រាជធានីភ្នំពេញ ៖ សិក្ខាសាលាស្តីពីផែនការយុទ្ធសាស្ត្រអភិវឌ្ឍន៍ទេសចរណ៍ឆ្នាំ២០១១-២០២០ និងគោលនយោបាយអេកូទេសចរណ៍ជាតិ ត្រូវបានរៀបចំធ្វើរយៈពេលមួយថ្ងៃគឺថ្ងៃទី១៦ វិច្ឆិកា ឆ្នាំ២០១១ នៅសណ្ឋាគារសូហ្វីតែល ក្រោមអធិបតីភាពលោកឧបនាយករដ្ឋមន្ត្រីគាត ឈន់ រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ។ ចូលរួមក្នុងសិក្ខាសាលានេះដែរ មានលោកថោង ខុន រដ្ឋមន្ត្រីក្រសួងទេសចរណ៍ និងលោក Frederic Pierret នាយកប្រតិបត្តិអង្គការទេសចរណ៍ពិភពលោក ។
លោកថោង ខុន បានមានប្រសាសន៍នាឱកាសនោះថា សិក្ខាសាលាស្តីពីផែនការយុទ្ធសាស្ត្រអភិវឌ្ឍន៍ទេសចរណ៍ ២០១១-២០២០ និងគោលនយោបាយអេកូទេសចរណ៍ជាតិនាពេលនេះ គឺដើម្បីពិភាក្សាផ្លាស់ប្តូរយោបល់ និងបន្ថែមនូវធាតុចូលឱ្យកាន់តែស៊ីជម្រៅថែមទៀត សម្រាប់រៀបចំផែនការយុទ្ធសាស្ត្រអភិវឌ្ឍន៍ទេសចរណ៍ និងគោលនយោបាយអេកូទេសចរណ៍មួយប្រកបដោយប្រសិទ្ធភាព ដែលជាត្រីវិស័យចង្អុលទិសក្នុងការអភិវឌ្ឍទេសចរណ៍កម្ពុជាប្រកបដោយនិរន្តរភាពនិងការទទួលខុសត្រូវ ។ ការរៀបចំផែនការនេះ គឺដើម្បីឱ្យស្របទៅនឹងចក្ខុវិស័យនៃវិស័យទេសសចរណ៍ពិភពលោកសម្រាប់ឆ្នាំ២០១០-២០៣០ និងផែនការយុទ្ធសាស្ត្រទេសចរណ៍អាស៊ានឆ្នាំ២០១០-២០១៥ ។
លោករដ្ឋមន្ត្រីបានរំលឹកឡើងវិញថា ឆ្នាំ ២០១០ ទេសចរអន្តរជាតិប្រមាណ៩៤០លាននាក់ បានធ្វើដំណើរឆ្លងកាត់ព្រំដែនអន្តរជាតិដែលបង្កើតចំណូលបាន១០០០កោដិដុល្លារក្នុងចំណូលនាំចេញ និងមានទេសចរក្នុងស្រុកប្រមាណ៤០០០លាននាក់ទៀតបានធ្វើដំណើរក្នុងប្រទេសរបស់ខ្លួន ។ ក្នុងឆ្នាំ២០១២ ខាងមុខនេះ គេរំពឹងថា ពិភពលោកទាំងមូល នឹងទទួលបានទេសចរអន្តរជាតិប្រមាណ១០០០លាននាក់ ក្នុងនោះតំបន់អាស៊ីប៉ាស៊ីហ្វិក នឹងបន្តដើរតួនាទីជាគោលដៅទេសចរណ៍ដ៏ចម្បងរបស់សាកលលោកជាមួយការព្យាករអត្រាកំណើនមធ្យមប្រចាំឆ្នាំនៃការមកដល់របស់ទេសចរអន្តរជាតិប្រមាណ៤,៤% ក្នុងចន្លោះឆ្នាំ២០១០-២០៣០ ព្រមទាំងជាប្រភពរនៃការហូរចេញរបស់ទេសចរក្នុងចន្លោះឆ្នាំ២០១០-២០៣០ ជាពិសេសប្រទេសចិន គឺជាគោលដៅទេសចរណ៍ និងជាទីផ្សារផ្គត់ផ្គង់ទេសចរមួយដ៏ចម្បងនៅក្នុងតំបន់ ។
លោកថោង ខុន បានបញ្ជាក់ថា សម្រាប់ប្រទេសកម្ពុជា ក្រោមការដឹកនាំដ៏ត្រឹមត្រូវ និងឈ្លាសវៃប្រកបដោយគតិបណ្ឌិត របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា មានសុខសន្តិភាព ស្ថិរភាពនយោបាយ សន្តិសុខសណ្តាប់ធ្នាប់សង្គមពេញលេញ និងមានការអភិវឌ្ឍរីកចម្រើនលើគ្រប់វិស័យ ក្នុងនោះវិស័យទេសចរណ៍ មានការរីកចម្រើនគួរជាទីមោទនៈ ។ វិស័យទេសចរណ៍ ត្រូវបានចាត់ទុកជាវិស័យអាទិភាពមួយ ដើរតួជា «មាសបៃតង» រួមចំណែកដល់កិច្ចអភិវឌ្ឍន៍សេដ្ឋកិច្ច-សង្គម និងការពារបរិស្ថាន អភិរក្សបេតិកភណ្ឌវប្បធម៌ និងធនធាន ធម្មជាតិ ពោលគឺចូលរួមការកសាងសេដ្ឋកិច្ចបៃតងនៅកម្ពុជា ។
ជាក់ស្តែង ភ្ញៀវទេសចរមកកាន់ប្រទេសកម្ពុជាកាន់តែមានការកើនឡើងជាលំដាប់ដូចជាក្នុងឆ្នាំ២០១០ កម្ពុជាទទួលបានភ្ញៀវទេសចរអន្តរជាតិចំនួន២,៥លាននាក់ គឺកើន១៦% ប្រៀបធៀបនឹងឆ្នាំ២០០៩ ហើយក្នុងរយៈពេល៩ខែដើមឆ្នាំ២០១១ នេះ កម្ពុជាទទួលបានភ្ញៀវទេសចរ២,១លាននាក់ កើនឡើង១៥,៦% ធៀបនឹងរយៈពេលដូចគ្នានៃ ឆ្នាំ២០១០ ។ តាមការព្យាករ កម្ពុជានឹងទទួលបានទេសចរអន្តរជាតិប្រមាណ៤,៥លាននាក់នៅក្នុងឆ្នាំ២០១៥ ហើយនៅឆ្នាំ២០២០ មានប្រមាណ៧លាននាក់ ឬអាចច្រើនជាងនេះ ដែលអាចនឹងនាំមកនូវចំណូលជាតិប្រមាណ៥.០០០លានដុល្លារចាប់ពីឆ្នាំ២០២០ និងបានចូលរួមចំណែកប្រមាណជាង១០%នៃ GDP និងផ្តល់ការងារប្រមាណ៨០មឺុននាក់ ទៅ១លាននាក់ ។
លោកឧបនាយករដ្ឋមន្ត្រី គាត ឈន់ មានប្រសាសន៍ថា ទោះបីជាវិស័យទេសចរណ៍កម្ពុជាទទួលបានការរីកចម្រើនគួរឱ្យកត់សម្គាល់ក៏ដោយ ក៏ប៉ុន្តែយើងសង្កេតឃើញថា ភ្ញៀវទេសចរភាគច្រើនបានប្រមូលផ្តុំគ្នាទៅទស្សនាគោលដៅចម្បងមួយចំនួនតែប៉ុណ្ណោះ ពោលគឺទេសចរអន្តរជាតិដែលអញ្ជើញមកទស្សនាព្រះរាជាណាចក្រកម្ពុជា ភាគច្រើនទៅទស្សនាតំបន់សៀមរាប អង្គរប្រមាណជាង៥០%និងរាជធានីភ្នំពេញ ជាង៤០%។ រីឯការចូលទស្សនានៅតំបន់អេកូទេសចរណ៍នៅតំបន់ភូមិភាគឦសាន តំបន់បឹងទន្លេសាប និងតំបន់ឆ្នេរនៅមានកម្រិតទាបនៅឡើយ។ ដូច្នេះការអនុវត្តយុទ្ធសាស្ត្រពិពិធកម្មផលិតផលទេសចរណ៍ និងគោលដៅទេសចរណ៍ដូចជាការអភិវឌ្ឍន៍វិស័យអេកូទេសចរណ៍ត្រូវបានមើលឃើញថា នឹងដើរតួនាទីជាកម្លាំងជំរុញដ៏សំខាន់មួយក្នុងការរួមចំណែកអភិវឌ្ឍវិស័យទេសចរណ៍នៅកម្ពុជា និងធ្វើឱ្យព្រះរាជាណាចក្រអច្ឆរិយៈមួយនេះ ក្លាយជាគោលដៅលេចធ្លោប្រកបដោយភាពទាក់ទាញ និងប្រកួតប្រជែងខ្ពស់ ផ្តល់នូវភាពកក់ក្តៅដល់ភ្ញៀវទេសចរគ្រប់ជាតិសាសន៍ និងគ្រប់ប្រភេទទីផ្សារ ទាំងទេសចរវប្បធម៌ និងធម្មជាតិ ជាពិសេសចូលរួមធ្វើឱ្យសម្រេចបាននូវចក្ខុវិស័យប្រកបដោយសុទិដ្ឋិនិយម ក្នុងការទទួលបានទេសចរអន្តរជាតិ៤,៥លាននាក់ នៅឆ្នាំ២០១៥ និង៧លាននាក់នៅឆ្នាំ២០២០ ៕
ចែករំលែកព័តមាននេះ