ខេត្តកំពត ៖ អំណោយជាគ្រឿងឧបភោគបរិភោគមួយចំនួនមានមី អង្ករ អំបិល ទឹកត្រី និងសម្ភារប្រើប្រាស់មានកន្ទេល មុង ភួយ របស់លោកនាយឧត្តមសេនីយ៍នេត សាវឿន អគ្គស្នងការនគរបាលជាតិ តាមរយៈលោកនាយឧត្តមសេនីយ៍ត្រីថ្លាង ភិរិន្ទ ស្នងការនគរបាលខេត្តកំពត ត្រូវបានចាត់ចែងប្រគល់ជូនចំពោះគ្រួសារជនរងគ្រោះចំនួនពីរគ្រួសារ ដែលរងគ្រោះដោយទឹកជំនន់ និងខ្យល់ព្យុះរលំផ្ទះ កាលពីវេលាយប់ថ្ងៃទី១៨ តុលា ២០១១ កន្លងទៅនៅភូមិជ្រុងស្រឡៅ ឃុំស្តេចគង់ខាងជើង ស្រុកបន្ទាយមាស។
អំណោយទាំងអស់ខាងលើត្រូវបានលោកវរសេនីយ៍ត្រីស្រ៊ុន ឡាំ អធិការនគរបាលស្រុកបន្ទាយមាស យកទៅចែកជូនដល់គ្រួសារជនរងគ្រោះទាំង២គ្រួសារ ដោយផ្ទាល់ដៃ នៅថ្ងៃទី២០ តុលា ២០១១ វេលាម៉ោង១០ព្រឹកកន្លងទៅថ្មីៗនេះ ។ ជនរងគ្រោះទាំង២គ្រួសារនេះ មាន១-ឈ្មោះមាស យឿន ភេទស្រី អាយុ៦៩ឆ្នាំ ២-ឈ្មោះមាស ផុន ភេទប្រុស អាយុ៦៣ឆ្នាំក្នុងគ្រួសារនីមួយៗ ទទួលបានអង្ករ២៥គីឡូក្រាម មី២កេស អំបិល៥គីឡូក្រាម ទឹកត្រី២ដប កន្ទេល១ មុង១ និងភួយ១។
លោកស្រ៊ុន ឡាំ អធិការនគរបាលស្រុកបន្ទាយមាស តាមរយៈការផ្តល់អំណោយ និងការផ្តាំផ្ញើសាកសួរសុខទុក្ខដល់បងប្អូនដែលរងគ្រោះដោយគ្រោះធម្មជាតិ ពីនាយឧត្តមអគ្គស្នងការនគរបាលជាតិសូមពាំនាំការសាកសួរសុខទុក្ខដល់បងប្អូនដែលកំពុងជួបការលំបាក និងផ្តល់ជូននូវអំណោយជាស្បៀង និងសម្ភារប្រើប្រាស់មួយចំនួននេះ គ្រាន់នឹងជួយរំលែកទុក្ខដល់បងប្អូនបានមួយគ្រាផងដែរ ៕
ចែករំលែកព័តមាននេះ