ខេត្តកណ្តាល ៖ ក្រៅពីជីវិតដែលរស់នៅក្នុងស្ថានភាពជាស្ត្រីមេម៉ាយដោយប្តីស្លាប់ ស្ត្រីឈ្មោះម៉ិញ សំ បានរៀបរាប់ពីទុក្ខសោកនៃជីវភាពរស់នៅក្រលំបាក ខ្វះមុខខ្វះក្រោយ ហើយសូម្បីតែជម្រក ក៏ត្រូវសំពះសុំសំយាបផ្ទះគេជ្រកជាមួយកូនកម្សត់ទាំង៤នាក់ ដែលអាចនឹងប្រឈមនូវអនាគតដ៏លំបាកដូចជារូបគាត់នាពេលបច្ចុប្បន្ននេះដែរ។
ក្នុងវ័យ៣៣ឆ្នាំ បច្ចុប្បន្នស្ត្រីឈ្មោះម៉ិញ សំ រស់នៅក្នុងភូមិព្រែកតានប់ ឃុំកំពង់ស្វាយ ស្រុកកៀនស្វាយ ខេត្តកណ្តាល ។ គាត់បានរៀបរាប់ពីជីវិតដ៏កម្សត់ទាំងទឹកភ្នែកថា ចាប់តាំងពីរៀបការជាមួយប្តីរហូតបានកូន៤នាក់ (ប្រុស៣ ស្រី១) ជីវិតគ្រួសារគាត់មិនដែលស្គាល់នូវអ្វីទៅដែលហៅថា ភាពគ្រប់គ្រាន់សម្រាប់រស់ អ្វីទៅជាក្តីសប្បាយ ឬរកឃើញពន្លឺសម្រាប់អនាគតកូនៗឡើយ គឺស្គាល់តែភាពក្រលំបាក តោកយ៉ាក រកជម្រកគ្មានតែប៉ុណ្ណោះ ។ ប៉ុន្តែអ្វីទាំងអស់នោះមិនមែនមកពីភាពស្ពឹកស្រពន់ខ្ជិលច្រអូស ឬការប្រព្រឹត្តអំពើមិនគប្បីដែលសង្គមស្អប់ខ្ពើមនោះទេ តែគាត់គិតថា វាជាព្រហ្មលិខិតសម្រាប់គ្រួសារគាត់តែម្តង។
ស្ត្រីមេម៉ាយដ៏កម្សត់រូបនេះបានបន្តថា ទន្ទឹមនឹងជីវភាពក្រលំបាករកព្រឹកខ្វះល្ងាច រកល្ងាចខ្វះព្រឹក គ្មានជម្រកស្នាក់នៅហើយនោះ ថ្មីៗនេះប្តីរបស់គាត់ បានជួបគ្រោះថ្នាក់ខ្សែភ្លើងឆក់រហូតបាត់បង់ជីវិត ក្នុងពេលទៅចាប់ចង្រិត ដើម្បីលក់យកលុយមកផ្គត់ផ្គង់គ្រួសារ។ គាត់និយាយថា ចាប់តាំងពីប្តីស្លាប់ទៅរូបគាត់ហាក់ដូចជាស្លាប់ទាំងរស់ដូច្នេះដែរ ព្រោះជីវភាពសព្វថ្ងៃនេះ គឺពឹងផ្អែកលើកម្លាំងប្តីទាំងស្រុង ដោយសារគាត់មានជំងឺប្រចាំកាយ ហើយត្រូវនៅមើលថែរក្សាកូនៗទាំង៤នាក់។ ដូច្នេះជីវិតរបស់គាត់មិនខុសពីនាងបដាចារឡើយ ក្នុងពេលដែលគ្មានទីជម្រក ជីវភាពក្រលំបាក ហើយប្តីស្លាប់ចោលទៀត តើស្ត្រីឯណាទៅដែលស៊ូទ្រាំនឹងជីវិតបែបនេះបាន។
ស្ត្រីរូបនេះបាននិយាយថា ក្រៅពីសុំផ្ទះគេដើម្បីជាជម្រកដល់កូនៗទាំង៤នាក់នោះ ជីវភាពគ្រួសារគាត់ក៏ត្រូវពឹងផ្អែកលើបងប្អូនជិតខាងរួមទាំងអាជ្ញាធរដែនដីផងដែរ ។ ចំណែកកូនៗដែលធ្លាប់ទទួលបានការរៀនសូត្របន្តិចបន្តួចក៏ត្រូវឈប់ដើម្បីមកជួយរកលុយទិញអង្ករហូបប្រចាំថ្ងៃ។
ស្ត្រីមេម៉ាយ និងជាម្តាយដ៏កម្សត់រូបនេះបានលើកដៃសំពះសុំអស់លោកសប្បុរសជនដែលមានចិត្តអាណិតអាសូរ និងជួយយកអាសាដល់ជនក្រីក្រដូចរូបគាត់នេះ មេត្តាជួយដល់រូបគាត់ និងកូនៗរបស់គាត់ទាំង៤នាក់ ដោយសទ្ធាជ្រះថ្លាផង ហើយអ្វីដែលជាអំណោយរបស់សប្បុរសជននោះគឺជាគុណូបក្ការៈ ដែលរូបគាត់ និងកូនៗមិនអាចបំភ្លេចបានឡើយ។
តាមពិនិត្យជាក់ស្តែង គឺស្ត្រីមេម៉ាយរូូបនេះនិងកូនៗទាំង៤នាក់ពិតជាក្រលំបាកប្រាកដមែន ហើយក្រៅពីជីវភាពដ៏សែនវេទនានោះគឺសព្វថ្ងៃគ្មានជម្រកស្នាក់នៅទៀត ដែលការរស់នៅសព្វថ្ងៃគឺផ្អែកលើសំយាបផ្ទះគេតែប៉ុណ្ណោះ ៕
ចែករំលែកព័តមាននេះ