រាជធានីភ្នំពេញ ៖ គណៈកម្មាធិការជាតិរៀបចំការបោះឆ្នោត (គ.ជ.ប) បានសម្រេចទទួលស្គាល់លោកសាន សាង ជាបេក្ខជនជាប់ឆ្នោតតំណាងរាស្ត្រមណ្ឌលខេត្តតាកែវ សម្រាប់អាណត្តិទី៤ ជំនួសលោកតុ វ៉ាន់ចាន់ ដែលបានបាត់បង់សមាជិកភាពពីគណបក្សសម រង្ស៊ី បន្ទាប់ពីទទួលបានសំណើរបស់គណបក្សសម រង្ស៊ី សុំផ្លាស់ប្តូរបេក្ខជនតំណាងរាស្ត្រ ចុះថ្ងៃទី១០ តុលា ឆ្នាំ២០១១។
ការសម្រេចនេះ គ.ជ.ប បានធ្វើឡើងនៅក្នុងកិច្ចប្រជុំកាលពីថ្ងៃទី១៥ តុលា ឆ្នាំ២០១១ ដោយអនុវត្តតាមមាត្រា៩៥ នៃរដ្ឋធម្មនុញ្ញមាត្រា១២០ថ្មី នៃច្បាប់ស្តីពីការបោះឆ្នោតជ្រើសតាំងតំណាងរាស្ត្រ និងមាត្រា១៦នៃច្បាប់ស្តីពីគណបក្សនយោបាយ ប្រការ៨៣ថ្មី នៃបទបញ្ជាផ្ទៃក្នុងនៃរដ្ឋសភា ហើយបានទទួលស្គាល់លោកសាន សាង បេក្ខជនជាប់ឆ្នោតតំណាងរាស្ត្រអាណត្តិទី៤ នៃគណបក្សសម រង្ស៊ី នៅមណ្ឌលខេត្តតាកែវ ជំនួសលោកតុ វ៉ាន់ចាន់។
ទាក់ទងនឹងករណីខាងលើនេះ នៅថ្ងៃទី១៧ តុលា ឆ្នាំ២០១១ គ.ជ.ប បានចេញលិខិតពីរដាច់ដោយឡែកពីគ្នា ដោយលិខិតមួយជាសេចក្តីសម្រេចលុបឈ្មោះលោកតុ វ៉ាន់ចាន់ បេក្ខជនជាប់ឆ្នោតតំណាងរាស្ត្រមណ្ឌលខេត្តតាកែវ និងសេចក្តីសម្រេចទទួលស្គាល់លោកសាន សាង ជាបេក្ខជនជាប់ឆ្នោតតំណាងរាស្ត្រមណ្ឌលខេត្តតាកែវ និងលិខិតមួយទៀតជម្រាបជូនទៅលោកអៀង សៀង ចៅក្រមសាលាដំបូងរាជធានីភ្នំពេញថា គ.ជ.ប បានទទួលស្គាល់លោកសាន សាង ជាបេក្ខជនជាប់ឆ្នោតតំណាងរាស្ត្រមណ្ឌលខេត្តតាកែវ សម្រាប់អាណត្តិទី៤ ជំនួសលោកតុ វ៉ាន់ចាន់ ។
ជាមួយគ្នានេះ កាលពីថ្ងៃទី១៥ តុលា ឆ្នាំ២០១១ គណៈកម្មាធិការជាតិរៀបចំការបោះឆ្នោត (គ.ជ.ប) បានបើកកិច្ចប្រជុំពិនិត្យលើសំណើរបស់គណបក្សសម រង្ស៊ី ចុះថ្ងៃទី១៤ តុលា ឆ្នាំ២០១១ សុំផ្លាស់ប្តូរបេក្ខជនជាប់ឆ្នោតសមាជិកព្រឹទ្ធសភា មកពីគណបក្សសម រង្ស៊ី គឺ សុំឱ្យ គ.ជ.ប ទទួលស្គាល់លោកយូ ពេជ្រគង់ ជាបេក្ខជនជាប់ឆ្នោតសមាជិកព្រឹទ្ធសភាមកពីគណបក្សសម រង្ស៊ី មណ្ឌលភូមិភាគទី២ ខេត្តកំពង់ចាម ជំនួសលោកវ៉ាន់ ស៊ីវឿន។
ជាលទ្ធផល កិច្ចប្រជុំ គ.ជ.ប បានសម្រេចមិនទទួលស្គាល់លោកយូ ពេជ្រគង់ ជាបេក្ខជនជាប់ឆ្នោតសមាជិកព្រឹទ្ធសភា មកពីគណបក្សសម រង្ស៊ី ។ ការសម្រេចបែបនេះដោយសម្អាងមាត្រា៣១នៃច្បាប់ស្តីពីការបោះឆ្នោតជ្រើសតាំងសមាជិកព្រឹទ្ធសភា ដែលចែងថា កាលបើសមាជិកព្រឹទ្ធសភាណាមួយត្រូវបាត់បង់សមាជិកភាពមានរយៈពេល៦ (ប្រាំមួយ) ខែយ៉ាងតិចមុនចប់នីតិកាល សាមីគណបក្សនយោបាយនោះអាចស្នើជ្រើសតាំងសមាជិកថ្មីជំនួស ដោយជ្រើសរើសក្នុងចំណោមបេក្ខជនដែលមានឈ្មោះតាមលំដាប់លេខរៀង ក្នុងបញ្ជីបេក្ខជនឈរឈ្មោះបោះឆ្នោតនៃមណ្ឌលបោះឆ្នោតរបស់សាមីខ្លួននោះ មកជំនួសដោយមិនចាំបាច់បោះឆ្នោតឡើងវិញ ។ សូមបញ្ជាក់ថា តាមប្រតិទិនការបោះឆ្នោតជ្រើសតាំងសមាជិកព្រឹទ្ធសភានីតិកាលទី៣ នឹងប្រព្រឹត្តទៅនៅថ្ងៃទី២៩ មករា ឆ្នាំ២០១២ ខាងមុខ៕
ចែករំលែកព័តមាននេះ