ខេត្តបាត់ដំបង ៖ កិច្ចប្រជុំពិភាក្សាស្តីពីផលប៉ះពាល់ដោយសារទឹកជំនន់របស់សាខាកាកបាទក្រហមកម្ពុជាខេត្តបាត់ដំបងបានធ្វើឡើងនៅព្រឹកទ១៦ខែវិច្ឆិកាឆ្នាំ២០១១ក្នុងសាលប្រជុំសាខាកាកបាទក្រហមកម្ពុជាខេត្ត
បាត់ដំបង ក្រោមអធិបតីភាពលោកបណ្ឌិតប៊ុត គឹមស៊ាន សមាជិកក្រុមប្រឹក្សាខេត្ត និងជាប្រធានគណៈកម្មាធិការសាខាកាកបាទក្រហមខេត្តបាត់ដំបង លោកផាន់ សុភាព ប្រធានគណៈកម្មាធិការសាខាកាកបាទក្រហមខេត្តបាត់ដំបង ព្រះវិសុទ្ធិវង្ស អ៊ុក មុត ព្រះរាជាគណៈថ្នាក់កិត្តិយស និងជាព្រះមេគណខេត្ត លោកប៉ោ ប្រង់ ប្រធានលេខាធិការដ្ឋានគ្រប់គ្រងគ្រោះមហន្តរាយ ព្រមទាំងមន្ត្រីអង្គការសង្គមស៊ីវិលក្នុងនិងក្រៅរដ្ឋាភិបាល និងអភិបាលស្រុកទាំង៤មានភូមិសាស្ត្រជាប់បឹងទន្លេសាប ហើយទទួលរងគ្រោះដោយទឹកជំនន់មានស្រុកថ្មគោលស្រុកឯកភ្នំ ស្រុកសង្កែ និងស្រុកមោងប្ញស្សីចូលរួមសរុបប្រមាណ៥០នាក់ ដើម្បីស្រង់ស្ថិតិបន្ថែមទៀតក្នុងការជួយសង្គ្រោះជាបន្ត ខណៈទឹកដែលមិនទាន់ហូរស្រកទៅអស់នោះ។
លោកកង ប៊ន នាយកសាខាកាកបាទក្រហមខេត្តបានរាយការណ៍អំពីសកម្មភាពជួយផលប៉ះពាល់ និងការងារសង្គ្រោះកន្លងមកតាំងពីខែកញ្ញាដល់ខែវិច្ឆិកាឆ្នាំ២០១១ មានស្រុកចំនួន៤ និង២១ឃុំ ដែលមានការប៉ះពាល់រងគ្រោះធ្ងន់ធ្ងរច្រើនជាងគេក្នុងខេត្តបាត់ដំបងព្រោះជាស្រុកជាប់បឹងទន្លេសាបបានជួយសង្គ្រោះជាក់ស្តែងគ្មានគម្រោង ឬត្រៀមអ្វីទុកជាមុនឡើយ ព្រោះទឹកឡើងលឿនពេកប៉ាន់ស្មានមិនត្រូវក្នុងនោះការសង្គ្រោះបន្ទាន់របស់កាកបាទក្រហមខេត្តជាមួយគណៈកម្មការគ្រប់គ្រងគ្រោះមហន្តរាយខេត្តចុះជួយបានចំនួន៣៥លើកស្មើនឹង៨២៧២គ្រួសារមនុស្សរាយចំនួន៣៤.៥១៤នាក់សរុបជាទឹកប្រាក់ប្រមាណ៩៧.៦៨១ដុល្លារអាមេរិកដែលមានអង្ករចំនួន៥៣.៧៣០តោន មុងចំនួន១. ១៣១មុង ភួយ២.៣៤២ ក្រមា៥.៧៣៥ សារុង១.៤៩៥ ត្រីខ៨.៦៧០កំប៉ុង មី៨៦ ៥៧០កញ្ចប់ កំណាត់ស២៥៥ដុំ សាប៊ូដុំ៣ ៦៨៥ដុំ សាប៊ូកញ្ចប់២.៣៤២កញ្ចប់ ទឹកស៊ីអីុវ៥ ៣៧៨យួរ ជំរំតង់អំពីដែកទីប៣សម្រាប់ ជំរំតង់អំពីសំពត់ចំនួន៣០ ថវិកាសង្គ្រោះ១៧៧៣ដុល្លារ ថវិកាបេសកកម្មហូបចុក១.៧៥០ដុល្លារ ដឹកជញ្ជូន៩០៤ដុល្លារ ប្រេងឥន្ធនៈ៣.៥៨៣ដុល្លារ ឧបត្ថម្ភផ្សេងៗ ២.១០៤ដុល្លារ ក្នុងនោះឃីតអំណោយកាកបាទក្រហមកម្ពុជាចំនួន៣ ២៨៩ឃីតរួមមានមុង ភួយ សំពត់ស មី ត្រីខ សាប៊ូកញ្ចប់ អង្ករ សំពត់តង់ ជំរំតង់ (ដោយមិនគិតបញ្ចូលថវិកានិងអង្កររបស់រាជរដ្ឋាភិបាលទេ) សម្ភារផ្ទះបាយអំណោយពីសាលាគណខេត្តមួយចំនួន ។
លោកឡុង សោម អភិបាលស្រុកមោងប្ញស្សីបញ្ជាក់អំពីផលប៉ះពាល់រងគ្រោះខ្លាំងដោយទឹកជំនន់មានដីស្រែចំនួន២៧.៥៤៥ហិកតា ហើយខូចខាតទាំងស្រុងចំនួន១៦.៨៩៥ហិកតា រួមសហការសង្គ្រោះជាមួយអង្គការសង្គមស៊ីវិលចំនួន២២លើកបានចំនួន៥៤១៤គ្រួសារ។
លោកសួន សាវេត អភិបាលស្រុកសង្កែបញ្ជាក់ថា មានឃុំចំនួន៥ជាប់បឹងទន្លេសាបប៉ះពាល់ធ្ងន់ជាងគេធ្វើឱ្យខូចខាតផ្ទះសម្បែងចំនួន៤០២៧ខ្នង ប្រជាជនរងគ្រោះ៣.៤៨៤គ្រួសារ និងមាន១០នាក់ស្លាប់ដោយសារទឹកជំនន់ ខូចស្រូវទាំងស្រុង១១.២៨០ហិកតា ផ្លូវលំ៤២ខ្សែ ស្មើនឹង១៥៩គីឡូម៉ែត្រ សាលារៀនខូចខាតប្រេះស្រាំបាក់ស្រុតចំនួន១២សាលាមាន២១ខ្នងស្មើ៨៣បន្ទប់ ។
លោកសំ ណេង អភិបាលស្រុកថ្មគោលបញ្ជាក់ថា ប៉ះពាល់ធ្ងន់ជាងគេមាន៥ឃុំក្នុងចំណោម១០ឃុំប៉ែកខាងទន្លេសាបខូចខាតផ្ទះចំនួន២៤៨០ខ្នង សាលា៧ខ្នង ដីស្រែខូចស្រូវ១២០១៣ហិកតា ផ្លូវលំ២៦.៨៩៧គីឡូម៉ែត្រ មនុស្សស្លាប់ម្នាក់ ហើយជួយសង្គ្រោះបាន២២លើក ដែលមានប្រតិភូសង្ឃចុះជួយច្រើនជាគេ។
លោកមៀច សុមន៍ អភិបាលស្រុកឯកភ្នំ បញ្ជាក់ថា ភាគច្រើនទឹកស្ទឹងសង្កែធ្លាក់ពីលើ និងទឹកទន្លេសាបឡើងមកផ្ទប់គ្នាធ្វើឱ្យមានការត្រាំត្រែងយូរបណ្តាលឱ្យមានស្លាប់១០នាក់ក្នុង
នោះ (លង់ទឹក៩នាក់ ពស់ចឹកម្នាក់) ខូចស្រូវស្រែ៨៨៧៨ហិកតា ក្នុងនោះកំពុងស្តារស្រូវបណ្តេញទឹកចំនួន៩៧៨ហិកតា ហើយកំពុងត្រូវការស្រូវពូជ១១៧តោន សម្រាប់តាមទឹកសម្រកមានស្លាប់៤នាក់ដោយលង់ទឹកជួយសង្គ្រោះ៩២៨៨គ្រួសារដោយរួមសហការពីអង្គការសង្គមស៊ីវិលក្នុងក្រៅប្រទេសចុះជួយសង្គ្រោះតាមជាក់ស្តែង។
ព្រះវិសុទ្ធិវង្ស អ៊ុក មុត ព្រះរាជាគណៈថ្នាក់កិត្តិយសនិងជាព្រះមេគណខេត្តមានសង្ឃដីកាថា ពេលឃើញការលំបាករបស់ពុទ្ធបរិស័ទដូច្នោះត្រូវតែមករកជំនួយជាបន្ទាន់ដែលអាចធ្វើទៅ
បានគឺមានអីយកហ្នឹងទៅជួយសិនព្រោះឃើញមានសព្វគ្រប់រឿងហេតុ ដូចជាមានសត្វគោទៅនៅលើរទេះទៅវិញ ព្រោះគ្មានដីគោក ហើយអ្វីដែលលំបាកនោះគឺជនពិការត្រូវជួយមុនគេដែលមាននៅស្រុកថ្មគោលឃើញជួបការលំបាករងគ្រោះច្រើនជាងគេ។
លោកបណ្ឌិតប៊ុត គឹមស៊ានបញ្ជាក់ថា យើងគ្រប់ៗគ្នាប៉ាន់ប្រមាណទឹកឆ្នាំ២០១១នេះ មិនត្រូវសោះពីដំបូងថាតិចជាងឆ្នាំ២០០០ តែដល់ពេលទឹកស្រកយឺត ទើបដឹងថា វាធ្ងន់ធ្ងរជាងឆ្នាំ២០០០ទៅទៀត ហើយពេលនេះយើងកំពុងប្រឈមមុខប្រជាជនចំនួនជាង១០០គ្រួសារទៀតដែលរត់មកឡើងគោកហើយទឹកមិនទាន់ស្រកទៅវិញអស់នៅកន្លែងដែលគាត់រស់នៅមាត់ទន្លេសាប និងត្រូវត្រៀមថវិកាមួយចំនួនទៀតសម្រាប់ស្តារក្សាអនាម័យដូចជាអណ្តូងទឹក ស្រះទឹកនិងផ្នែកផ្សេងៗនាំឱ្យប៉ះពាល់សុខុមាលភាពនៃការរស់នៅរបស់គាត់បន្ទាប់ពីទឹកស្រកទៅវិញនោះ៕
ចែករំលែកព័តមាននេះ