រាជធានីភ្នំពេញ ៖ ថ្ងៃនេះគឺជាថ្ងៃទី២ហើយ ដែលអង្គជំនុំជម្រះវិសាមញ្ញក្នុងតុលាការកម្ពុជា បន្តបើកសវនាការលើអង្គសេចក្តីសំណុំរឿង០០២ ប្រឆាំងនឹងអតីតមេដឹកនាំកំពូលៗនៃរបបកម្ពុជាប្រជាធិបតេយ្យ ខៀវ សំផន នួន ជា និងអៀង សារី។ កាលពីថ្ងៃទី២១ វិច្ឆិកា ២០១១ សវនាការលើអង្គសេចក្តីក្នុងសំណុំរឿង០០២នេះ បានធ្វើឡើងពេញមួយថ្ងៃ ដោយប្រធានក្រុមប្រឹក្សាជំនុំជម្រះសាលាដំបូងនៃសាលាក្តីខ្មែរក្រហម លោកសហចៅក្រមជាតិ និល នុន បានអានសារបានជនត្រូវចោទទាំង៣នាក់ខាងលើ ក៏ដូចជាបទល្មើសដែលត្រូវចោទប្រកាន់ ។
ជនជាប់ចោទនួន ជា អាយុ៨៥ឆ្នាំ អតីតប្រធានសភាតំណាងប្រជាជន ខៀវ សំផន អាយុ ៨០ឆ្នាំ អតីតប្រធានគណៈប្រធានរដ្ឋ ឬប្រមុខរដ្ឋ និងលោកអៀង សារី អាយុ៨៦ឆ្នាំ អតីតឧបនាយករដ្ឋមន្រ្តី រដ្ឋមន្រ្តីការបរទេសនៃរបបវាលពិឃាត៣ឆ្នាំ ៨ខែ ២០ថ្ងៃ ត្រូវបានចោទប្រកាន់ពីបទឧក្រិដ្ឋកម្មប្រឆាំងនឹងមនុស្សជាតិ ការរំលោភបំពារបំពានយ៉ាងធ្ងន់ធ្ងរលើអនុសញ្ញាទី ក្រុងហ្សឺណែវឆ្នាំ១៩៤៩ និងឧក្រិដ្ឋកម្មប្រល័យពូជសាសន៍។
សហព្រះរាជអាជ្ញាជាតិ លោកស្រីជា លាង បានលើកឡើងថា ភស្តុតាងដែលនឹងដាក់បង្ហាញចំពោះមុខចៅក្រមជំនុំជម្រះនាពេលនេះ នឹងបង្ហាញឱ្យឃើញដោយគិតចាប់ពីថ្ងៃទី១៧ មេសា ឆ្នាំ១៩៧៥ អំពីបក្សកុម្មុយនីស្តកម្ពុជា ដែលបានបង្វែរប្រទេសកម្ពុជាឱ្យធ្លាក់ចូលទៅក្នុងជំរំទាសករមហាជន ដោយបានបង្រួមប្រជាជនទូទាំងប្រទេសឱ្យទៅជាទាសកររស់នៅក្រោមប្រព័ន្ធមួយដ៏ឃោរឃៅយង់ឃ្នង ដែលគេពិបាកជឿបាន រហូតមកដល់នឹងសព្វថ្ងៃនេះ។
លោកស្រីសហព្រះរាជអាជ្ញាជាតិបានថ្លែងបន្តថា ឧក្រិដ្ឋកម្មក្នុងរបបខ្មែរក្រហម រួមមាន ការជម្លៀសដោយបង្ខំនៅទីក្រុងនានា ការធ្វើឱ្យទៅជាទាសករនូវប្រជាជនរាប់លាននាក់ ក្នុងជំរំការងារដោយបង្ខំ ការកម្ទេចជីវិតមនុស្សរាប់រយសែននាក់តាមបណ្តាមន្ទីរសន្តិសុខ និងវាលពិឃាតដ៏អសោចិ៍នានា ការសម្លាប់រង្គាលដល់ជនជាតិភាគតិច ការស្លាប់មនុស្សដ៏ច្រើនឥតគណនា បណ្តាលមកពីជំងឺ ការធ្វើការហួសកម្លាំង ការរំលោភ និងការបង្អត់អាហារ ដែលឧក្រិដ្ឋកម្មទាំងនេះត្រូវបានបញ្ជានិងរៀបចំឡើង ដោយជនជាប់ចោទ ដែលជាឧក្រិដ្ឋកម្មដ៏មហារន្ធត់ ដែលប្រទេសជាតិមួយមិនធ្លាប់ទទួលរងក្នុងប្រវត្តិសាស្ត្រសម័យទំនើបនេះ។
លោកស្រីជា លាង បានបន្តថា ប្រជាជនកម្ពុជាគ្រប់រូប ដែលនៅរស់រានមានជីវិតពីសម័យនោះ បានទទួលរងផលប៉ះពាល់ពីប្រព័ន្ធឧក្រិដ្ឋដ៏គាបសង្កត់មួយនេះ ដែលជនជាប់ចោទបានដាក់ចេញ។ ចំនួនមនុស្សស្លាប់សរុប ធ្វើឱ្យយើងរន្ធត់ណាស់ដោយអ្នកជំនាញបានប៉ាន់ស្មាន ថា មានចន្លោះពី១,៧លាននាក់ទៅ២,២លាននាក់ ដែលបណ្តាលមកពីលទ្ធផលនៃការគ្រប់គ្រងរបស់ខ្មែរក្រហម ៕
ចែករំលែកព័តមាននេះ