រាជធានីភ្នំពេញ ៖ ដើម្បីចូលរួមចំណែកជាមួយកាកបាទក្រហមកម្ពុជា និងរាជរដ្ឋាភិបាលក្នុងការចុះជួយប្រជាពលរដ្ឋដែលរងគ្រោះដោយទឹកជំនន់នោះ មន្ទីរព្យាបាលធ្មេញបស្ចិមបានសម្រេចផ្តល់ថវិកាចំនួន១០លានរៀលជូនដល់កាកបាទក្រហមកម្ពុជាដែលពិធីប្រគល់ថវិកានេះបានធ្វើឡើងនៅទីស្នាក់ការកាកបាទក្រហមកម្ពុជាកាលពីថ្ងៃទី៧ វិច្ឆិកា កន្លងមក ដែលមានលោកចាប ឫទ្ធី ជាអគ្គនាយកមន្ទីរព្យាបាលធ្មេញបស្ចិមជាអ្នកប្រគល់ និងលោកជំទាវពុំ ច័ន្ទនី អគ្គលេខាធិការកាកបាទក្រហមកម្ពុជា ជាអ្នកទទួល។
ក្នុងជំនួបជាមួយលោកជំទាវពុំ ច័ន្ទនី អគ្គលេខាធិការកាកបាទក្រហមកម្ពុជា អមដំណើរដោយប្រតិភូជាសមាជិក-សមាជិកា នៅទីស្នាក់ការកណ្តាល លោកចាប ឫទ្ធី ក្រុមប្រឹក្សាភិបាលនៃមន្ទីរព្យាបាលធ្មេញបស្ចិមបានជម្រាបជូនទៅលោកជំទាវអគ្គលេខាធិការថា ទោះបីជាបច្ចុប្បន្នស្ថានភាពទឹកជំនន់មានសភាពធូរស្រាល និងស្រកចុះជាបណ្តើរៗក្តី ប៉ុន្តែជនរងគ្រោះនៅតែត្រូវការជំនួយជាបន្ត។ ដូូចនេះដើម្បីចូលរួមចំណែកជាមួយរាជរដ្ឋាភិបាលកម្ពុជា ក៏ដូចជាកាកបាទក្រហមកម្ពុជា ក្នុងការជួយស្តារនូវកម្រិតជីវភាពរបស់ប្រជាពលរដ្ឋកម្ពុជា មន្ទីរព្យាបាលធ្មេញបស្ចិម បានរៀបចំកម្មវិធីប្រមូលថវិកា ដោយថវិកាទាំងនេះគឺបានមកពីការរៀបចំកម្មវិធីមនុស្សធម៌ថ្ងៃទី៣០ តុលា កន្លងទៅដោយប្រមូលថវិកាទាំងអស់ពីចំណូលនៃការព្យាបាល។
ថវិកាមួយផ្នែកទៀតបានទទួលពីសប្បុរសជនមួយចំនួនដែលជាអតិថិជនរបស់មន្ទីរព្យាបាលធ្មេញបស្ចិម។ លើសពីនោះ ក៏មានការចូលរួមពីបុគ្គលិកទាំងអស់របស់មន្ទីរព្យាបាលធ្មេញបស្ចិមផងដែរ។ លោកបានបន្តថា មន្ទីរព្យាបាលធ្មេញបស្ចិម ដែលបច្ចុប្បន្នមាន៤សាខា ដែល៣សាខានៅភ្នំពេញ និង១សាខានៅខេត្តសៀមរាប និងមានគម្រោងពង្រីកទីតាំងរបស់ខ្លួនបន្ថែមទៀត នៅតាមបណ្តាខេត្តមួយចំនួន ដើម្បីចូលរួមលើកកម្ពស់សុខភាពមាត់ធ្មេញជូនប្រជាពលរដ្ឋកម្ពុជា។ មន្ទីរព្យាបាលធ្មេញសន្យាថា នឹងបន្តជួយគាំទ្រដល់សកម្មភាពមនុស្សធម៌ របស់កាកបាទក្រហមកម្ពុជាទៀត នៅពេលខាងមុខ។
ក្នុងពិធីទទួលថវិកានេះដែរ លោកជំទាវអគ្គលេខាធិការពុំ ច័ន្ទនី បានលើកឡើងថា ការចូលរួមចំណែកពីមន្ទីរព្យាបាលធ្មេញបស្ចិមជាស្ថាប័នឯកជន គឺជាទឹកចិត្ត និងសកម្មភាពដ៏ប្រពៃដែលបានឆ្លុះបញ្ចាំងពីសច្ចភាពនៃវប្បធម៌ជួយគ្នាក្នុងគ្រាមានអាសន្ន និងបង្ហាញពីការរួមកម្លាំងគ្នាក្នុងប្រជាជាតិខ្មែរតែមួយ។ លោកជំទាវមានប្រសាសន៍បន្តថា អំណោយដែលទទួលបាននាពេលនេះកាកបាទក្រហមកម្ពុជា នឹងយកទៅចាត់ចែង និងប្រគល់ជូនដល់ដៃក្រុមគ្រួសាររងគ្រោះដោយទឹកជំនន់នាពេលខាងមុខនេះ។
ក្នុងឱកាសនោះដោយមើលឃើញពីការខិតខំប្រឹងប្រែង និងការលះបង់ទាំងកម្លាំងកាយចិត្តរបស់យុវជនស្ម័គ្រចិត្ត កាកបាទក្រហមកម្ពុជាក្នុងសកម្មភាពសង្គម មន្ទីរព្យាបាលធ្មេញបស្ចិមក៏បានផ្តល់ជូនការពិនិត្យពិគ្រោះជំងឺ និងសំអាតមាត់ធ្មេញដោយឥតគិតថ្លៃដល់យុវជនស្ម័គ្រចិត្តកាកបាទក្រហមកម្ពុជាចំនួន២០០នាក់ ដែលគិតជាទឹកប្រាក់ចំនួន៤.០០០ដុល្លារអាមេរិកផងដែរ៕
ចែករំលែកព័តមាននេះ