ខេត្តស្ទឹងត្រែង ៖ កសិករក្នុងឃុំភ្លុក ស្រុកសេសាន មានក្តីសប្បាយរីករាយដោយបានលោកអភិបាលខេត្ត មន្ត្រីរាជការ និងកងកម្លាំងប្រដាប់អាវុធចុះជួយច្រូតស្រូវរដូវវស្សាក្នុង ខណៈពេលដែលស្រូវរបស់គាត់ទុំច្រើន ហើយខ្វះកម្លាំងពលកម្មច្រូតកាត់។ ការចុះជួយប្រមូលផលទុកដាក់នេះបានធ្វើឡើងកាលពីព្រឹកថ្ងៃទី៣ វិច្ឆិកា ឆ្នាំ២០១១ ដែលមានកម្លាំងសរុបជាង១០០នាក់។
អ្នកស្រី ឡន វៀង តំណាងឲ្យកសិករគំរូនៅក្នុងឃុំភ្លុកបានសម្ដែងនូវសេចក្តីត្រេកអរជាពន់ពេក ដែលបានអាជ្ញាធរខេត្ត រួមទាំងក្រុមការងារទាំងអស់ចុះជួយកសិករ និងយកចិត្តទុកដាក់គ្រប់ពេលវេលាចាប់តាំងពីការចែកពូជស្រូវ ការបង្ហាត់ធ្វើជីកំប៉ុស និងបច្ចេកទេសដាំដុះ ធ្វើឲ្យស្រូវទទួលបានទិន្នផលខ្ពស់ ហើយមកជួយដល់ការងារប្រមូលផលស្រូវបន្ថែមទៀត។ អ្នកស្រីបញ្ជាក់ថា នៅស្រុកសេសាន មានកសិករគំរូ១៣០គ្រួសារនៅក្នុងឃុំចំនួន៤ មានឃុំភ្លុក ឃុំក្បាលរមាស ឃុំស្រែគរ និងឃុំកំភុន ទទួលបានការបណ្តុះបណ្តាលបចេ្ចកទេសពីមន្ទីរកសិកម្មខេត្ត គឺការធ្វើស្រែបង្ហាញប្រព័ន្ធប្រពលវប្បកម្មដំណាំស្រូវតាមគោលការណ៍ធម្មជាតិហៅថា (ប.វ.ស) និងផ្លាស់ប្តូរទម្លាប់។
លោកទូច ធា ប្រធានមន្ទីរកសិកម្មខេត្ត ថ្លែងថា ថ្នាក់ដឹកនាំរួមទាំងមន្ត្រីរាជការបានចុះមកជួយច្រូតស្រូវប្រជាកសិករនេះ បង្ហាញពីកម្លាំងសាមគ្គី ជួយដល់កសិករជួបការលំបាក ក្នុងការប្រមូលផលស្រូវរដូវវស្សា ដើម្បីជៀសវាងផលស្រូវដែលទទួលបានហើយ ត្រូវរងការខូចខាតទៅវិញ ដោយសត្វចង្រៃបំផ្លាញ ឬការប្រមូលផលមិនទាន់។ លោកបន្តទៀតថា ការចុះជួយច្រូតកាត់ផលស្រូវនេះយើងក៏បានធ្វើពិធីបង្ហាញទិន្នផលទទួលបានរវាងការធ្វើស្រែតាមលក្ខណៈបច្ចេកទេស និងធ្វើតាមទម្លាប់ដែលការទទួលទិន្នផលខុសគ្នា គឺតាមបច្ចេកទេស១ហិកតាបានជាង៥តោន ឯការធ្វើតាមទម្លាប់បានតែជាង៣តោនតែប៉ុណ្ណោះ។ នេះជាការបង្ហាញដល់កសិករឲ្យឃើញជាក់ស្តែង ដើម្បីឲ្យពួកគាត់ធ្វើការអនុវត្តនៅឆ្នាំក្រោយៗទៀត។
លោកឡូយ សុផាត អភិបាលខេត្ត មានប្រសាសន៍ណែនាំដល់កសិករទាំងអស់ឲ្យអនុវត្តការងារបង្កបង្កើនផលទៅតាមមន្ទីរកសិកម្មណែនាំឲ្យបានត្រឹមត្រូវតាមលក្ខណៈបច្ចេកទេស និងត្រូវខិតខំដាំដំណាំកសិ-ឧស្សាហកម្មឲ្យបានច្រើន ដើម្បីបង្កើនសេដ្ឋកិច្ចគ្រួសារ និងធ្វើឲ្យការងារបង្កបង្កើនផលទទួលបានទិន្នផលខ្ពស់។ លោកអភិបាលខេត្ត បានផ្តាំផ្ញើឲ្យកសិករទាំងអស់ជាមួយនឹងការទទួលបានផលហើយ កុំភ្លេចចូលរួមសាមគ្គីជាមួយអាជ្ញាធរមូលដ្ឋានគ្រប់លំដាប់ថ្នាក់ អនុវត្តគោលការណ៍៥យ៉ាងនៃភូមិ-ឃុំមានសុវត្តិភាព ដើម្បីធ្វើឲ្យសង្គមគ្រួសារក៏ដូចមូលដ្ឋានរស់នៅមានសន្តិសុខ និងសុវត្ថិភាពល្អ៕
ចែករំលែកព័តមាននេះ