ខេត្តបន្ទាយមានជ័យ ៖ ក្មេងទំនើង១ក្រុម មានគ្នា៨នាក់ ដែលធ្វើសកម្មភាពស្ទាក់វាយក្រុមមួយទៀតមានគ្នាចំនួន៣នាក់ បានត្រូវកម្លាំងនគរបាលក្រុងសិរីសោភ័ណចាប់ឃាត់ខ្លួនបាន៦នាក់នាំយកមកអធិការដ្ឋាននគរបាលក្រុង ដើម្បីចាត់ការតាមផ្លូវច្បាប់ ឯ២នាក់ទៀតរត់គេចខ្លួនបាត់។ ការចាប់ឃាត់ខ្លួននេះបានធ្វើឡើងកាលពីវេលាម៉ោង៤និង៤៥នាទីរសៀលថ្ងៃទី៦ វិច្ឆិកា ឆ្នាំ២០១១ នៅចំណុចព្រំប្រទល់រវាងភូមិប្រាសាទ ឃុំស្លក្រាម ស្រុកស្វាយចេក និងភូមិគោកលៀប សង្កាត់ម្កាក់ ក្រុងសិរីសោភ័ណ ។
លោកវរសេនីយ៍ត្រីរ៉ែម វីរៈ អធិការនគរបាលក្រុងសិរីសោភ័ណថ្លែងថា នៅវេលាម៉ោង២ និង៣០នាទីរសៀលថ្ងៃទី៦ វិច្ឆិកា ក្រោយពីទទួលបានព័ត៌មានពីប្រជាពលរដ្ឋរាយការណ៍មកសមត្ថកិច្ចថា មានក្រុមក្មេងទំនើងប្រដាប់ដោយដំបងឈើ និងកាំបិត មានគ្នា៨នាក់ធ្វើសកម្មភាពវាយទៅលើក្រុមម្ខាងទៀតមានគ្នា៣នាក់បណ្តាលឱ្យមានអ្នករបួស លោកក៏បានចាត់កម្លាំងជំនាញ និងកម្លាំងនគរបាលប៉ុស្តិ៍សង្កាត់ម្កាក់ចុះបង្រ្កាបដេញចាប់បាន៦នាក់។ ជនទាំង៦នាក់នេះ មាន១-ឈ្មោះម៉ឺយ មាស ភេទប្រុស អាយុ១៩ឆ្នាំ ២-ឈ្មោះយន់ សីលា ភេទប្រុស អាយុ១៩ឆ្នាំ ៣-ឈ្មោះសុខ ដា ភេទប្រុស អាយុ១៩ឆ្នាំ ៤-ឈ្មោះជា ភិន ភេទប្រុសអាយុ១៨ឆ្នាំ អ្នកទាំង៤នាក់នេះមានទីលំនៅភូមិគោកលៀប សង្កាត់ម្កាក់ ក្រុងសិរីសោភ័ណ។ ៥-ឈ្មោះវ៉ៅ ខេមរៈ ភេទប្រុស អាយុ២០ឆ្នាំ ៦-ឈ្មោះវ៉ៃ សារ៉ន ភេទប្រុស អាយុ២១ឆ្នាំ ទាំង២នាក់ក្រោយនេះ មានទីលំនៅភូមិម្កាក់ សង្កាត់ម្កាក់ ក្រុងសិរីសោភ័ណ។
លោកអធិការនគរបាលក្រុងបន្តថា ក្នុងការបង្រ្កាបនេះកម្លាំងនគរបាលដកហូតបានដំបងចំនួន២កំណាត់ កាំបិតខ្វែវ១ និងម៉ូតូចំនួន៣គ្រឿង ។ ឯបក្សពួក២នាក់ទៀត ម្នាក់ឈ្មោះប៉ូលីស អាយុ២០ឆ្នាំ និងម្នាក់ទៀតឈ្មោះកេរ អាយុ១៩ឆ្នាំ នៅភូមិគោកលៀប សង្កាត់ម្កាក់ រត់គេខ្លួនបាត់ ។ ចំណែកខាងក្រុមរងគ្រោះមាន៣នាក់ គឺ១-ឈ្មោះហម តូ ភេទប្រុស អាយុ២៦ឆ្នាំ ២-ឈ្មោះស៊ុន ហើម ភេទប្រុស អាយុ១៩ឆ្នាំ ២នាក់នេះបែកក្បាល ៣-ឈ្មោះរ៉ាត់ ស៊ីយៀត ភេទប្រុស អាយុ១៩ឆ្នាំ ហើមជាំខ្លួន។ អ្នករងគ្រោះទាំង៣នាក់ មានទីលំនៅភូមិប្រាសាទ ឃុំស្លក្រាម ស្រុកស្វាយចេក ។
នៅចំពោះមុខសមត្ថកិច្ច ក្រុមក្មេងទំនើងទាំង៦នាក់ ដែលត្រូវចាប់ឃាត់ខ្លួនបានសារភាពថា ពួកគេត្រូវឈ្មោះប៉ូលីសនាំទៅស្ទាក់វាយពួកអ្នកទាំង៣នាក់មកពីភូមិប្រាសាទ ត្រង់ចំណុចដើមពោធិ៍ចុងភូមិតាម៉ា សង្កាត់ម្កាក់ ក្នុងខណៈពេលពួកគេនាំគ្នាទៅលេងបុណ្យកឋិននៅវត្តទ័ពសៀម ក្នុងឃុំស្លក្រាម ដោយឈ្មោះប៉ូលីសនិយាយថា ឈ្មោះតូ, ស៊ីយៀត និងឈ្មោះ ហើម ធ្លាប់វាយវាចំនួន២លើក ដូច្នេះហើយទើបពួកគេទាំងអស់គ្នាចាំស្ទាក់វាយពួកនោះវិញ។ ក្រោយពីធ្វើសកម្មភាពរួចក៏នាំគ្នាជិះម៉ូតូរត់គេចខ្លួន តែត្រូវនគរបាលចាប់ខ្លួនបាន ចំណែកឈ្មោះប៉ូលីស និងឈ្មោះកេរ រត់គេចខ្លួនរួច ។
លោកវរសេនីយ៍ត្រីរ៉ែម វីរៈ បញ្ជាក់ថា ក្មេងទំនើងទាំង៦នាក់ រួមនឹងវត្ថុតាងត្រូវបានកសាងសំណុំរឿងបញ្ជូនមកស្នងការដ្ឋាននគរបាលខេត្ត ដើម្បីចាត់ការបន្តតាមនីតិវិធីច្បាប់ ៕
ចែករំលែកព័តមាននេះ