ខេត្តបាត់ដំបង ៖ អំពើហិង្សាដ៏កំរោលមួយរវាងឪពុកក្មេក និងកូនប្រសា បានប្រយុទ្ធគ្នាយកឈ្នះ-ចាញ់ ពេលផឹកស្រវឹង ហើយអួតដាក់គ្នាពីរឿងកាប់មិនមុត ដុតមិនឆេះ រួចហើយក៏វាយកាប់ចាក់គ្នាផ្អើលអ្នកភូមិតែម្តង ដែលការប្រទូស្តរ៉ាយគ្នានេះកើតឡើងកាលពីវេលាជិតពាក់កណ្តាលអាធ្រាត្រថ្ងៃទី១៩ មីនា ២០១១ នៅខាងមុខផ្ទះរបស់ពួកគេស្ថិតក្នុងភូមិក្តុលតាហែន ស្រុកបវេល ។
ការប្រយុទ្ធគ្នាដ៏អាក្រក់រវាងឪពុកក្មេក និងកូនប្រសា ពេលស្រវឹងនេះ ទីបំផុតបុរសជាឪពុកត្រូវសមត្ថកិច្ចចាប់ខ្លួន រីឯកូនប្រសាត្រូវបញ្ជូនទៅសង្គ្រោះបន្ទាន់នៅមន្ទីរពេទ្យព្រោះរងរបួសធ្ងន់ ។ លោកឌី សារ៉េត អធិការរងស្រុកបវេលបានថ្លែងថា ឪពុកក្មេកឈ្មោះសៀង សីហា អាយុ៤២ឆ្នាំ និងកូនប្រសាប្រុសឈ្មោះតុំ ឡុញ អាយុ២៩ឆ្នាំ រងរបួសក្បាល និងដងខ្លួនច្រើនកន្លែង ត្រូវបញ្ជូនទៅសង្គ្រោះនៅមន្ទីរពេទ្យ។ លោកឌី សារ៉េត បានបញ្ជាក់ថា មូលហេតុនៃជម្លោះនេះកើតឡើងដោយពួកគេស្រវឹងរៀងៗខ្លួន ហើយអួតដាក់គ្នា ពីរឿងថា ពួកគេមាន «កណ្តាញ់» បាញ់មិនមុតដុតមិនឆេះ ។ លុះពេលប្រកែកគ្នាតឹងសរសៃ.ក ឪពុកក្មេកទំនងចាញ់ប្រៀបក៏ស្ទុះទៅប្រតាយប្រតប់គ្នា ហើយឪពុកក្មេកទាញបានកាំភ្លើងច្នៃបាញ់កណ្តុរ ក៏វាយទៅលើកូនប្រសា រហូតទាល់តែរបួសធ្ងន់ ទើបត្រូវសមត្ថកិច្ចចាប់ខ្លួនតែម្តង ៕
ចែករំលែកព័តមាននេះ