ខេត្តកណ្តាល ៖ ក្រោយពេលសារព័ត៌មានកោះសន្តិភាពចុះផ្សាយព័ត៌មានស្តីពីជីវិតក្រលំបាកគ្មានទីជម្រករបស់ស្ត្រីមេម៉ាយកូន៤នាក់ ឈ្មោះម៉ិញ សុំ រស់នៅភូមិព្រែកតានប់ ឃុំកំពង់ស្វាយ ស្រុកកៀនស្វាយ មកក៏មានសប្បុរសជនអាណិតអាសូរស្ត្រីមេម៉ាយរូបនេះ ហើយផ្តល់អំណោយជាថវិកាតាមសទ្ធាជ្រះថ្លាជាបន្តបន្ទាប់ តាមរយៈកោះសន្តិភាព។ ថវិកាទាំងនោះ ត្រូវបានភ្នាក់ងារកោះសន្តិភាពនាំយកទៅជូនដល់ស្ត្រីមេម៉ាយម៉ិញ សុំ ផ្ទាល់ដៃ កាលពីព្រឹកថ្ងៃទី២៣ វិច្ឆិកា ឆ្នាំ២០១១ កន្លងទៅនេះ។
សប្បុរសជន ដែលបានផ្តល់អំណោយរួមមាន លោកគឹម សាន្ត អគ្គលេខាធិការរងរដ្ឋសភា ថវិកាចំនួន១០០ដុល្លារសហរដ្ឋអាមេរិក លោកអ៊ុក នាង មន្ត្រីនគរបាលចូលនិវត្តន៍ទីលំនៅផ្ទះលេខ១០៦ Ez សង្កាត់ផ្សារថ្មីទី៣ ខណ្ឌដូនពេញ រាជធានីភ្នំេពញ ថវិកាចំនួន៤០.០០០រៀល។
បងស្រីម៉ិញ សុំ បានថ្លែងអំណរគុណយ៉ាងជ្រាលជ្រៅចំពោះសប្បុរសជន ដែលបានជួយឧបត្ថម្ភថវិកាដល់រូបគាត់ព្រមទាំងកូនៗទាំង៤នាក់ ដែលកំពុងរស់នៅយ៉ាងលំបាកទាំងជីវភាព និងជម្រក។ បងស្រីដឹងគុណជានិច្ចនូវទឹកចិត្តដ៏សប្បុរសធម៌នោះ ហើយសូមជូនពរដល់សប្បុរសជនទាំងអស់ជួបប្រទះតែសេចក្តីសុខសេចក្តីចម្រើន និងប្រកបដោយពុទ្ធពរទាំង៤ប្រការគឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ។ បងស្រីម៉ិញ សុំ បានបញ្ជាក់ថា អំណោយដែលសប្បុរសជនបានផ្តល់ឱ្យនេះ គឺគាត់នឹងយកទៅផ្គត់ផ្គង់ដល់ការសិក្សារបស់កូនៗដែលពួកគេកំពុងសិក្សាទាំងជួបការលំបាកខ្វះមុខខ្វះក្រោយ។
គួររំលឹកថា ស្ថិតក្នុងភាពជាស្ត្រីមេម៉ាយដោយប្តីស្លាប់ ស្ត្រីឈ្មោះមិញ សុំ កំពុងតែរស់នៅក្នុងជីវភាពលំបាកលំបិន ហើយសូម្បីតែជម្រកក៏ត្រូវសុំសំយាបផ្ទះគេជ្រកដែរ។ តាមការរៀបរាប់របស់ស្ត្រីមេម៉ាយរូបនេះគឺ ជីវិតគាត់ពុំដែលស្គាល់នូវអ្វីដែលជាភាពគ្រប់គ្រាន់នោះទេ តាំងពីពេលដែលប្តីគាត់នៅរស់ម៉្លេះ ហើយក្រោយប្តីស្លាប់ទៅជីវិតរស់នៅកាន់តែលំបាកថែមទៀត សំខាន់ការទ្រាំទ្រចិញ្ចឹមកូនកំព្រាទាំង៤នាក់ ដែលពួកគេមិនគ្រាន់តែត្រូវការរស់និងម្ហូបអាហារនោះទេ តែពួកគេត្រូវការសិក្សារៀនសូត្រថែមទៀត។ បច្ចុប្បន្នគាត់ប្រកបមុខរបរដើរបេះត្រកួននៅក្នុងបឹង ដើម្បីយកទៅលក់នៅឯទីផ្សារ ហើយក្នុងមួយថ្ងៃគាត់អាចរកបានប្រមាណ៥.០០០រៀលប៉ុណ្ណោះ។ ប៉ុន្តែប្រសិនបើជំងឺប្រចាំកាយរបស់គាត់ចាប់កម្រើកឡើងវិញនោះ គឺគាត់ត្រូវខកខានមិនបានទៅបេះត្រកួនទេ ហើយក៏ត្រូវខ្វះអង្ករផងដែរ។ ដូច្នេះ អំណោយដែលសប្បុរជនផ្តល់ជូនដល់រូបគាត់នេះ គឺជាទឹកចិត្តមនុស្សធម៌ដែលមិនអាចកាត់ថ្លៃបាន រួមទាំងជាគុណបំណាច់ដ៏លើសលប់បំផុត។ គាត់លើកដៃសំពះទាំងទឹកភ្នែក សុំឱ្យសប្បុរសជនមេត្តាបន្តជួយដល់រូបគាត់ផង ហើយគាត់សន្យាថា នឹងយកអំណោយទំាងនោះទៅចំណាយលើអ្វីដែលមានប្រយោជន៍សម្រាប់ជីវិត និងការសិក្សារបស់កូនៗ។
បងស្រីម៉ិញ សុំ បានថ្លែងអំណរគុណយ៉ាងជ្រាលជ្រៅ និងអស់ពីចិត្តពីថ្លើមផងដែរ ចំពោះសារព័ត៌មានកោះសន្តិភាព ដែលបានចុះផ្សាយអំពីជីវិត និងភាពក្រីក្ររបស់គាត់ នាំឱ្យមានសប្បុរសជនផ្តល់ថវិកាជាបន្តបន្ទាប់។ បងស្រីសូមជូនពរដល់ថ្នាក់ដឹកនាំបុគ្គលិកកម្មករ សារព័ត៌មានកោះសន្តិភាពសូមជួបប្រទះតែសេចក្តី សុខ សិរីសួស្តី អាយុយឺនយូរ និងប្រកបរបរបានចម្រុងចម្រើនសមតាមសេចក្តីប្រាថ្នា៕
ចែករំលែកព័តមាននេះ