ខេត្តស្វាយរៀង ៖ កាលពីព្រឹកថ្ងៃទី២៩ តុលា នៅវត្តពោធិ៍ធំ ស្ថិតក្នុងឃុំចំបក់ ស្រុកស្វាយជ្រំ លោកជំទាវបណ្ឌិតម៉ែន សំអន ឧបនាយករដ្ឋមន្ត្រីប្រចាំការ រដ្ឋមន្ត្រីក្រសួងទំនាក់ទំនងជាមួយសភា ព្រឹទ្ធសភា និងអធិការកិច្ច និងក្រុមការងារកាកបាទក្រហមចុះជួយខេត្តស្វាយរៀង បាននាំយកអំណោយសង្គ្រោះបន្ទាន់ទៅចែកជូនប្រជាពលរដ្ឋរងគ្រោះដោយសារទឹកជំនន់ចំនួន៨០០គ្រួសារ មកពីឃុំក្រួស និងឃុំចំបក់ ស្រុកស្វាយជ្រំ ។ ពិធីនេះមានការអញ្ជើញចូលរួមពីមន្ត្រីអាជ្ញាធរខេត្ត-ស្រុក ក្រុមប្រឹក្សាឃុំនិងតំណាងរាស្ត្រមណ្ឌលស្វាយរៀង ព្រមទាំងសប្បុរសជនយ៉ាងច្រើនកុះករ ។
លោកអ៊ុយ ថន អភិបាលស្រុកស្វាយជ្រំ បានមានប្រសាសន៍ថា មានឃុំចំនួន៦ ត្រូវទឹកជំនន់លិច ព្រមទាំងប៉ះពាល់ដល់ផ្ទះសម្បែងប្រជាពលរដ្ឋនិងខូចខាតស្រូវជាង១ពាន់ហិកតា និងសត្វពាហនៈមួយចំនួន ។ នៅខេត្តស្វាយរៀងក្នុងរយៈពេល១ខែកន្លងមកនេះ ឥទ្ធិពលទឹកជំនន់ ទន្លេមេគង្គ និងទឹកភ្លៀងបានជន់លិចភូមិករប្រជាពលរដ្ឋ១៦១ភូមិ ៣៩ឃុំ-សង្កាត់ ក្នុងស្រុក-ក្រុងចំនួន៧ ប៉ះពាល់ផ្ទះសម្បែងប្រជាពលរដ្ឋ៦.១៤០ខ្នង ដួលរលំផ្ទះ២៣ខ្នង និងលង់ទឹកស្លាប់៤នាក់ មនុស្ស១៧.០៤៤នាក់ ត្រូវជម្លៀសទៅកាន់ទីទួលសុវត្ថិភាព ។
ចំពោះស្រូវខូចខាតទាំងស្រុងចំនួន៧.៧៦២ហិកតា ប៉ះពាល់ដំណាំរួមផ្សំនិងស្រូវ១៣.៣៥០ហិកតា ប៉ះពាល់ដល់ការសិក្សារបស់សិស្សដោយសារសាលារៀនចំនួន១៧កន្លែងត្រូវបិទទ្វារ វត្តអារាមចំនួន១៦ ត្រូវទឹកលិច ផ្លូវលំនិងផ្លូវកៅស៊ូ ប្រវែង៦០.១៣៨ម៉ែត្រត្រូវដាច់ខូចដោយអន្លើ ស្ពាន៥កន្លែង បិទមិនឱ្យធ្វើចរាចរណ៍ គោ-ក្របី៩.៩៧៣ក្បាល ត្រូវខ្វះស្មៅជាអាហារ។ ដោយឡែក ប្រជាពលរដ្ឋ៨០០គ្រួសារ នៅស្រុកស្វាយជ្រំ នាថ្ងៃនេះត្រូវបានរាជរដ្ឋាភិបាលតាមរយៈលោកជំទាវម៉ែន សំអន នាំអំណោយមកផ្តល់ជូនមានអង្ករ២០តោន មី៨០០កេសធំ ត្រីខ៨០០យួរ សារុង៨០០ ក្រមា៨០០ និងថវិកា៨.៥០០.០០០រៀល ដែលជាអំណោយដ៏ថ្លៃថ្លារបស់សម្តេចអគ្គមហាសេនាបតីតេជោហ៊ុន សែន និងលោកជំទាវកិត្តិព្រឹទ្ធបណ្ឌិតប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ព្រមទាំងសប្បុរសជននានា។
លោកជំទាវម៉ែន សំអន មានប្រសាសន៍ថា សម្តេចអគ្គមហាសេនាបតីតេជោហ៊ុន សែន និងលោកជំទាវកិត្តិព្រឹទ្ធបណ្ឌិតប៊ុន រ៉ានី ហ៊ុន សែន បានផ្តាំផ្ញើសួរសុខទុក្ខ និងផ្ញើក្តីនឹករលឹកចូលរួមរំលែករាល់ការលំបាករបស់បងប្អូនប្រជាពលរដ្ឋទាំងអស់ដែលប្រឈមនឹងគ្រោះធម្មជាតិទឹកជំនន់បំផ្លាញភោគផលស្រូវ ដំណាំ ភូមិករ និងទ្រព្យសម្បត្តិកន្លងមក ។ ទុក្ខលំបាករបស់ប្រជាពលរដ្ឋគឺជាកង្វល់របស់កាកបាទក្រហមកម្ពុជា និងរាជរដ្ឋាភិបាលកម្ពុជា។ សម្តេចតេជោហ៊ុន សែន បានមានប្រសាសន៍ថា កុំឱ្យប្រជាពលរដ្ឋអត់បាយដោយមិនបានដឹង ។ លោកជំទាវបន្តទៀតថា គ្រោះទឹកជំនន់នេះបានជន់លិចប្រទេសថៃយ៉ាងធ្ងន់ធ្ងរបើប្រៀបធៀបគឺប្រទេសកម្ពុជាយើងធូរស្រាលជាងទឹកជំនន់នោះ ដែលបានគំរាមកំហែងដល់ផ្ទះសម្បែង ផលដំណាំ សត្វពាហនៈ ហេដ្ឋារចនាសម្ព័ន្ធ និងសុខុមាលភាពប្រជាពលរដ្ឋ ។
សម្តេចតេជោបានដាក់ចេញនូវផែនការយុទ្ធសាស្ត្រឱ្យក្រសួងកសិកម្មត្រៀមពូជស្រូវ ពូជដំណាំរួមផ្សំ សម្រាប់ផ្គត់ផ្គង់ជីវភាព ក្រសួង សុខាភិបាលត្រៀមថ្នាំព្យាបាលជំងឺប្រជាពលរដ្ឋក្រោយពីទឹកស្រក មន្ទីរសាធារណការត្រូវត្រៀមចុះជួសជុលស្ពានផ្លូវថ្នល់ឱ្យទាន់ពេលវេលាដើម្បីប្រជាពលរដ្ឋធ្វើដំណើរបានងាយស្រួល។ អាជ្ញាធរភូមិ-ឃុំ-ស្រុក-ខេត្ត យកចិត្តទុកដាក់ ត្រៀមកម្លាំងចុះជួយប្រជាពលរដ្ឋឱ្យទាន់ពេលវេលា សាខាកាកបាទក្រហមខេត្តធ្វើការងារមនុស្សធម៌ដោយមិនប្រកាន់និន្នាការនយោបាយឡើយ។ លោកជំទាវឧបនាយករដ្ឋមន្ត្រីបន្តទៀតថា ដោយមានការដឹកនាំដ៏ត្រឹមត្រូវរបស់រាជរដ្ឋាភិបាលដែលមានសម្តេចអគ្គមហាសេនាបតីតេជោហ៊ុន សែន ជាប្រមុខ បានចាត់ចែងបញ្ជូនធនធានថវិកា ស្បៀងអាហារ ចែកជូនបងប្អូនជនរួមជាតិទាន់ពេលវេលា ទោះបីតិចតួចក្តីក៏ជាទុនសម្រាប់ឱ្យបងប្អូនបន្តជីវភាពដើម្បីបានបង្កបង្កើនផល ផលិតស្បៀងឈានទៅរកការធានាសុវត្ថិភាព សន្តិសុខស្បៀងនាពេលខាងមុខ។
បន្ទាប់មកគឺពិធីប្រគល់់ថ្នាំពេទ្យចំនួន១៤កេសស្មើនឹង៣៦មុខ ដល់មណ្ឌលសុខភាពក្រួស និងមណ្ឌលសុខភាពចម្លង និងចែកអំណោយសង្គ្រោះបន្ទាន់ដល់ប្រជាពលរដ្ឋចំនួន៨០០គ្រួសារ ដោយក្នុងមួយគ្រួសារៗទទួលបានអង្ករ២០គីឡូក្រាម មី២កេស ត្រីខ១០កំប៉ុង សារុង១ ក្រមា១ ថវិកា១ម៉ឺនរៀល ថ្នាំវីតាមីនសេ៦០គ្រាប់ ថ្នាំគ្ល័ររ៉ាមីន ១០គ្រាប់ សម្រាប់លាយទឹកស្អាតបរិភោគ ។ ប្រគេនព្រះគ្រូចៅអធិការ វត្តពោធិ៍ធំហៅវត្តជ្រាង ៥០ម៉ឺនរៀល សម្រាប់ផ្គត់ផ្គង់ចង្ហាន់ព្រះសង្ឃគង់នៅវត្តពោធិ៍ធំ ។ ជាមួយនេះ លោកជំទាវក៏បានថ្លែងអំណរគុណព្រះគ្រូចៅអធិការវត្តពោធិ៍ព្រះបាត្រ ហៅវត្តច្បារអំពៅ ព្រះបញ្ញាបទីបោ ហោ សុខុន និងក្រុមការងារពង្រឹងមូលដ្ឋានចុះជួយខេត្តស្វាយរៀង ដែលបានជួយឧបត្ថម្ភចំនួន៧លានរៀល ៕
ចែករំលែកព័តមាននេះ