រាជធានីភ្នំពេញ ៖ យោងតាមសេចក្តីប្រកាសរបស់គណៈកម្មាធិការជាតិរៀបចំការបោះឆ្នោតកាលពីថ្ងៃទី១ មីនា ២០១១ ដែលកោះសន្តិភាពបានទទួលចុះហត្ថលេខាដោយលោកអ៊ឹម សួស្តី ប្រធាន គ.ជ.ប ឱ្យដឹងថា ការបោះឆ្នោតជ្រើសតាំងសមាជិកព្រឹទ្ធសភានីតិកាលទី៣ នឹងត្រូវប្រព្រឹត្តទៅនៅថ្ងៃអាទិត្យ ទី២៩ មករា ឆ្នាំ២០១២ ។
សេចក្តីជូនដំណឹងស្តីពីកាលបរិច្ឆេទនៃថ្ងៃបោះឆ្នោតជ្រើសតាំងសមាជិកព្រឹទ្ធសភា នីតិកាលទី៣ បានធ្វើឡើងក្រោយពីព្រឹទ្ធសភា បានកំណត់ពីការបែងចែកអាសនៈ តាមភូមិភាគចំនួន៨ សម្រាប់ការបោះឆ្នោតជ្រើសតាំងសមាជិកព្រឹទ្ធសភានីតិកាលទី៣។ យោងតាមសេចក្តីសម្រេចរបស់ព្រឹទ្ធសភា ចំនួនអាសនៈទាំងអស់របស់ព្រឹទ្ធសភានីតិកាលទី៣ មានចំនួន៦១អាសនៈ ហើយអាសនៈដែលត្រូវបោះឆ្នោតជ្រើសតាំងត្រូវកំណត់ត្រឹមតែ៥៧អាសនៈប៉ុណ្ណោះ ។
គ.ជ.ប បន្តថា អាសនៈតាមភូមិភាគទាំង៨រួមមាន ភូមិភាគទី១ រាជធានីភ្នំពេញ មានចំនួន៦អាសនៈ ភូមិភាគទី២ ខេត្តកំពង់ចាម មាន៨អាសនៈ, ភូមិភាគទី៣ ខេត្តកណ្តាល មាន៥អាសនៈ, ភូមិភាគទី៤ ខេត្តបាត់ដំបង បន្ទាយមានជ័យ សៀមរាប ឧត្តរមានជ័យ និងខេត្តប៉ៃលិន មាន១០អាសនៈ, ភូមិភាគទី៥ ខេត្តតាកែវ កំពត និងខេត្តកែប មាន៧អាសនៈ, ភូមិភាគទី៧ ខេត្តកំពង់ស្ពឺ កំពង់ឆ្នាំង ពោធិ៍សាត់ កោះកុង និងខេត្តព្រះសីហនុ មាន៨អាសនៈ និងភូមិភាគទី៨ ខេត្តកំពង់ធំ ព្រះវិហារ ក្រចេះ ស្ទឹងត្រែង រតនគិរី និងខេត្តមណ្ឌលគិរី មាន៦អាសនៈ ។
គួររំលឹកថា ការបោះឆ្នោតជ្រើសតាំងសមាជិកព្រឹទ្ធសភាត្រូវធ្វើឡើងជាលក្ខណៈអសកល ។ ពោលគឺមានតែសមាជិកក្រុមប្រឹក្សាឃុំ-សង្កាត់សរុបចំនួន១១.៣៥៣នាក់ និងសមាជិករដ្ឋសភា (អ្នកតំណាងរាស្ត្រ) ចំនួន១២៣រូបប៉ុណ្ណោះ ជាអ្នកបោះឆ្នោតជ្រើសតាំងសមាជិកព្រឹទ្ធសភាចំនួន៥៧រូប ក្នុងចំណោមសមាជិកព្រឹទ្ធសភាសរុប៦១រូប ។
យោងតាមច្បាប់សមាជិកព្រឹទ្ធសភា៦១រូប គឺមានសមាជិកព្រឹទ្ធសភា២រូប ត្រូវបានតែងតាំងដោយព្រះមហាក្សត្រ, ២រូបទៀតត្រូវបានរដ្ឋសភាជ្រើសតាំងតាមមតិភាគច្រើន និង៥៧រូប ត្រូវបានជ្រើសតាំងតាមការបោះឆ្នោតជាអសកល ៕
ចែករំលែកព័តមាននេះ