ខេត្តព្រៃវែង ៖ នាព្រឹកថ្ងៃទី១១ វិច្ឆិកា នៅក្នុងបរិវេណវត្តសេរីសាគរ ហៅវត្តបាទី ស្ថិតក្នុងឃុំពាមរក៍ ស្រុកពាមរក៍ មានរៀបចំពិធីចែកអំណោយសង្គ្រោះបន្ទាន់ជំហានទី២ របស់កាកបាទក្រហមកម្ពុជា ក្រោមអធិបតីភាពលោកញឹម វណ្ណដា ទេសរដ្ឋមន្ត្រី និងជាអនុប្រធានទី១ គណៈកម្មាធិការជាតិគ្រប់គ្រងគ្រោះមហន្តរាយ។ អញ្ជើញចូលរួមក្នុងពិធីនោះមាន លោកសុខ ឥសាន តំណាងរាស្ត្រមណ្ឌលព្រៃវែង លោកផាន់ ចាន់ធុល អភិបាលរងខេត្ត និងជាប្រធានគណៈកម្មាធិការសាខាកាកបាទក្រហមកម្ពុជាខេត្ត អភិបាល-អភិបាលរងស្រុកពាមរក៍ ព្រមទាំងមេឃុំ មេភូមិ ។
លោកសៅ ប្រសិដ្ឋ អភិបាលស្រុកពាមរក៍ បានឱ្យដឹងថា គ្រោះទឹកជំនន់ក្នុងស្រុកពាមរក៍ បណ្តាលឱ្យមានមនុស្សស្លាប់៧នាក់ និងខូចខាតផ្លូវថ្នល់អស់ជាច្រើនកន្លែង រួមនឹងផលដំណាំផ្សេងៗទៀតដូចជា ស្រូវ ពោត សណ្តែក ល្ង ផ្ទះសម្បែង គោក្របី ជ្រូក។ល។ លោកអភិបាលស្រុកក៏បានសម្តែងនូវការស្វាគមន៍លោកអនុប្រធានទី១ គណៈកម្មាធិការជាតិគ្រប់គ្រងគ្រោះមហន្តរាយដែលបាននាំយកអំណោយសង្គ្រោះបន្ទាន់របស់រាជរដ្ឋាភិបាលនៃព្រះរាជាណាចក្រកម្ពុជា និងរបស់កាកបាទក្រហមកម្ពុជា ចែកជូនដល់ប្រជាពលរដ្ឋរងគ្រោះដោយទឹកជំនន់នៅក្នុងស្រុកពាមរក៍ នាពេលនេះមានចំនួន១.២០០គ្រួសារ ។ ក្នុងនាមតំណាងឱ្យអាជ្ញាធរស្រុក និងប្រជាពលរដ្ឋ លោកសៅ ប្រសិដ្ឋ បានសម្តែងនូវអំណរគុណយា៉ងជ្រាលជ្រៅបំផុតចំពោះសម្តេចតេជោ និងលោកជំទាវកិត្តិព្រឹទ្ធបណ្ឌិត ព្រមទាំងលោកអនុប្រធានទី១ គណៈកម្មាធិការជាតិគ្រប់គ្រងគ្រោះមហន្តរាយ ដែលបានឆ្លៀតឱកាសដ៏មមាញឹកចុះមករួមចំណែកដោះទុក្ខលំបាករបស់បងប្អូនប្រជាពលរដ្ឋនាពេលនេះ ។
លោកផាន់ ចាន់ធុល មានប្រសាសន៍ថា កន្លងមកនៅជំហានទី១ សាខាកាកបាទក្រហមកម្ពុជាខេត្តព្រៃវែង បាននាំយកអំណោយអង្កររបស់រាជរដ្ឋាភិបាល និងអំណោយកាកបាទក្រហមកម្ពុជា រួមជាមួយអំណោយរបស់សប្បុរសជនទាំងក្នុងនិងក្រៅប្រទេស ទៅចែក ជូនបងប្អូនប្រជាពលរដ្ឋដែលរងគ្រោះដោយទឹកជំនន់នៅទូទាំងខេត្តបានជាង១ម៉ឺនគ្រួសារក្នុងចំណោមប្រជាពលរដ្ឋរងគ្រោះទូទាំងខេត្តជាង៧ម៉ឺនគ្រួសារ។ ឯជំហានទី២នេះ សាខាកាកបាទក្រហមកម្ពុជាខេត្តព្រៃវែងបន្តពុះពារគ្រប់ឧបសគ្គ ដើម្បីនាំយកអំណោយទៅចែកជូនបងប្អូនដែលរងគ្រោះដោយទឹកជំនន់នៅតាមបណ្តាស្រុកដែលរងគ្រោះ ។ គិតរហូតមកដល់ពេលនេះ អំណោយសង្គ្រោះបន្ទាន់របស់រាជរដ្ឋាភិបាលនិងរបស់កាកបាទក្រហមកម្ពុជារួមជាមួយអំណោយរបស់សប្បុរសជន បានជូនដល់ដៃបងប្អូនដែលរងគ្រោះបានជាង៥ម៉ឺនគ្រួសារហើយ ។ លោកអភិបាលរងខេត្តបានបន្តថា ទាំងរូបលោកក៏ដូចជាសាខាកាកបាទក្រហមកម្ពុជាខេត្តព្រៃវែងទាំងអស់ ត្រូវបន្តពុះពារគ្រប់ឧបសគ្គ ដើម្បីនាំយកអំណោយសង្គ្រោះបន្ទាន់នេះ ទៅចែកជូនបងប្អូនដែលរងគ្រោះដោយទឹកជំនន់នៅទូទាំងខេត្តឱ្យបានគ្រប់ៗគ្នា ។
លោកញឹម វណ្ណដា បានមានប្រសាសន៍សំណេះសំណាល និងកោតសរសើរអាជ្ញាធរដែនដី និងប្រធានគណៈកម្មាធិការសាខា អនុសាខា និងប្អូនៗយុវជនស្ម័គ្រចិត្ត ដែលបានខិតខំប្រឹងប្រែងគ្រប់បែបយ៉ាង ដើម្បីជួយដល់រាជរដ្ឋាភិបាលក៏ដូចជាជួយដល់បងប្អូនដែលរងគ្រោះ។ លោកបានពាំនាំនូវការផ្តាំផ្ញើសាកសួរសុខទុក្ខពីសំណាក់សម្តេចតេជោ និងលោកជំទាវកិត្តិព្រឹទ្ធបណ្ឌិតចំពោះបងប្អូនប្រជាពលរដ្ឋទាំងអស់។ លោកក៏បានផ្តាំផ្ញើផងដែរដល់មេភូមិ មេឃុំ ត្រូវចុះត្រួតពិនិត្យឱ្យបានត្រឹមត្រូវគ្រួសារដែលរងគ្រោះពិតប្រាកដ ហើយរាយការណ៍មកអាជ្ញាធរស្រុក-ខេត្តដើម្បីចាត់វិធានការចុះជួយសង្គ្រោះទាន់ពេលវេលា ហើយឱ្យបាន គ្រប់ៗក្រុមគ្រួសារដែលរងគ្រោះដោយទឹកជំនន់ ។ អំណោយដែលនាំយកទៅចែកជូននាឱកាសនោះ ក្នុងមួយគ្រួសារៗទទួលបានអង្ករ២៥គីឡូក្រាម មី១កេស ឃីត១កញ្ចប់ ត្រីខ១០កំប៉ុង និងសាប៊ូកក់សក់១យួរ ៕
ចែករំលែកព័តមាននេះ