ខេត្តបាត់ដំបង ៖ កាលពីថ្ងៃទី២៣ វិច្ឆិកា នៅសាលប្រជុំសាខាកាកបាទក្រហមកម្ពុជាខេត្តមានរៀបចំកិច្ចប្រជុំផ្សព្វផ្សាយលទ្ធផលបូកសរុបការងារសង្គ្រោះប្រជាជនរងគ្រោះដោយទឹកជំនន់ និងផលប៉ះពាល់ ចាប់ពីថ្ងៃទី២៥ កញ្ញា ដល់ថ្ងៃទី១៥ វិច្ឆិកា ជាមួយអ្នកសារព័ត៌មាននានា និងសប្បុរសជនក្នុងខេត្ត ក្រោមអធិបតីភាពលោកប៊ុត គឹមស៊ាន សមាជិកក្រុមប្រឹក្សាខេត្ត និងជាប្រធានគណៈកម្មាធិការសាខាកាកបាទក្រហមកម្ពុជាខេត្ត។ អញ្ជើញចូលរួមក្នុងឱកាសនោះមាន ព្រឹទ្ធបុរសពុទ្ធិកសាកលវិទ្យាល័យព្រះសីហនុរាជសាខាខេត្តបាត់ដំបង លោកសួស សុភ័ក្ត្រ អនុប្រធានមន្ទីរព័ត៌មានខេត្ត អ្នកសារព័ត៌មាន ព្រមទាំងសប្បុរសជនជាច្រើនរូបផងដែរ។
លោកកង ប៊ន នាយកសាខាកាកបាទក្រហមកម្ពុជាខេត្តបានមានប្រសាសន៍ថា កិច្ចសហការសង្គ្រោះនានា ដែលសាខាកាកបាទក្រហមកម្ពុជាខេត្ត និងអនុសាខាស្រុកទាំង៤បានរួមសហប្រតិបត្តិការជាមួយលេខាធិការដ្ឋានគ្រប់គ្រងគ្រោះមហន្តរាយខេត្ត ជាមួយសប្បុរសជនជួយប្រជាពលរដ្ឋរងគ្រោះដោយទឹកជំនន់ តំបន់ដែលប៉ះពាល់មានស្រុកចំនួន៤គឺស្រុកមោងឫស្សី ស្រុកសង្កែ ស្រុកឯកភ្នំ និងស្រុកថ្មគោល និងមានចំនួន២១ឃុំ ។ ការផ្តល់ជំនួយសង្គ្រោះដោយសាខាផ្ទាល់ចំនួន៣៥លើក ស្មើនឹង៨.២៧២គ្រួសារ អស់ថវិកាចំនួន៩៧.៦៨១ដុល្លារអាមេរិក ក្នុងនោះសាខាបានទទួលឃីត សង្គ្រោះពីលោកជំទាវកិត្តិព្រឹទ្ធបណ្ឌិតប៊ុន រ៉ានី ហ៊ុន សែន ប្រធានកាកបាទក្រហមកម្ពុជាចំនួន៣.២៨៩កញ្ចប់។ ការផ្តល់ជំនួយសង្គ្រោះដោយអនុសាខាស្រុក និងក្រុមការងារគណបក្សប្រជាជនកម្ពុជាចំនួន១៤លើក ស្មើនឹង៥.៧៨១គ្រួសារ និងការផ្តល់ជំនួយសង្គ្រោះដោយអនុសាខាស្រុក និងសប្បុរសជននានា រួមទាំងព្រះសង្ឃ និងអង្គការក្រៅរដ្ឋាភិបាលផង ចំនួន៣៧លើក ស្មើនឹង៥.៤៧៨គ្រួសារ។ ថ្វីដ្បិតតែយើងបានប្រើប្រាស់ថវិកាបម្រុងរបស់សាខាជិតអស់ តែប្រជាជនជិត២០.០០០គ្រួសារត្រូវបានជួយសង្គ្រោះ និងជម្លៀសមកកាន់ទីទួលសុវត្ថិភាពបានល្អប្រសើរ និងទាន់ពេលវេលា។ នេះជាភាពម្ចាស់ការមួយរបស់សាខាកាកបាទក្រហមកម្ពុជាខេត្ត និងបង្ហាញនូវមហាសាមគ្គីមនុស្សធម៌ជួយដល់ជនរងគ្រោះក្រីក្រលំបាកទាំងនេះ គួរជាទីមោទនៈក្រៃលែង។
លោកប៊ុត គឹមស៊ាន បានមានប្រសាសន៍ថា ប្រឈមនឹងគ្រោះទឹកជំនន់ដែលពុំធ្លាប់មានមកនេះ ថ្នាក់ដឹកនាំខេត្ត សាខាកាកបាទក្រហមកម្ពុជាខេត្ត និងក្រុមការងារគណបក្សប្រជាជនកម្ពុជា ព្រមទាំងសប្បុរសជនក្នុង និងក្រៅស្រុកបានរួមសហប្រតិបត្តិការសង្គ្រោះប្រជាជនតាមមូលដ្ឋាននានាបានទាន់ពេលវេលា ស្របតាមអនុសាសន៍ណែនាំដ៏ខ្ពង់ខ្ពស់របស់សម្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រី និងលោកជំទាវកិត្តិព្រឹទ្ធបណ្ឌិតប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ព្រមទាំងលោកឧបនាយករដ្ឋមន្ត្រី ស ខេង បានល្អប្រសើរ។ លោកបន្តទៀតថា ក្នុងការបំពេញបេសកកម្មមនុស្សធម៌ដ៏ធំធេងនេះ ជារួមយើងទទួលបានជោគជ័យជួយសង្គ្រោះទាន់ពេលវេលា និងបានគ្រប់គ្រួសាររងគ្រោះទាំងអស់។ អ្វីដែលជាមោទនភាពនោះ គឺយើងបានទទួលពីសប្បុរសជនគ្រប់ទិសទីជួយឧបត្ថម្ភគាំទ្រ និងរួមចំណែកជាមួយសាខា និងអនុសាខា ជាពិសេសអាជ្ញាធរគ្រប់លំដាប់ថ្នាក ់មន្ទីរ ស្ថាប័ននានាក្នុងខេត្ត ព្រះសង្ឃ និងអង្គការក្រៅរដ្ឋាភិបាល។ ជាងនេះទៀតនោះ គឺបណ្តាញសារព័ត៌មានមានកាសែត វិទ្យុ ទូរទស្សន៍ទាំងអស់ប្រចាំខេត្ត ដែលបានផ្សព្វផ្សាយទាន់ពេលវេលាលើកិច្ចសង្គ្រោះដ៏ធំ និងពុំធ្លាប់មានកន្លងមកនេះ៕
ចែករំលែកព័តមាននេះ