ខេត្តសៀមរាប ៖ គ្រឿងឧបភោគបរិភោគ និងផលិតផលក្លែងបន្លំខូចគុណភាពរួមមាន សាប៊ូដបម៉ាក «ពពែសឈរ» ចំនួន៥០ដប ព្រមទាំងទឹកម្ទេសចំនួន១៦២ដប និងស្លាកសញ្ញាចំនួន២៤.២០០សន្លឹក ត្រូវបានមន្ត្រីជំនាញការិយាល័យនគរបាលប្រឆាំងបទល្មើសសេដ្ឋកិច្ចនៃស្នងការដ្ឋានខេត្តធ្វើការដុតកំទេចចោលនៅទីលានចាក់សំរាមក្នុងភូមិអន្លង់២ ឃុំត្រពាំងធំ ស្រុកប្រាសាទបាគង កាលពីវេលាម៉ោង១២ថ្ងៃត្រង់ ថ្ងៃទី២១ តុលា កន្លងទៅ។
លោកវរសេនីយ៍ទោ សឿន សេន នាយការិយាល័យប្រឆាំងបទល្មើសសេដ្ឋកិច្ចខេត្តបានឱ្យដឹងថា ការដុតកំទេចចោលគ្រឿងឧបភោគបរិភោគ និងទំនិញក្លែងបន្លំ-ខូចគុណភាពនេះ គឺធ្វើឡើងបន្ទាប់ពីកំលាំងសមត្ថកិច្ចធ្វើការត្រួតពិនិត្យ និងដកហូតកន្លងមក។
ទឹកម្ទេសចំនួន១៦២ដប និងស្លាកសញ្ញាចំនួន២៤.២០០សន្លឹក ត្រូវបានដកហូតពីសិប្បកម្មមួយនៅក្នុងភូមិវត្តស្វាយ សង្កាត់សាលាកំរើក ក្រុងសៀមរាប និងសិប្បកម្មមួយទៀតនៅក្នុងភូមិគោកត្រាច ឃុំបាគង ស្រុកប្រាសាទបាគង៉។ ដោយឡែកសាប៊ួដបម៉ាកពពែសឈរ ចំនួន៥០ដប ដែលជាផលិតផលក្លែងបន្លំ គឺត្រួតពិនិត្យដកហូតពីទីតាំងស្តុកលក់ចែកចាយមួយកន្លែងក្នុងភូមិទ្រាំង សង្កាត់ស្លក្រាម ក្រុងសៀមរាប ដែលជនខិលខូចប្រមូលទិញយកដបចាស់ៗមកច្រកទឹកសាប៊ូបន្លំខុសពីស្តង់ដាដើម ហើយដឹកជញ្ជូនលក់ចែកចាយនៅតាមបណ្តាខេត្ត-ក្រុង។
ទីតាំងធំដែលជនខិលខូចផលិតសាប៊ូដបក្លែងបន្លំម៉ាក«ពពែសឈរ» គឺនៅក្នុងរាជធានីភ្នំពេញ ប៉ុន្តែបានត្រូវសមត្ថកិច្ចនគរបាលរាជធានីភ្នំពេញ ធ្វើការបង្ក្រាបឃាត់ខ្លួនជនល្មើស និងកសាងសំណុំរឿងបញ្ជូនទៅសាលាដំបូងរួចហើយ ហើយដោយមានកិច្ចសហការចង្អុលបង្ហាញពីសំណាក់តំណាងក្រុមហ៊ុនជាដើមបណ្តឹង ទើបសមត្ថកិច្ចត្រួតពិនិត្យដកហូតបានផលិតផលក្លែងបន្លំខូចគុណភាពដូចខាងលើ។ លោកវរសេនីយ៍ទោ សឿន សេន បានសំណូមពរដល់បងប្អូនប្រជាពលរដ្ឋទាំងក្នុង និងក្រៅខេត្ត មុនពេលទិញផលិតផលផ្សេងៗដូចជាគ្រឿងសំអាង ឬថ្នាំពេទ្យជាដើមត្រូវត្រួតពិនិត្យមើលកាលបរិច្ឆេទឱ្យបានច្បាស់លាស់ត្រឹមត្រូវចៀសវាងប៉ះចំលើទំនិញក្លែងបន្លំ និងខូចគុណភាព៕
ចែករំលែកព័តមាននេះ