រាជធានីភ្នំពេញ ៖ លោកអ៊ាង សុផល្លែត ជំនួយការសម្តេចអគ្គមហាសេនាបតីតេជោហ៊ុន សែន បានប្រាប់ឱ្យដឹងថា ប្រតិភូនិងក្រុមកីឡាករ-កីឡាការិនីរបស់ប្រទេសកម្ពុជាចំនួន២៣០នាក់ ដែលនឹងត្រូវទៅចូលរួមប្រកួតកីឡាស៊ីហ្គេមលើកទី២៦ នៅសាធារណរដ្ឋឥណ្ឌូណេស៊ី បានចូលជួបសម្តែងការគួរសម សម្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជានៅវិមានសន្តិភាពនាព្រឹកថ្ងៃទី៣១ ខែតុលា មុនពេលពួកគេចេញដំណើរទៅកាន់ប្រទេសឥណ្ឌូណេស៊ីនៅថ្ងៃទី៥ វិច្ឆិកា ។
លោកថោង ខុន រដ្ឋមន្ត្រីក្រសួងទេសចរណ៍ និងជាប្រធានគណៈកម្មាធិការជាតិអូឡាំពិកកម្ពុជា មានប្រសាសន៍ថា សម្រាប់កម្មវិធីនៃការប្រកួតកីឡាស៊ីហ្គេមលើកទី២៦ កម្ពុជាមានកីឡាករ-កីឡាការិនី ប្រតិភូដឹកនាំនិងគ្រូបង្វឹកចំនួន២៣០នាក់ ទៅចូលរួមប្រកួតនៅទីក្រុងហ្សាការតា និងទីក្រុងបាឡាមបាង ប្រទេសឥណ្ឌូណេស៊ី។ ក្នុងចំណោមថ្នាក់ដឹកនាំកីឡាករ-កីឡាការិនី និងគ្រូបង្វឹកទាំង២៣០នាក់នេះ មានថ្នាក់ដឹកនាំនិងមន្ត្រីជំនាញអមចំនួន១៩នាក់ គ្រូបង្វឹកចំនួន៤៩នាក់ និងកីឡាករ-កីឡាការិនីចំនួន១២៦នាក់ ក្នុងនោះកីឡាការិនីចំនួន២២នាក់ ។
កម្ពុជាមានប្រភេទកីឡាចំនួន២១ចូលរួម ដែលក្នុងនោះមានកីឡាប្រដាល់ កីឡាបាល់ទះក្នុងសាល វាយកូនបាល់ បាល់ទះឆ្នេរខ្សាច់ ចំបាប់ អត្តពលកម្ម ហែលទឹក កាយសម្ព័ន្ធ ប៉េតង់ បាល់ទាត់ វាយសី វាយកូនគោល ការ៉ាតេដូ សូវីនឡឺ ខាំបូ វាយកូនឃ្លីលើតុ វ៉ូស៊ូយូដូ បាល់បោះ វ៉ូស៊ូវីណាន តេក្វាន់ដូ និងកីឡាប្រណាំងទូកប្រពៃណី ដែលនឹងប្រព្រឹត្តទៅពីថ្ងៃទី១១ ដល់ថ្ងៃទី២២ ខែវិច្ឆិកា ឆ្នាំ២០១១។
នៅចំពោះមុខថ្នាក់ដឹកនាំ គ្រូបង្វឹក កីឡាករ និងកីឡាការិនីទាំង២៣០នាក់ សម្តេចតេជោនាយករដ្ឋមន្ត្រីមានប្រសាសន៍ថា កម្ពុជាមិនចង់ធ្វើជាមហាអំណាចលើវិស័យកីឡានោះទេ ប៉ុន្តែសូមគិតថា បើចាញ់នៅក្នុងការប្រកួតកុំគិតថា ប្រទេសកម្ពុជាជាប្រទេសតូច ឬជាប្រទេសក្រីក្រឱ្យសោះ ព្រោះការពិតបែបនេះ គឺជាការយល់ខុសធ្ងន់ណាស់ ព្រោះថាមានប្រទេសធំក៏មិនពិតជាមានក្រុមកីឡាករបាល់ទាត់ ឬក៏ប្រភេទកីឡាផ្សេងៗទៀតដែលមានលក្ខណៈខ្លាំងពូកែដែរ។ សម្តេចសង្កត់ធ្ងន់ថា «ក្រុមកីឡាករយើងត្រូវអនុវត្តឱ្យបានតឹងរ៉ឹង និងយ៉ាងម៉ត់ចត់បំផុត ពោលគឺប្រព្រឹត្តទៅតាមបទដ្ឋានបច្ចេកទេស ក្បួនច្បាប់កីឡា គឺធ្វើយ៉ាងណាកុំឱ្យមានការអាម៉ាស់ និងធ្វើឱ្យប៉ះពាល់ដល់កិតិ្តយសរបស់ប្រទេសជាតិដែលផ្តើមឡើងពីការប្រកួតដែលមិនអនុវត្តតាមបទបញ្ជានៃការប្រកួត» ។
សម្តេចតេជោនាយករដ្ឋមន្ត្រីបានក្រើនរំលឹកដល់កីឡាករ-កីឡាការិនីទាំងអស់ត្រូវខិតខំប្រឹងប្រែងឱ្យអស់សមត្ថភាព ព្រោះថាការចេញទៅប្រកួតនេះគឺជាការចេញទៅតំណាងឱ្យប្រទេសនិងប្រជាជាតិកម្ពុជាទាំងមូល ។
ក្រុមកីឡាកម្ពុជា នឹងចេញដំណើរជាបន្តបន្ទាប់ពីថ្ងៃទី៦ ដល់ថ្ងៃទី១១ វិច្ឆិកា ដើម្បីចូលរួមប្រកួតកីឡាស៊ីហ្គេមលើកទី២៦នៅទីក្រុងហ្សាការតា និងទីក្រុងបាឡាមបាង សាធារណរដ្ឋឥណ្ឌូណេស៊ី
សម្រាប់ការផ្តល់ដល់កីឡាករសម្តេចតេជោបានផ្តល់ដល់កីឡាករ កីឡាការិនីក្នុងថ្ងៃចេញដំណើរ ម្នាក់ៗទទួលបាន៣០០ដុល្លារ ។ ចំពោះជ័យលាភីទទួលបានេមដាយមាសទាំងឯកត្តជន និងក្រុមចំនួន៣.០០០ដុល្លារ ប្រាក់២.០០០ដុល្លារ និងសំរឹទ្ធ១.០០០ដុល្លារ ។ នេះជាការផ្តល់សម្រាប់រាជរដ្ឋាភិបាល។ ចំណែកការឧបត្ថម្ភរបស់ក្រុមហ៊ុននានា គឺបានបន្ថែមកីឡាករ កីឡាការិនីដែលទទួលបានជាឯកត្តជន និងក្រុម ៕
ចែករំលែកព័តមាននេះ