ខេត្តកំពង់ចាម ៖ ពិធីចែកសម្ភារចង្កៀងអគ្គិសនីប្រើថាមពលពន្លឺព្រះអាទិត្យជូនប្រជាពលរដ្ឋចំនួន២៥០គ្រួសារ រស់នៅភូមិស្រែលើសែនជ័យ ដែលទើបនឹងបង្កើតថ្មី ក្នុងឃុំជាំក្រវៀន ស្រុកមេមត់ បានប្រារព្ធឡើងកាលពីព្រឹកថ្ងៃទី២២ វិច្ឆិកា ២០១១ ក្រោមអធិបតីភាពលោកលន់ លឹមថៃ អភិបាលរងខេត្ត តំណាងលោកហ៊ុន ណេង អភិបាលខេត្ត ។
លោកចេង ប៊ុណ្ណារ៉ា អភិបាលស្រុកមេមត់ បានឱ្យដឹងថា កាលពីមុនប្រជាពលរដ្ឋក្មេងចាស់ប្រុសស្រីដែលរស់នៅភូមិស្រែលើសែនជ័យ ហាក់បីដូចជានៅឆ្ងាយពីសង្គម ដោយសារតែផ្លូវលំមកកាន់ទីប្រជុំជនមានការពិបាកធ្វើដំណើរខ្លាំងណាស់ទៅណាមកណាត្រូវប្រើពេលយូរថែមទាំងមិនមានភ្លើងអគ្គិសនីប្រើប្រាស់ទៀតផង ។
លោកអភិបាលស្រុកមេមត់ បានបន្តថា ដោយមានការយកចិត្តទុកដាក់ពីសំណាក់ លោកហ៊ុន ណេង អភិបាលខេត្តបានចាត់រូបលោកនិងស្ថាប័នពាក់ព័ន្ធឱ្យធ្វើការអភិវឌ្ឍនៅភូមិស្រែលើសែនជ័យរហូតដល់ឆ្នាំ២០១១នេះ សមិទ្ធផលបានកើនឡើងព្រោងព្រាតមានតាំងពីសាលារៀន មណ្ឌលសុខភាព ផ្លូវលំ ដោយមានការចូលរួមឧបត្ថម្ភពីអង្គការក្រៅរដ្ឋាភិបាលផងដែរ។ ជាក់ស្តែងអង្គការLASED បានយកសម្ភារបរិក្ខារអគ្គិសនីប្រើថាមពលពន្លឺព្រះអាទិត្យជូនដល់ប្រជាពលរដ្ឋទាំង២៥០គ្រួសារ ប្រសិនបើពេលយប់ពួកគាត់នាំគ្នាបើកភ្លើងបំភ្លឺគ្រប់ៗផ្ទះនោះ ប្រៀបបានទៅនឹងកូនទីក្រុងតូចមួយយ៉ាងដូច្នោះដែរ ។
លោកជាម ប៉េអា អគ្គនាយករងនៃអគ្គនាយកដ្ឋានរដ្ឋបាលមូលដ្ឋានក្រសួងមហាផ្ទៃ និងជានាយកសម្របសម្រួលអង្គការLASEDមានប្រសាសន៍ថា ក្រោយពីទទួលបាននូវសម្ភារពន្លឺព្រះអាទិត្យនេះហើយសូមបងប្អូនទាំងអស់ខិតខំបង្កើនមុខរបរបន្ថែមទៀតដើម្បីលើកស្ទួយជីវភាពគ្រួសារនីមួយៗឱ្យកាន់តែប្រសើរឡើងថែមទៀត។ ជាមួយនោះដែរត្រូវចេះសហការជាមួយនឹងអង្គការLASED ដើម្បីឱ្យមានភាពងាយស្រួលនៅក្នុងការអភិវឌ្ឍថាមពលភូមិឋានយើង ។
លោកសារ៉េត បូរ៉ាមី នាយកគម្រោងLASED ថ្នាក់ជាតិមានប្រសាសន៍ឱ្យដឹងថា តាមការប្រៀបធៀបដីសម្បទានសង្គមកិច្ចដើម្បីអភិវឌ្ឍន៍សេដ្ឋកិច្ចរបស់អង្គការLASED នៅតាមបណ្តាខេត្តដូចជា កំពង់ធំ ក្រចេះ ឃើញថានៅក្នុងខេត្តកំពង់ចាម មានការលេចធ្លោជាងគេនៅក្នុងការអភិវឌ្ឍ ។ ក្នុងរយៈពេលជិតផុតគម្រោងក្រុមការងារថ្នាក់ជាតិនៅខេត្តទាំង២ (កំពង់ធំនិងក្រចេះ) បានមកសិក្សាដកបទពិសោធន៍និងបច្ចេកទេសដើម្បីយកទៅអភិវឌ្ឍន៍នៅខេត្តរបស់គេធ្វើយ៉ាងណាឱ្យមានការរីកចម្រើនដូចនៅខេត្តកំពង់ចាមដែរ ។
លោកលន់ លឹមថៃ អភិបាលរងខេត្តកំពង់ចាម មានប្រសាសន៍ឱ្យដឹងដែរថា លោកហ៊ុន ណេង អភិបាលខេត្ត ចំពោះជីវភាពរស់នៅរបស់ប្រជាពលរដ្ឋទូទាំងខេត្តជាពិសេសប្រជាពលរដ្ឋរស់នៅក្នុងភូមិស្រែលើសែនជ័យ ឃុំជាំក្រវៀន ស្រុកមេមត់ ដែលកំពុងតែជួបប្រទះការលំបាក ។ អាជ្ញាធរខេត្តបានជួយកសាងផ្លូវលំ១ខ្សែប្រវែង៨.១០០ម៉ែត្រ សាលារៀន មណ្ឌលសុខភាព ព្រមទាំងហេដ្ឋារចនាសម្ព័ន្ធផ្សេងៗទៀតធ្វើឱ្យជីវភាពរស់នៅរបស់ប្រជាពលរដ្ឋឱ្យមានការប្រែប្រួលយ៉ាងល្អប្រសើរ។
បន្ទាប់មកលោកអភិបាលរងខេត្តបានផ្តាំផ្ញើដល់ប្រជាពលរដ្ឋទាំងអស់ត្រូវតែចូលរូមចំណែកនៅក្នុងការរក្សាភូមិឃុំសុវត្ថិភាព និងប្រកាសទទួលស្គាល់ភូមិស្រែលើសែនជ័យ តាមសេចក្តីប្រកាសរបស់ក្រសួងមហាផ្ទៃចាប់ពីពេលនេះតទៅ ៕
ចែករំលែកព័តមាននេះ