រាជធានីភ្នំពេញ ៖ បុរសម្នាក់ជាអ្នករត់ម៉ូតូឌុប ត្រូវសាច់ញាតិបញ្ជូនមកមន្ទីរពេទ្យកាល់ម៉ែត ដើម្បីសង្គ្រោះជីវិត ក្រោយពីបុរសនោះជួបហេតុការណ៍ផ្ទុះកំប៉ុងហ្គាសនៅចំណុចផ្ទះជួលមហាវិថីសហព័ន្ធរុស្ស៊ី សង្កាត់កាកាប ខណ្ឌដង្កោ កាលពីវេលាម៉ោង៧និង២០នាទីយប់ថ្ងៃទី២០ មករា ២០១១ បណ្តាលឱ្យរលាកស្បែកពេញខ្លួន ។ ជនរងគ្រោះដោយសារផ្ទុះកំប៉ុងហ្គាសនេះត្រូវគេស្គាល់ឈ្មោះហាក់ បូរិន ភេទប្រុស អាយុ៣៥ឆ្នាំ មុខរបររត់ម៉ូតូឌុប ស្នាក់នៅផ្ទះជួល មហាវិថីសហព័ន្ធរុស្ស៊ី សង្កាត់កាកាប ខណ្ឌដង្កោ ។
បុរសនោះបានរៀបរាប់ក្នុងមន្ទីរពេទ្យកាល់ម៉ែតឱ្យដឹងថា មុនពេលកើតហេតុ រូបគេបានរៀបចំដាំបាយដោយប្រើចង្ក្រានហ្គាសធុនតូច បន្ទាប់ពីបើកហ្គាសហើយក៏ដាក់ឆ្នាំងបាយ រួចដើរចេញមកខាងក្រៅ ។ បន្តិចក្រោយមកគាត់ក៏ត្រឡប់ដើរចូលទៅកាន់ចង្ក្រានបាយវិញរួចកេះដែកកេះដុតបារី ស្រាប់តែឆាបឆេះកំប៉ុងហ្គាស និងផ្ទុះលាន់ផាំង ហើយជះហ្គាសមកលើខ្លួន បណ្តាលឱ្យរលាក និងរោលខ្មៅពេញខ្លួន ។ ភ្លាមៗនោះ សាច់ញាតិប្រពន្ធជួយដឹកទៅកាន់គ្លីនិកឯកជនមួយក្បែរផ្សារពោធិចិនតុង ប៉ុន្តែដោយសារមុខរបួសធ្ងន់ និងសេវាពេទ្យថ្លៃ ទើបសំរេចចិត្តទៅកាន់មន្ទីរពេទ្យកាល់ម៉ែត ។
ជនរងគ្រោះបានបញ្ជាក់ថា មូលហេតុផ្ទុះកំប៉ុងហ្គាសនេះទំនងជាចង្ក្រានវារលត់ភ្លើង ហើយបញ្ចេញហ្គាសចោលពេញបន្ទប់ លុះពេលគាត់ទៅក្បែរចង្ក្រាន និងកេះដែកកេះជក់បារី ទើបបណ្តាលឱ្យឆាបឆេះកំប៉ុងហ្គាសនោះរួចផ្ទុះឡើងតែម្តង ។ បច្ចុប្បន្នបុរសរងគ្រោះខាងលើកំពុងសំរាកព្យាបាលនៅមន្ទីរពេទ្យកាល់ម៉ែតក្រោមការថែទាំដោយក្រុមវេជ្ជបណ្ឌិតយ៉ាងយកចិត្តទុកដាក់ ៕
ចែករំលែកព័តមាននេះ