រាជធានីភ្នំពេញ ៖ ព្រឹត្តិការណ៍វប្បធម៌អបអរសាទរខួបអនុស្សាវរីយ៍នៃការចុះបញ្ជីរបាំព្រះរាជទ្រព្យ និងល្ខោនស្រមោលស្បែកធំជាបេតិកភណ្ឌវប្បធម៌អរូបីនៃមនុស្សជាតិដែលរៀបចំឡើងដោយក្រសួងវប្បធម៌ និងវិចិត្រសិល្បៈរយៈពេល៣ថ្ងៃចាប់ពីថ្ងៃទី២៩ដល់ថ្ងៃទី៣១ ខែតុលា ឆ្នាំ២០១០ នៅសាលសន្និសីទចតុមុខបានបញ្ចប់កាលពីល្ងាច ថ្ងៃទី៣១ ខែតុលា ឆ្នាំ២០១០ ក្រោមអធិបតីភាពលោកហ៊ឹម ឆែម រដ្ឋមន្ត្រីក្រសួងវប្បធម៌ និងវិចិត្រសិល្បៈ។
ក្នុងពិធីបិទព្រឹត្តិការណ៍វប្បធម៌នោះ លោកឃឹម សារិទ្ធ រដ្ឋលេខាធិការក្រសួងវប្បធម៌មានប្រសាសន៍ថា ការបង្កើតព្រឹត្តិការណ៍វប្បធម៌អបអរសាទរខួបអនុស្សាវរីយ៍នៃការចុះបញ្ជីបេតិកភណ្ឌវប្បធម៌រូបី និងអរូបីជាសម្បត្តិបេតិកភណ្ឌពិភពលោក និងបេតិកភណ្ឌវប្បធម៌អរូបីនៃមនុស្សជាតិរយៈពេល៣ថ្ងៃ ចាប់ពីថ្ងៃទី២៩ដល់ថ្ងៃទី៣១ ខែតុលា ឆ្នាំ២០១០ មានលក្ខណៈអធិកអធមយ៉ាងខ្លាំងដោយមានសំដែងសិល្បៈ ទស្សនីយភាពរបាំបុរាណ របាំប្រពៃណី និងការបង្ហាញម៉ូដសំលៀកបំពាក់ខ្មែរនាសម័យចតុមុខ សម័យអង្គរ ម្ហូបអាហារ និងការតាំងពិព័រណ៍សិល្បៈសូនរូប សិប្បកម្មតម្បាញហូល ផាមួង។
លោកឃឹម សារិទ្ធ បន្តថា ព្រឹត្តិការណ៍វប្បធម៌នេះគឺជាការរួមចំណែកក្នុងការលើកស្ទួយ និងការគាំទ្រដល់ការប្រើប្រាស់សក្តានុពលវប្បធម៌ និងការជំរុញឧស្សាហកម្មវប្បធម៌ដើម្បីជួយបង្កើនប្រាក់ចំណូល និងការកាត់បន្ថយភាពក្រីក្ររបស់ប្រជាជនឈានទៅរកការអភិវឌ្ឍសេដ្ឋកិច្ចដោយផ្អែកលើគ្រឹះវប្បធម៌ជាគន្លឹះ។ ជាការពិតណាស់ ព្រឹត្តិការណ៍វប្បធម៌នេះបានដំណើរការទទួលជោគជ័យដោយមានសាធារណជនចូលរួមទាំងជាតិ និងអន្តរជាតិយ៉ាងច្រើនកុះករ។ លោកហ៊ឹម ឆែម រដ្ឋមន្ត្រីក្រសួងវប្បធម៌ និងវិចិត្រសិល្បៈមានប្រសាសន៍ថា វប្បធម៌ អរិយធម៌ខ្មែរធ្លាប់មានកេរ្តិ៍ឈ្មោះល្បីសុសសាយនៅលើពិភពលោកជាង២សហស្សវត្សនៃប្រវត្តិសាស្ត្រកម្ពុជា ជាពិសេសក្នុងសម័យរុងរឿងនៃចក្រភពអង្គររវាងសតវត្សទី៩ដល់ទី១៥ ព្រះរាជាណាចក្រកម្ពុជាបានឈានដល់យុគកំពូលនៃបញ្ញាញាណច្នៃប្រឌិត និងការបង្កើតស្នាដៃដែលបានបន្សល់ទុកជាកេរមរតកមកដល់សព្វថ្ងៃនេះនូវប្រាសាទរមណីយដ្ឋានប្រវត្តិសាស្ត្រ ប្រព័ន្ធធារាសាស្ត្រ និងស្នាដៃសិល្បៈចំលាក់រាប់ពាន់នៅពាសពេញផ្ទៃប្រទេសជាមួយនឹងបេតិកភណ្ឌវប្បធម៌អរូបីដ៏សំបូរបែប។
ជាក់ស្តែងការទទួលបានជោគជ័យក្នុងការចុះបញ្ជីតំបន់អង្គរ និងប្រាសាទព្រះវិហារជាបេតិកភណ្ឌពិភពលោក និងការបញ្ចូលរបាំព្រះរាជទ្រព្យ និងល្ខោនស្រមោលស្បែកធំជាសម្បត្តិបេតិកភណ្ឌវប្បធម៌អរូបីនៃមនុស្សជាតិ។
លោកហ៊ឹម ឆែម រដ្ឋមន្ត្រីក្រសួងវប្បធម៌បានអំពាវនាវដល់សាធារណជនទាំងអស់ អង្គការជាតិ និងអន្តរជាតិគ្រប់ស្ថាប័នពាក់ព័ន្ធជួយបំផុសស្មារតីខួបអនុស្សាវរីយ៍វប្បធម៌នេះឱ្យផុសផុលទាំងក្នុង និងក្រៅប្រទេសក្នុងបុព្វហេតុថែរក្សាការពារ និងអភិវឌ្ឍសិល្បៈវប្បធម៌ជាតិឱ្យបានគង់វង្សរុងរឿងជាអមតៈ៕
ចែករំលែកព័តមាននេះ