ខេត្តព្រះវិហារ ៖ ប្រតិភូក្រសួងវប្បធម៌និងវិចិត្រសិល្បៈ ដឹកនាំដោយលោករដ្ឋមន្ត្រី ហ៊ឹម ឆែម និងលោកជំទាវជាភរិយា បាននាំយកអំណោយជាគ្រឿងឧបភោគ បរិភោគ និងថវិកាមួយចំនួនទៅជួយឧបត្ថម្ភដល់កងកម្លាំងនគរបាលវរៈ ការពារព្រំដែនគោកលេខ៧៩៥ នៅភូមិស្រឯម ឃុំកន្ទួត ស្រុកជាំក្សាន្ត កាលពីព្រឹកថ្ងៃទី១៣ ខែវិច្ឆិកា ឆ្នាំ២០១១ ។
ខេត្តព្រះវិហារ ៖ ប្រតិភូក្រសួងវប្បធម៌និងវិចិត្រសិល្បៈ ដឹកនាំដោយលោករដ្ឋមន្ត្រី ហ៊ឹម ឆែម និងលោកជំទាវជាភរិយា បាននាំយកអំណោយជាគ្រឿងឧបភោគ បរិភោគ និងថវិកាមួយចំនួនទៅជួយឧបត្ថម្ភដល់កងកម្លាំងនគរបាលវរៈការពារព្រំដែនគោកលេខ៧៩៥ នៅភូមិស្រឯម ឃុំកន្ទួត ស្រុកជាំក្សាន្ត កាលពីព្រឹកថ្ងៃទី១៣ ខែវិច្ឆិកា ឆ្នាំ២០១១ ។
អំណោយរួមមាន អង្ករ១០០បាវ មីយើង ២០០កេស ត្រីខ៩កេសធំ ទឹកត្រី១២៥យួរ ទឹកស៊ីអ៊ីវ១២៥យួរ ។ ជាមួយនេះ ឧបត្ថម្ភដល់ពលនគរបាលចំនួន២៣៨នាក់ ម្នាក់ៗទទួលបានថវិកា២ម៉ឺនរៀល និងឧបត្ថម្ភដល់អង្គភាព វរៈការពារព្រំដែនគោក៤លានរៀល ។
លោកវរសេនីយ៍ទោ ហ៊ឹម ចាន់ មេបញ្ជាការវរសេនាតូចការពារព្រំដែនគោកលេខ៧៩៥ ប្រចាំទិសព្រះវិហារ បានថ្លែងថា ឥឡូវនេះសភាពការណ៍នៅតំបន់ព្រះវិហារ មានសភាពស្ងប់ស្ងាត់ ប៉ុន្ដែមានការប្រុងប្រយ័ត្នខ្ពស់ ពិសេសកងកម្លាំងនគរបាលយើងមានទឹកចិត្ដក្លាហាន មានបទពិសោធន៍ និងមានមេបញ្ជាការដ៏ចំណានៗ ។
លោក ហ៊ឹម ឆែម បានសំដែងនូវការកោតសរសើរចំពោះវីរភាពដ៏អង់អាចក្លាហានរបស់ កងកម្លាំងនគរបាលការពារព្រំដែនទាំងអស់ដែលបានលះបង់កម្លាំងកាយចិត្ដតស៊ូស្វិតស្វាញឈរជើងការពារបូរណភាពទឹកដី។ ដោយផ្សារភ្ជាប់សមរភូមិមុខនិងសមរភូមិក្រោយ បុគ្គលិក មន្ដ្រីរាជការ ក្រសួងវប្បធម៌ និងវិចិត្រសិល្បៈតែងតែបានគិតគូរ និងយកចិត្ដទុកដាក់ស្វែងរកជំនួយផ្សេងៗជួយឧបត្ថម្ភដល់សមរភូមិជាបន្ដបន្ទាប់ ។
នៅថ្ងៃដដែលនោះដែរ លោករដ្ឋមន្ត្រី ហ៊ឹម ឆែម ក៏បានចុះសួរសុខទុក្ខ នាយ-នាយរងនគរបាល និងពលនគរបាលក្នុងអង្គភាព៩០៥ស្រុកអន្លង់វែង ខេត្តឧត្ដរមានជ័យ និងនាំយកអំណោយផ្តល់ជូន រួមមាន អង្ករ៦០បាវ មីយើង១៥០កេស ត្រីខ៦កេសធំ ទឹកត្រី៧៥យួរ ទឹកស៊ីអ៊ីវ៧៥យួរ ។ ជាមួយនេះឧបត្ថម្ភដល់ពលនគរបាលចំនួន១៦១នាក់ ម្នាក់ៗទទួលបានថវិកា២ម៉ឺនរៀល និងឧបត្ថម្ភដល់អង្គភាព កងវរៈការពារព្រំដែនគោកលេខ៩០៥ ចំនួន៣លានរៀលផងដែរ ៕
ចែករំលែកព័តមាននេះ