ខេត្តស្វាយរៀង ៖ នៅព្រឹកថ្ងៃទី១៦ វិច្ឆិកា ក្នុងបរិវេណវត្តកោះជុំ មានរៀបចំពិធីចែកអំណោយសង្គ្រោះជូនដល់ប្រជាពលរដ្ឋ ដែលរងគ្រោះដោយទឹកជំនន់ចំនួន១.៣៥៨គ្រួសារ នៅក្រុងស្វាយរៀង និងស្រុកស្វាយជ្រំ។ ពិធីនេះប្រព្រឹត្តទៅក្រោមអធិបតីភាពលោកជៀង អំ អភិបាលខេត្ត និងជាប្រធានកិត្តិយសកាកបាទក្រហមកម្ពុជាខេត្តស្វាយរៀង លោកឧកញ៉ាម៉ែន វិបុល អភិបាលរងខេត្ត ព្រមទាំងមានការអញ្ជើញចូលរួមពីគណៈអភិបាលស្រុក ក្រុមប្រឹក្សាឃុំ មេភូមិ ប្រធានមន្ទីរនានាជុំវិញខេត្ត និងមន្ត្រីកាកបាទក្រហមកម្ពុជាសាខាខេត្តមួយចំនួន។
ប្រជាពលរដ្ឋរងគ្រោះដោយទឹកជំនន់បានទទួលអំណោយនាឱកាសនោះមានចំនួន១.៣៥៨គ្រួសារ ក្នុងនោះមកពីក្រុងស្វាយរៀងចំនួន៩២៣គ្រួសារ និងមកពីស្រុកស្វាយជ្រំចំនួន៤៣៥គ្រួសារ ដែលក្នុង១គ្រួសារទទួលបានអង្ករ២៥គីឡូក្រាម ត្រីខចំនួន១០កំប៉ុង គ្រាប់ពូជបន្លែ១កញ្ចក់ សារុង១ ភួយ១ មុង១។ ដោយឡែកប្រជាពលរដ្ឋដែលរលំផ្ទះចំនួន៤គ្រួសារ នៅក្រុងស្វាយរៀងបានទទួលអំណោយបន្ថែមពីសម្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជានូវថវិកាចំនួន៥០ម៉ឺនរៀល និងអង្ករ៥០គីឡូក្រាម ពីកាកបាទក្រហមសាខាខេត្ត តង់កៅស៊ូ១ កន្ទេលជ័រ១ ធុងជ័រសម្រាប់ដាក់ទឹក១ ឆ្នាំងបាយ១ និងឆ្នាំងសម្ល១។
មានប្រសាសន៍សំណេះសំណាលនាឱកាសនោះលោកជៀង អំ បាននាំមកនូវការផ្តាំផ្ញើសាកសួរសុខទុក្ខពីសម្តេចអគ្គមហាសេនាបតីតេជោហ៊ុន សែន និងលោកជំទាវកិត្តិព្រឹទ្ធបណ្ឌិតប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ជូនចំពោះគ្រួសារជនរងគ្រោះទាំងអស់ដោយក្តីនឹករលឹក។ ជាមួយគ្នានេះ លោកជៀង អំ ក៏បានផ្តែផ្តាំដល់ប្រជាពលរដ្ឋឱ្យគិតគូរអំពីអនាម័យសុខភាពដោយផ្តោតលើការហូបចុក ស្អាត រស់នៅស្អាត និងសំណូមពរដល់ប្រជាពលរដ្ឋទាំងអស់ឱ្យរួសរាន់រៀបចំស្រូវពូជ ដើម្បីត្រៀមបង្កបង្កើនផលឱ្យទាន់រដូវកាល ដើម្បីស្តារជីវភាពគ្រួសារឱ្យបានប្រសើរឡើងវិញ៕
ចែករំលែកព័តមាននេះ