ខេត្តស្វាយរៀង៖មានឃាតកម្មកាប់សម្លាប់មនុស្សមិនញញើតដៃ មួយករណីទៀត កើតឡើងនៅក្នុងបន្ទប់ជួលមួយកន្លែង ដែលទាល់តែសាកសពមានសភាពហើយស្អុយរលួយទើបមានការភ្ញាក់ផ្អើល និងគាស់ទ្វារបន្ទប់ឃើញស្ត្រីម្នាក់ដេកស្លាប់ក្នុងថ្លុកឈាម។
បើតាមលោកវរសេនីយ៍ត្រីកែវ គង់ អធិការនគរបាលក្រុងបាវិតបានប្រាប់កោះសន្តិភាពថា ជនរងគ្រោះឈ្មោះឆាយ សុខុម អាយុ២៩ឆ្នាំ ជាស្ត្រីមេម៉ាយមុខរបរចងការប្រាក់ មានស្រុកកំណើតនៅភូមិឧត្តម ឃុំព្រែកខ្សាយ «ក» ស្រុកពាមរក៍ ខេត្តព្រៃវែង។
ស្ត្រីរងគ្រោះបានមកជួលបន្ទប់ផ្ទះជួលស្នាក់នៅស្ថិតក្នុងភូមិបាវិតកណ្តាល សង្កាត់បាវិត ក្រុងបាវិត។ សាកសពត្រូវឃាតកកាប់១កាំបិតចំក ក្រោមចង្កាខាងស្តាំលិចមួយកាំបិតដាច់សរសៃក រួចចាក់ចំនួន៤កាំបិតទៀតចំក ក្រោមចង្កាបណ្តាលឱ្យស្ត្រីរងគ្រោះស្លាប់នៅក្នុងថ្លុកឈាម ហើយត្រូវបានបងប្អូនសាច់ញាតិគាស់ទ្វារបន្ទប់កាលពីថ្ងៃទី៦ វិច្ឆិកា វេលាម៉ោង៨ព្រឹក នៅក្នុងបន្ទប់ជួលលេខ១៩។ លោកព្រះរាជអាជ្ញារងអមសាលាដំបូងខេត្តបានមានប្រសាសន៍ថា ស្ត្រីរងគ្រោះត្រូវគេសម្លាប់ក្នុងអំឡុងថ្ងៃទី៣ វិច្ឆិកា ព្រោះសាកសពស្ត្រីរងគ្រោះហើមស្អុយទៅហើយ។
ក្រោយពីធ្វើការពិនិត្យសាកសពរកឃើញកាំបិតប៉័ងតោ១ កាំបិតចុងស្រួច១ ទំនងជាឃាតកកាប់មួយកាំបិតប៉័ងតោចំកពីក្រោយ ហើយស្ត្រីរងគ្រោះរត់មកបើកទ្វារទើបមានឈាមស្រកហូរមកដល់មាត់ទ្វារបន្ទប់ ហើយក៏ត្រូវឃាតកចាប់អូសទៅក្រោយរួចចាក់ចំនួន៤កាំបិតចំបំពង់ក ដួលស្លាប់នៅលើឥដ្ឋតែម្តង។
ប្រភពដដែលបន្តទៀតថា នេះមិនមែនជាករណីប្លន់ទេ ព្រោះសម្ភារមានតម្លៃជាច្រើនរបស់ជនរងគ្រោះមិនមានបាត់បង់ ហើយសង្ស័យលើករណីគំនុំច្រើនជាង៕
ចែករំលែកព័តមាននេះ