ខេត្តរតនគិរី ៖ ឧបទ្ទវហេតុដែលនឹកស្មានមិនដល់មួយបានកើតឡើងបណ្តាលឱ្យកម្មករម្នាក់ស្លាប់ក្នុងអណ្តូងនិងម្នាក់ទៀតនៅមាត់អណ្តូងងងឹតមុខធ្លាក់ស្លាប់ដែរ ក្នុងហេតុការណ៍ជីកអណ្តូងបង្គន់ថ្មីក្បែរអណ្តូងបង្គន់ចាស់ហើយអ្នកជីកបានបុកទម្លាយអណ្តូងបង្គន់ចាស់ដើម្បីបង្ហូរកាកសំណល់ ស្រាប់តែផ្ទុះជះក្លិនឧស្ម័នចេញពីអណ្តូងបង្គន់នោះបណ្តាលឱ្យរងគ្រោះរហូតបាត់បង់ជីវិត។ ហេតុការណ៍អកុសលនេះ បានកើតឡើងកាលពីវេលាម៉ោង៤និង៣០នាទីរសៀលថ្ងៃទី៣ វិច្ឆិកា ក្នុងភូមិ១ សង្កាត់ឡាបានសៀក ក្រុងបានលុង ។
តាមប្រភពពីប៉ូលិសបច្ចេកទេសនៃស្នងការដ្ឋានខេត្តបានឱ្យដឹងនៅកន្លែងកើតហេតុថា អណ្តូងបង្គន់ដែលត្រូវជីកស្ថិតក្នុងផ្ទុះរបស់ឈ្មោះរាជ្យ ប៊ុរ៉ាត់ ភេទប្រុស អាយុ៥០ឆ្នាំ ស្ថិតនៅក្នុងភូមិ១ សង្កាត់ឡាបានសៀក ក្រុងបានលុង ។ ម្ចាស់ផ្ទះបានជួលកម្មករពីរនាក់ឱ្យជីកអណ្តូងបង្គន់ក្នុងជម្រៅ៩ម៉ែត្រ ដោយយកថ្លៃ១ម៉ែត្រ មួយម៉ឺនប្រាំពាន់រៀល គឺជីកអស់រយៈពេលពីរថ្ងៃមកហើយ ចាប់ពីថ្ងៃទី២ រហូតដល់ថ្ងៃទី៣ វិច្ឆិកា។ លុះពេលចាប់ផ្តើមទម្លាយបង្គន់ចាស់ដែលស្ថិតនៅម្ខាងទៀត ស្រាប់តែជួបហេតុការណ៍អកុសលបែបនេះតែម្តងទៅ ។ កម្មកររងគ្រោះនោះម្នាក់ឈ្មោះសយ សី អាយុ៤៣ឆ្នាំ មានស្រុកកំណើតភូមិព្រៃទទឹង ឃុំខ្នា ស្រុកស៊ីធរកណ្តាល ខេត្តព្រៃវែង និងម្នាក់ទៀតឈ្មោះសាង វណ្ណៈ អាយុ២៩ឆ្នាំ ត្រូវជាប្អូនថ្លៃអ្នកទី១។ ជនរងគ្រោះទាំងពីរនាក់បានមកស្នាក់នៅក្នុងសំណង់បណ្តោះអាសន្ន ស្ថិតនៅភូមិ១ សង្កាត់ឡាបានសៀក ក្រុងបានលុង ។
សាក្សីឃើញហេតុការណ៍នោះនិយាយថា មុនបេលកើតហេតុគេឃើញជនរងគ្រោះត្រូវជាបងថ្លៃបានចុះទៅក្នុងអណ្តូងដែលជីកបានជម្រៅ៩ម៉ែត្រ ។ បន្ទាប់មកបានបុកទម្លុះអណ្តូងម្ខាងដែលជាអន្តូងបង្គន់ចាស់ ស្រាប់តែធ្លាយទឹកមកខ្លាំង និងជះក្លិនយ៉ាងអសោចិ៍បណ្តាលឱ្យអ្នកនៅក្នុងអណ្តូងសន្លប់ ឯអ្នកនៅខាងលើក៏ងងឹតមុខដាំដូងធ្លាក់ចុះក្នុងអណ្តូងដែរ ដោយជើងឡើងលើក្បាលចុះក្រោមបណ្តាលឱ្យឈ្លក់ទឹកស្លាប់ ទម្រាំជួយសង្គ្រោះបានពួកគេស្លាប់បាត់អស់។ ក្លិនដែលជះចេញពីអណ្តូងចាស់ដែលបានបុកទម្លាយបង្ហូរមកក្នុងអណ្តូងថ្មីមានក្លិនពិបាកទ្រាំនិងពុលទៀតផងអាចថប់ដង្ហើម ។
នេះជាហេតុការណ៍ដែលមិនធ្លាប់ជួបពីមុនមកនោះទេ ក្រៅតែពីការថប់ដង្ហើមនៅក្នុងរណ្តៅជ្រៅៗដែលគ្មានអុកស៊ីសែនលើកនេះគឺជាការពុលនឹងក្លិនឧស្ម័នដែលកប់ជិតក្នុងដី ក្នុងអណ្តូងបង្គន់ចាស់ ៕
ចែករំលែកព័តមាននេះ