រាជធានីភ្នំពេញ ៖ គណបក្សប្រជាជនកម្ពុជាខណ្ឌឫស្សីកែវ កាលពីរសៀលថ្ងៃទី៣ វិច្ឆិកា បាននាំអំណោយសង្គ្រោះបន្ទាន់ទៅចែកជូនដល់ប្រជាពលរដ្ឋរងគ្រោះដោយអគ្គិភ័យឆាបឆេះលំនៅឋាននៅក្នុងសង្កាត់ទួលសង្កែ ខណ្ឌឫស្សីកែវ ។ នៅក្នុងឱកាសនោះក៏មានការចូលរួមចែកជូនផ្ទាល់ដោយលោកនុត ពុធដារ៉ា អនុប្រធានគណៈកម្មាធិការបក្សខណ្ឌឫស្សីកែវ ជាតំណាងលោកឃ្លាំង ហួត ប្រធានគណៈកម្មាធិការបក្ស ព្រមទាំងលោកសយ កុសល ប្រធានគណបក្សសង្កាត់ទួលសង្កែ និងសមាជិក សមាជិកាជាច្រើនរូបទៀត ។
អំណោយដែលយកទៅចែកជូនក្នុងឱកាសនោះសម្រាប់ប្រជាពលរដ្ឋចំនួន៥គ្រួសារក្នុងផ្ទះចំនួន៤ខ្នង ដែលត្រូវភ្លើងឆាបឆេះក្នុង១គ្រួសារទទួលបានអង្ករ២៥គីឡូក្រាម មី១កេស ទឹកបរិសុទ្ធ១កេស តង់១ កន្ទេល១ ភួយ១ មុង១ ធុងទឹក១ ទឹកត្រី១យួរ ទឹកស៊ីអ៊ីវ១យួរ និងថវិកា១០ម៉ឺនរៀល ។ ដោយឡែកប្រជាពលរដ្ឋដែលជួលផ្ទះស្នាក់នៅចំនួន៣គ្រួសារ និង១៥នាក់ ទទួលបានក្នុង១គ្រួសារនិងម្នាក់ៗថវិកា១០ម៉ឺនរៀល។
លោកនុត ពុធដារ៉ា ក្នុងនាមលោកឃ្លាំងហួត បានសម្តែងនូវការសោកស្តាយ និងចូលរួមរំលែកទុក្ខជាមួយបងប្អូនរងគ្រោះទាំងអស់ ។ គ្រោះអគ្គិភ័យគ្មាននរណាម្នាក់ចង់ជួបប្រទះទេ ព្រោះវានាំឱ្យយើងបាត់បង់ទ្រព្យសម្បត្តិផ្ទះសំបែង រហូតបាត់បង់ជីវិតទៀតក៏មាន ដូចពាក្យចាស់ពោលថា «សូវលិចទូកកណ្តាលទន្លេប្រសើរជាងភ្លើងឆេះផ្ទះ»។ លោកបានបន្តទៀតថា បន្ទាប់ពីកើតមានគ្រោះអគ្គិភ័យ អាជ្ញាធរសង្កាត់ ខណ្ឌ ព្រមទាំងសមត្ថកិច្ចបានខិតខំជួយបាញ់ពន្លត់សង្គ្រោះបងប្អូន តែមិនអាចសង្គ្រោះបានទាន់ពេលចំពោះលំនៅឋានដែលត្រូវភ្លើងឆេះពេញបន្ទុកទៅហើយនោះ ។ ដោយសារមានការគិតគូរដល់បងប្អូន ទើបថ្ងៃនេះ គណបក្សប្រជាជនកម្ពុជាខណ្ឌឫស្សីកែវបាននាំអំណោយសង្គ្រោះបន្ទាន់មកចែកជូនដើម្បីជួយសម្រួលដល់ការលំបាករបស់បងប្អូន ។ នេះជាការចែករំលែកសុខទុក្ខគ្នារបស់គណបក្សប្រជាជនកម្ពុជា ដែលធ្លាប់តែរួមសុខរួមទុក្ខជាមួយប្រជាពលរដ្ឋទូទាំងប្រទេស ។ លោកនុត ពុធដារ៉ា ក៏បានពាំនាំនូវប្រសាសន៍ផ្តាំផ្ញើសាកសួរសុខទុក្ខពីសំណាក់សម្តេចតេជោហ៊ុន សែន និងលោកជំទាវកិត្តិព្រឹទ្ធបណ្ឌិតប៊ុន រ៉ានី ហ៊ុន សែន ចំពោះប្រជាពលរដ្ឋរងគ្រោះផងដែរ ។
ដោយឡែកនៅរសៀលនោះដែរ លោកសយ កុសល ចៅសង្កាត់ទួលសង្កែ ក៏បាននាំអំណោយទៅចែកជូនប្រជាពលរដ្ឋរងគ្រោះដែលត្រូវភ្លើងឆេះផ្ទះដែរ ។ ក្នុងនោះប្រជាពលរដ្ឋ៥គ្រួសារក្នុង១គ្រួសារ ទទួលបានអង្ករ១៥គីឡូក្រាម តង់១ កន្ទេល១ មុង១ សារុង១ ធុងទឹក១ កាទឹក១ ឆ្នាំង២ វែក២ ចាន១៥ ស្លាបព្រា១០ ទឹកស៊ីអុីវ១យួរ ទឹកត្រី១យួរ និងថវិកា៨ម៉ឺនរៀល ។ សម្រាប់៣គ្រួសារ ដែលជួលផ្ទះគេស្នាក់នៅទទួលបានសម្ភារដូចគ្នា និងថវិកា ចំនួន៥ម៉ឺនរៀល និង១៥នាក់ទៀតទទួលបានសម្ភារ និងថវិកាម្នាក់ៗ៤ម៉ឺនរៀល ។ ដោយឡែក ៤គ្រួសារទៀតដែលផ្ទះត្រូវភ្លើងឆេះរោលទទួលបានថវិកា១០ម៉ឺនរៀល ។
គួរបញ្ជាក់ថា កាលពីវេលាម៉ោង៩និង៣០នាទីព្រឹកថ្ងៃទី៣ វិច្ឆិកា លំនៅឋានចំនួន៤ខ្នង ធ្វើអំពីឈើ ស្ថិតនៅក្រុមទី៨ ភូមិទួលសង្កែ សង្កាត់ទួលសង្កែ ខណ្ឌឫស្សីកែវ ត្រូវភ្លើងឆាបឆេះអស់គ្មានសល់។ លុះនៅវេលារសៀល អាជ្ញាធរ និងគណបក្សប្រជាជនខណ្ឌឫស្សីកែវ បានចុះទៅផ្តល់អំណោយជូនប្រជាពលរដ្ឋរងគ្រោះដើម្បីជួយសម្រួលដល់ការលំបាក ៕
ចែករំលែកព័តមាននេះ