ឧដុង្គ ខេត្តកណ្តាល ថ្ងៃទី១៥ ខែវិច្ឆិកា ឆ្នាំ២០១១ ៖ ថ្ងៃនេះមានអ្នកស្ម័គ្រចិត្តចំនួន៣០០នាក់មកពីគ្រប់ទិសទីលើពិភពលោកបានចាប់ផ្តើមសាងសង់ផ្ទះចំនួន២២ខ្នង ដែលនេះជាផ្នែកមួយនៃគម្រោង Khmer Harvest Build របស់អង្គការលំនៅឋានមនុស្សជាតិកម្ពុជា។ការសាងសង់រយៈពេលពេញមួយសប្តាហ៍នៅក្នុងស្រុកឧដុង្គ ខេត្តកណ្តាល រួមមានអ្នកស្ម័គ្រធ្វើការជាមួយនឹងគ្រួសារដែលផ្លាស់ទីលំនៅពីស្ទឹងមានជ័យដែលជាតំបន់គំនរសំរាមមួយនៅក្នុងទីក្រុងភ្នំពេញ។
ញឹម ភី ជាម្ចាស់ផ្ទះម្នាក់ដែលទទួលបានផ្ទះពីអង្គការ Habitat ហើយចូលរួមនៅក្នុងគម្រោង Khmer Harvest Build បាននិយាយថា «នៅពេលដែលខ្ញុំមានផ្ទះផ្ទាល់ខ្លួន វានឹងជាកន្លែងមានផាសុកភាព ដោយមានខ្យល់អាកាសបរិសុទ្ធ និងមានបរិស្ថានដែលផ្តល់សុខភាពល្អ។ ខ្ញុំចង់ឱ្យកូនរបស់ខ្ញុំមានអនាគតល្អ»។
ផ្ទះចំនួន២២ខ្នងដែលបានសាងសង់ក្នុងសប្តាហ៍នេះនឹងបង្គ្រប់បង្ហើយផ្ទះនៅក្នុងសហគមន៍ចំនួន៥០គ្រួសារ ស្ថិតលើដីចំនួន៨.០០០ម៉ែត្រការ៉េ ដែលពួកគេបានដាក់ឈ្មោះឱ្យថា «សមធម៌ថ្មីនៃក្តីសង្ឃឹម»ក្នុងស្រុកឧដុង្គ។ អង្គការលំនៅឋានមនុស្សជាតិក៏បានធ្វើការជាមួយសមាជិកសហគមន៍ផងដែរដើម្បីបង្កើតមជ្ឈមណ្ឌលសហគមន៍ប្រើប្រាស់សម្រាប់កិច្ចប្រជុំ ជាថ្នាក់រៀន និងក្រុមគ្លីនិកពិនិត្យសុខភាពចល័ត។
លោកស្រី Bernadette Bolo-Duthy នាយិកាប្រចាំប្រទេសរបស់អង្គការលំនៅឋានមនុស្សជាតិកម្ពុជាមានប្រសាសន៍ថា «បន្ទាប់ពីសប្តាហ៍នេះទៅគ្រួសារចំនួន២២នឹងសម្រេចនូវក្តីសុបិនមានលំនៅឋានសុវត្ថិភាព និងសមរម្យដែលហៅថាផ្ទះ។ គោលបំណងរបស់អង្គការលំនៅឋានមនុស្សជាតិកម្ពុជាគឺដើម្បីកាត់បន្ថយភាពក្រីក្រតាមរយៈការលើកកម្ពស់សហគមន៍ដើម្បីធ្វើឱ្យពួកគេទទួលបាននូវការរស់នៅកាន់តែប្រសើរឡើង។ សូមអរគុណចំពោះការខិតខំធ្វើការរបស់អ្នកស្ម័គ្រចិត្ត និងគ្រួសារម្ចាស់ផ្ទះទាំងអស់ក្នុងអំឡុងពេល Khmer Harvest Build។ យើងឈានមួយជំហានទៀតកាន់តែកៀកនឹងគោលបំណងរបស់យើងហើយ»។
គ្រួសារនីមួយៗនឹងមានដីផ្ទាល់ខ្លួនសម្រាប់សាងសង់ផ្ទះ។ ផ្ទះនីមួយៗនឹងមានហេដ្ឋារចនាសម្ព័ន្ធអនាម័យ រួមមានប្រព័ន្ធទឹកស្អាត ធុងស្តុកទឹកភ្លៀង និងបន្ទះអគ្គិសនីដើរដោយថាមពលព្រះអាទិត្យ។ ក្នុងការរក្សានូវទស្សនៈរបស់អង្គការ Habitat ជំរុញឱ្យប្រជាជនចេះជួយខ្លួនឯង ម្ចាស់ផ្ទះនីមួយៗទទួលបាននូវកម្ចីដោយគ្មានការប្រាក់ដើម្បីប្រើប្រាស់លើការសាងសង់ផ្ទះរបស់ពួកគេដែលពួកគេនឹងសងមកវិញក្នុងរយៈពេលពីរបីឆ្នាំក្រោយមក។
កន្លែងផលិតឥដ្ឋដែលប្រើប្រាស់សម្រាប់សាងសង់ផ្ទះមានទីតាំងនៅក្នុងសហគមន៍សមធម៌ថ្មីនៃក្តីសង្ឃឹម។ ឥដ្ឋនេះផលិតពីដី ដីខ្សាច់ និងស៊ីម៉ង់ត៍ ហើយអាចប្រើជំនួសឥដ្ឋធ្វើអំពីដីឥដ្ឋ ដែលប្រើប្រាស់ជាទូទៅក្នុងការសាសង់អគារនៅក្នុងប្រទេសកម្ពុជា ពីព្រោះវាមិនត្រូវការដុតឈើ ឬក៏ធ្យូងថ្មក្នុងដំណើរការផលិតកម្មនោះទេ។ ការផលិតដុំឥដ្ឋនេះមិនត្រូវការបញ្ចេញឧស្ម័នផ្ទះកញ្ចក់ រួមមានការបំផ្លាញព្រៃឈើ ឬបរិស្ថានផ្សេងទៀត និងធ្វើឱ្យសំណង់មានភាពត្រជាក់ស្រួល។
សហគមន៍សមធម៌ថ្មីនៃក្តីសង្ឃឹមមានទីតាំងនៅជិតកសិដ្ឋានទំហំពីរហិកតា ហើយសមាជិកសហគមន៍ នឹងទទួលបានការបណ្តុះបណ្តាលផ្នែកកសិកម្ម និងការគ្រប់គ្រងដោយមានបំណងផ្ទេរការគ្រប់គ្រងកសិដ្ឋាននេះទៅឱ្យសហគមន៍ក្នុងរយៈពេលបីឆ្នាំទៀត។
អ្នកស្ម័គ្រចិត្តអន្តរជាតិទាំងអស់ដែលចូលរួមក្នុងគម្រោង Khmer Harvest Build បានរៃអង្គាសប្រាក់ និងបង្កើនការយល់ដឹងពីបញ្ហាផ្ទះសម្បែងនៅក្នុងប្រទេសកំណើតរបស់ពួកគេក្នុងការគាំទ្រដល់អង្គការលំនៅឋានមនុស្សជាតិកម្ពុជា និងកម្មវិធីការអភិវឌ្ឍលំនៅឋាន និងសហគមន៍។ គម្រោង Khmer Harvest Build នឹងបន្តការងារដែលបានចាប់ផ្តើមក្នុងអំឡុងគម្រោងការងារ Jimmy និង Rosalyn Carter ឆ្នាំ២០០៩ នៅពេលដែលផ្ទះចំនួន២១ខ្នងនៅក្នុងស្រុកឧដុង្គត្រូវបានសាងសង់ក្នុងរយៈពេល៥ថ្ងៃសម្រាប់គ្រួសារដែលផ្លាស់ទីលំនៅពីតំបន់គំនរសំរាមតែមួយ ៕
ចែករំលែកព័តមាននេះ