រាជធានីភ្នំពេញ ៖ ទេយ្យទានជាគ្រឿងឧបភោគបរិភោគ សម្ភារប្រើប្រាស់ចំនួន៤៦មុខ និងថវិកាចំនួន៥លាន១០ម៉ឺនរៀល ដែលគិតសរុបជាថវិកាស្មើនឹង២៥.១២០.៥០០រៀល, ត្រូវបានព្រះបញ្ញាបទិបោហោ សុខុន ព្រះលេខាអនុគណខណ្ឌមានជ័យ និងជាព្រះចៅអធិការវត្ដពោធិព្រះបាត្រ ហៅវត្ដច្បារអំពៅប្រគល់ជូនដល់កាកបាទក្រហមសាខារាជធានីភ្នំពេញនាល្ងាចថ្ងៃទី១៩ តុលា ឆ្នាំ២០១១ នៅវត្ដពោធិព្រះបាត្រ ហៅវត្ដច្បារអំពៅដែលអញ្ជើញទៅទទួលដោយលោកប៉ា សុជាតិវង្ស ប្រធានគណៈកម្មាធិការសាខា និងជាអភិបាលរងរាធានីភ្នំពេញ ព្រមទាំងលោកជំទាវ រួមដំណើដោយឯកឧត្ដម លោកជំទាវ លោកឧកញ៉ា លោក-លោកស្រីក្នុងជួរគណៈកិត្ដិយសសាខាគណៈកម្មាធិការសាខា មន្ដ្រីប្រតិបត្ដិសាខាជាច្រើនរូបទៀត ។
ព្រះបញ្ញាបទិបោ ហោ សុខុន បានមានព្រះថេរដីកាសម្តែងនូវការកោតសរសើរ និងគាំទ្ររាល់សកម្មភាពមនុស្សធម៌របស់កាកបាទក្រហមកម្ពុជា ក្រោមការដឹកនាំដ៏ខ្ពង់ខ្ពស់ប្រកបដោយភាពត្រឹមត្រូវនៃលោកជំទាវកិត្ដិព្រឹទ្ធបណ្ឌិត ប៊ុន រ៉ានី ហ៊ុន សែន ជាប្រធាន ព្រមទាំងបញ្ជាក់ថាដោយឃើញប្រជាពលរដ្ឋយើងនៅតាមបណ្ដាមូលដ្ឋានមួយចំនួនបានទទួលរងគ្រោះដោយសារទឹកជំនន់ ជាពិសេសក្នុងរាជធានីភ្នំពេញយើងនេះ ទើបព្រះអង្គរួមនឹងព្រះសង្ឃ គណៈកម្មការអាចារ្យវត្ដបានមូលមតិគ្នាប្រមែប្រមូលទេយ្យទានដែលបានពីសទ្ធាជ្រះថ្លានៃពុទ្ធបរិស័ទប្រគេនដល់ព្រះអង្គមករួមចំណែកជាមួយកាកបាទក្រហមសាខារាជធានីភ្នំពេញ ដើម្បីជួយសំរាលការលំបាករបស់ប្រជាពលរដ្ឋយើងដែលទទួលរងគ្រោះ ។
លោកប៉ា សុជាតិវង្ស បានមានប្រសាសន៍ពាំនាំការផ្ដាំផ្ញើសាកសួរសុខទុក្ខពីលោកជំទាវកិត្ដិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហម និងថ្លែងអំណរព្រះគុណដ៏ជ្រាលជ្រៅបំផុតចំពោះព្រះបញ្ញាបទិបោហោ សុខុន ព្រះសង្ឃ គណៈកម្មការ អាចារ្យវត្ដទាំងអស់ ដែលបានប្រគល់ទេយ្យទានជូនដល់សាខារាជធានីភ្នំពេញចំពេលដែលសាខាកំពុងត្រូវការក្នុងការជួយសង្គ្រោះដល់ប្រជាពលរដ្ឋយើងដែលកំពុងរងគ្រោះដោយសារទឹកជំនន់នៅតាមបណ្ដាមូលដ្ឋានមួយចំនួនដែលនេះបានសបញ្ជាក់ឱ្យឃើញពីការផ្សារភ្ជាប់គ្នាពីវិស័យពុទ្ធចក្រ និងអាណាចក្រដែលជាសិល្បៈនៃការចែករំលែកដ៏ល្អក្នុងការជួយគ្នាទៅវិញទៅមករបស់ខ្មែរយើង ។
លោកបានជំរាបប្រគេនអំពីស្ថានភាពទឹកជំនន់នៅរាជធានីភ្នំពេញមានប្រជាពលរដ្ឋរងគ្រោះសរុបចំនួន១៨.០០០គ្រួសារ ហើយកន្លងមក កាកបាទក្រហមសាខារាជធានីភ្នំពេញ និងអាជ្ញាធរបាននាំយកអំណោយសង្គ្រោះទៅចែកជូនដើម្បីជួយសំរាលការលំបាកចំពោះមុខបានជិត១ម៉ឺនគ្រួសារមកហើយ និងសល់ជាង៨ពាន់គ្រួសារទៀតកំពុងនិងបន្ដចែកជូន ។
ចុងបញ្ចប់លោកប្រធានគណៈកម្មាធិការសាខាសន្យាថា សាខានឹងពាំនាំយកទេយ្យទានទាំងនេះទៅជួយឱ្យដល់ដៃប្រជាពលរដ្ឋយើងដែលកំពុងរងគ្រោះដោយសារទឹកជំនន់ ក៏ដូចជាទទួលរងគ្រោះដោយគ្រោះមហន្ដរាយផ្សេងៗឱ្យស្របតាមគោលការណ៍គ្រឹះទាំង៧ប្រការនៃចលនាកាកបាទក្រហម ក៏ដូចឱ្យស្របតាមទឹកព្រះទ័យ ទឹកចិត្ដរបស់ព្រះបញ្ញាបទិបោហោ សុខុន ព្រះសង្ឃ គណៈកម្មការអាចារ្យវត្ដទាំង
អស់ ។
ជាការកត់សម្គាល់ពិសេសនោះព្រះគ្រូចៅអធិការវត្តច្បារអំពៅព្រះនាមហោ សុខុន បានចូលរួមឧបត្ថម្ភជាធនធានសម្រាប់ជួយទ្រទ្រង់សង្គមជាតិ ក្រោមមាគ៌ាដឹកនាំប្រកបដោយគតិបណ្ឌិតរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដូចជាជួយឧបត្ថម្ភដល់កងទ័ពនៅសមរភូមិមុខតំបន់ប្រាសាទព្រះវិហារចំនួន៤លើកមកហើយ ។ ជាងនេះ ទៅទៀត កាលពីពេលថ្មីៗកន្លងមកនេះ ព្រះអង្គបាននាំយកអំណោយចែកប្រជាពលរដ្ឋដែលរងគ្រោះដោយសារទឹកជំនន់នៅក្នុងភូមិសាស្ត្រខណ្ឌមានជ័យ និងខេត្តស្វាយរៀង រួមទាំងចូលរួមឧបត្ថម្ភថវិកាដល់អនុសាខាកាកបាទក្រហម សង្កាត់ច្បារអំពៅទី២ និងកាកបាទក្រហមខណ្ឌមានជ័យ ដែលសរុបជាថវិកាចំណាយលើការចូលរួមជាមួយសង្គមជាតិ មានចំនួនជាង២០០លានរៀល ។
ក្រោយថ្ងៃបុណ្យកឋិនទាននៅវត្តច្បារអំពៅនាថ្ងៃទី៧ វិច្ឆិកា ឆ្នាំ២០១១ ព្រះតេជគុណសន្យាជួយឧបត្ថម្ភសម្ភារ និងថវិកាដល់សាខាកាកបាទក្រហមរាជធានីភ្នំពេញម្តងទៀត ៕
ចែករំលែកព័តមាននេះ