តួលេខរោងចក្រសរុបដែលត្រូវទឹកជន់លិចនៅក្នុងប្រទេសថៃមានចំនួន១៤.១៧២រោងចក្រ ស្ថិតក្នុងខេត្តចំនួន២០ ហើយវាបានប៉ះពាល់ដល់កម្មករចំនួន៦៦៣.២១៨នាក់។ នេះបើតាមប្រសាសន៍លោកArthit Ismo នាយកគ្រប់គ្រងទូទៅនៃនាយកដ្ឋានការពារនិងសុខមាលភាពការងារ។
ក្នុងខេត្ត Pathum Thani តែមួយមានរោងចក្រចំនួន៣.៣២៦កន្លែងត្រូវជន់លិច និងប៉ះពាល់ដល់កម្មករចំនួន២១៨.៤៧៤នាក់។ ទឹកបានជន់លិចចូលតំបន់ឧស្សាហកម្ម Nava Nakhorn កាលពីថ្ងៃចន្ទ ទី១៧ តុលា និងបានជន់លិចរោងចក្រចំនួន២២៧កន្លែង ព្រមទាំងប៉ះពាល់កម្មករជាង១៧៥.០០០នាក់។ ក្នុងខេត្តអាយុធ្យា រោងចក្រចំនួន៣០ដែលជន់លិចក្នុងតំបន់ឧស្សាហកម្មBang Pa-In និង Rojana នឹងបន្តបើកប្រាក់ខែដល់បុគ្គលិកដដែល។ មានក្រុមហ៊ុនចំនួន១៥បានអះអាងថា ពួកគេនឹងបើកប្រាក់ពេញ១០០ភាគរយដល់បុគ្គលិក ចំណែកក្រុមហ៊ុន១៤ផ្សេងទៀតសុំបើកដល់បុគ្គលិកតែ៧៥ភាគរយ ចំណែកក្រុុមហ៊ុនផ្សេងៗទៀតបើកតែ៥០ភាគរយ។
លោក Arthit បានព្យាករណ៍ថា មានបុគ្គលិក១សែននាក់ក្នុងខេត្តអាយុធ្យាកំពុងរងគ្រោះ ថ្នាក់នៃការបាត់បង់ការងារ។ លោកនៅមិនទាន់អាចប៉ាន់ប្រមាណបានពីចំនួនកម្មករក្នុងខេត្តPathum Thani ដែលរងផលប៉ះពាល់ក្នុងពេលនេះទេ ដោយសារលោកត្រូវតាមដានស្ថានភាពទឹកជំនន់ប្រមាណពី៥ទៅ៦ថ្ងៃបន្តទៀត។
តំបន់ឧស្សាហកម្មBang Kradi ប្រហែលជាទីតាំងវាយប្រហារបន្ទាប់
តំបន់ឧស្សាហកម្មBang Kradi ក្នុងសង្កាត់Muang ខេត្តPathum Thani ប្រហែលជាកន្លែងបន្ទាប់នៃការជន់លិចដោយទឹកជំនន់នៃតំបន់Nava Nakhorn ។ នេះបើតាម ការប៉ាន់ប្រមាណរបស់លោកប្រធាននាយកដ្ឋានធារាសាស្ត្រកាលពីថ្ងៃអង្គារ ទី១៨ តុលា។
លោកVeera Wongsaengnak ទីប្រឹក្សានៃនាយកដ្ឋានធារាសាស្ត្រនិយាយថា តំបន់ឧស្សាហកម្ម Bang Kradi គឺស្ថិតនៅក្នុងតំបន់លិចទឹក ហើយទំនប់ការពារទឹកជំនន់ក៏ទន់ខ្សោយ។ ទឹកប្រហែលជានឹងហូរទៅដល់តំបន់ឧស្សាហកម្ម ហេតុនេះរោងច្រកទាំងនោះត្រូវតែបិទទ្វារ ហើយពួកគេត្រូវលើកម៉ាស៊ីនឱ្យបានកម្ពស់៧០សង្ទីម៉ែត្រ។
ក្រុមហ៊ុនរួមគ្នារវាងជប៉ុននិងថៃ៤០០ ត្រូវបានបំផ្លាញដោយទឹកជំនន់ទឹកជំនន់នៅប្រទេសថៃនៅតែបន្តបំផ្លិចបំផ្លាញ ប្រជាពលរដ្ឋនិងសេដ្ឋកិច្ច។ ក្រុមហ៊ុនរួមគ្នារវាងថៃនិងជប៉ុនចំនួន៤០០ ដែលស្ថិតនៅក្នុងតំបន់ឧស្សហកម្មត្រូវរងប៉ះពាល់ដោយជំនន់ទឹកភ្លៀង។ អ្នកផលិតខ្លះមិនអាចចែកចាយទំនិញតាមការបញ្ជាទិញឱ្យបានទាន់ពេល ហើយក្រុមហ៊ុនផលិតរថយន្តធំៗរបស់ប្រទេសជប៉ុនត្រូវបង្ខំចិត្តបិទទ្វារមួយរយៈ។
ចំនួនសរុបនៃក្រុមហ៊ុនរួមរបស់ប្រទេសជប៉ុន មានចំនួន៤៣០កន្លែងត្រូវទឹកជន់លិច។ តំបន់ឧស្សាហកម្មNava Nakhorn មានរោងចក្រចំនួន១៩០ ក្នុងនោះមានរោងចក្ររួមគ្នាជាមួយប្រទេសជប៉ុន១០០រោងចក្រ ដែលជាក្រុមហ៊ុនផលិតផ្នែកផ្សេងៗនៃរថយន្ត។ កាលពីថ្ងៃចន្ទ ទី១៧ តុលា កម្លាំងទឹកបានបំបែកទំនប់ខ្សាច់ការពារទឹកជំនន់ចំនួន២កន្លែង។
រដ្ឋាភិបាលថៃក៏ចេញបញ្ជាឱ្យបណ្តារោងចក្រ សហគ្រាសទាំងអស់បិទទ្វារ និងជម្លៀសបុគ្គ លិក ចំណែកកងទ័ពត្រូវបានដាក់ពង្រាយដើម្បីរៀបចំទំនប់ជាបណ្តោះអាសន្នកាត់បន្ថយការខូចខាត។ អ្នកវិភាគប៉ាន់ប្រមាណពីការយឺតយ៉ាវនៃផលិតកម្មរបស់រោងចក្រដែលប្រហែលជានៅយូរអង្វែង ហើយក៏អាចមានផលប៉ះពាល់ដល់សេដ្ឋកិច្ចថៃដោយសារទឹកជំនន់នេះដែរ ព្រោះមានការប៉ះពាល់ដល់ GDP របស់ប្រជាជនថៃពី១ទៅ៧ភាគរយ។
ចែករំលែកព័តមាននេះ