិច្ចចូលនិវត្តន៍ រស់នៅក្នុងភូមិចាក់ជ្រូក សង្កាត់សំរោងក្រោម ខណ្ឌដង្កោ រាជធានីភ្នំពេញ ។ ក្រោយពេលចូលនិវត្តន៍ លោកបានចាប់អាជីពជាអ្នកបង្ហោះខ្លែងដោយចូលប្រកួតក្នុងមហោស្រពខ្លែងនៅរាជធានីភ្នំពេញនាឆ្នាំ២០០៧ លោកបង្ហោះខ្លែងរូបក្រពើ ទទួលបានចំណាត់ថ្នាក់លេខពីរទូទាំងប្រទេស ។ នៅឆ្នាំ២០០៨ លោកបង្ហោះខ្លែងរចនាជារូបនាគនិងដើមត្នោត ទទួលបានចំណាត់ថ្នាក់លេខ១។ ឆ្នាំ២០០៩ បង្ហោះខ្លែងរូបព្រះវិហារ ទទួលបានចំណាត់ថ្នាក់លេខ៣ និងនៅក្នុងឆ្នាំ២០១០ បង្ហោះខ្លែងឯកទទួលបានចំណាត់ថ្នាក់លេខពីរ ។ ខ្លែងដែលយកទៅចូលរូមប្រកួតនោះគឺលោកផលិតនិងរចនាមូ៉ដដោយខ្លួនឯង ក្រៅពីនេះលោកចេះធ្វើខ្លែងបានជាង៣០ប្រភេទឯណោះ ហើយខ្លែងរបស់លោកត្រូវបានគេយកទៅបង្ហោះនៅឯប្រទេសមួយចំនួនដូចជា ចិន បារាំង និងឥណ្ឌូណេស៊ីជាដើម ។
លោកមិុញ សុផាត បានបន្តថា អ្វីដែលលោកសំណូមពរសុំឱ្យក្រសួងវប្បធម៌ និងវិចិត្រសិល្បៈជួយបកស្រាយនោះ ក៏ព្រោះតែប្រជាពលរដ្ឋកំពុងជឿយ៉ាងងប់ងុលបំផុតនូវការនិយាយតៗគ្នាពីភាពចង្រៃរបស់ខ្លែងឯកពេលដែលវាធ្លាក់ទៅលើដំបូលផ្ទះ ហើយបើមិនចង់ឱ្យចង្រៃទាល់តែនិមន្តព្រះសង្ឃ៧វត្តមកសូត្រមន្តរំដោះគ្រោះទើបបានសុខ។ពាក្យបែបនេះលោកក៏ធ្លាប់ឮដែរ ប៉ុន្តែលោកមិនបានដឹងថា វាចង្រៃពិតឬយ៉ាងណាឡើយ ឯប្រជាពលរដ្ឋពិតជាជឿជាក់ ហើយអ្វីដែលធ្វើឱ្យលោករឹតតែមិនអាចសម្ងំស្ងៀមតទៅទៀតបាននោះ គឺរូបលោកផ្ទាល់ក៏បានជួបនឹងរឿងបង្ហោះខ្លែងទៅត្រូវជនមិនស្គាល់មុខលួចកាត់ខ្សែធ្វើឱ្យធ្លាក់លើដំបូលផ្ទះអ្នកជិតខាង ត្រូវម្ចាស់ផ្ទះប្រកាន់ពាក្យចចាមអារ៉ាមនោះទាមទារឱ្យលោកនិមន្តព្រះសង្ឃសូត្រមន្តឱ្យទៀតផង។
លោកមិុញ សុផាត បានបន្តទៀតថា រឿងរ៉ាវខាងលើនោះលោកបានដោះស្រាយជាមួយម្ចាស់ផ្ទះចប់សព្វគ្រប់អស់ហើយ ប៉ុន្តែលោកក៏ចង់បញ្ជាក់ប្រាប់ពីដំណើររឿងខ្លះៗដែរថា កាលពីវេលាម៉ាង៨និង៣០នាទីយប់ថ្ងៃទី២៣ វិច្ឆិកា ឆ្នាំ២០១១ លោកបានបង្ហោះសាកល្បងខ្លែងឯករបស់លោកនៅចំណុចដីឡូត៍ទំនេរមួយកន្លែងស្ថិតនៅចម្ងាយប្រមាណ៤០០ ម៉ែត្រពីផ្ទះ។ ពេលលោកបង្ហោះបានរយៈពេលមួយសន្ទុះ មានបុរសម្នាក់ឈ្មោះស្រី ម៉ុន អាយុជាង៥០ឆ្នាំ ជាបុគ្គលិកពេទ្យ មានទីលំនៅក្បែរលោកដែរបានទៅប្រាប់ថា ពេលគាត់ឮសំឡេងឯកខ្លែងធ្វើឱ្យមានអារម្មណ៍ភ័យខ្លាចណាស់ ។ ពេលនោះលោកបានប្រាប់ទៅវិញថា បើខ្លាចខ្លែងដូចជាខ្លាចសម្បត្តិវប្បធម៌ជាតិដែរបន្តិចទៀតខ្ញុំនឹងទៅដាក់ចុះវិញហើយ។ បន្ទាប់មកបុរសនោះបានចេញទៅវិញបាត់ទៅ លុះរយៈពេល៥នាទីក្រោយមកស្រាប់តែមានជនមិនស្គាល់មុខលួចកាត់ខ្សែខ្លែងគាត់បណ្តាលឱ្យវាធ្លាក់ចុះដោយកន្ទុយមួយចំហៀងគងលើដំបូលផ្ទះអ្នកជិតខាងម្នាក់ទៀតឈ្មោះប៉ន យ៉ុន អាយុ៦០ឆ្នាំ ហើយម្ចាស់ផ្ទះ បានទាមទារឱ្យលោកនិមន្តព្រះសង្ឃ៧ វត្តសូត្រមន្តឱ្យ ។
លោកម៉ិញ សុផាត បានបន្តទៀតថា ខណៈនោះលោកមិនបានប្រកែកចំពោះការទាមទារនោះទេនិងបានប្រគល់លុយចំនួន២០ដុល្លារទៅឱ្យម្ចាស់ផ្ទះ ដើម្បីសូត្រមន្ត ហើយរឿងនោះក៏បានចប់សព្វគ្រប់អស់ហើយដែរ។ ពេលនេះអ្វីដែលលោកចង់បាន គឺសំណូមពរសុំឱ្យក្រសួងវប្បធម៌ជួយបកស្រាយពីបញ្ហានោះដើម្បីស្រាយចម្ងល់ជូនប្រជាពលរដ្ឋហើយលោកមានការ ព្រួយបារម្ភខ្លាចពាក្យចចាមអារ៉ាមនោះជាល្បិចកលរបស់សត្រូវដែលចង់បានវប្បធម៌ជាតិយើងហើយក៏ចេះតែឃោសនាទៅ ដែលនេះគឺជាការប៉ះពាល់ដល់សម្បត្តិវប្បធម៌ជាតិដែលមានអាយុរាប់ពាន់ឆ្នាំមកហើយ ៕
ចែករំលែកព័តមាននេះ