នាយករដ្ឋមន្ត្រីទួរគីលោកតៃយីបអ័រ ដូហ្គាន ថ្លែងកាលពីថ្ងៃទី៥ ធ្នូ ថា ទួរគីរង់ចាំជានិច្ចនូវការសុំទោស និងការចេញសងការខូចខាតដល់សកម្មជនទួរគី៩នាក់ ដែលត្រូវស្លាប់នាឆ្នាំនេះ ក្នុងការវាយប្រហាររបស់អ៊ីស្រាអែល លើនាវាដឹកជំនួយមនុស្សធម៌មួយគ្រឿងដែលទៅកាន់ជ្រោយហ្គាហ្សា ។
នាយករដ្ឋមន្ត្រីអ៊ីស្រាអែល លោកបេនចាមីន ណេតាន់យ៉ាហ៊ូ កាលពីថ្ងៃទី៣ ធ្នូ កន្លងមកនេះ បានទូរស័ព្ទទៅកាន់លោកអ័រដូហ្គាន ដើម្បីថ្លែងអំណរគុណចំពោះទួរគីដែលបានបញ្ជូនយន្តហោះទំលាក់ទឹកមកជួយតស៊ូប្រយុទ្ធនឹងភ្លើងឆេះព្រៃយ៉ាងធំ បណ្តាលឱ្យស្លាប់មនុស្សដល់ទៅ៤១នាក់ នៅភាគខាងជើងប្រទេសលោក ។ នេះគឺជាការសន្ទនាគ្នាតាមទូរស័ព្ទលើកដំបូងរវាងមេដឹកនាំទាំង២ ចាប់តាំងពីកងទាហានម៉ារីនអ៊ីស្រាអែលវាយប្រហារលើនាវាឈ្មោះ MAVI MARMARA បណ្តាលឱ្យស្លាប់សកម្មជន៩នាក់ លើនាវានេះមក ។
លោកអ័រដូហ្គាន ថ្លែងថា ពេលនេះមនុស្សមួយចំនួនទើបនិយាយថា ត្រូវបើកទំព័រថ្មីមួយ តែមុនពេលបើកទំព័រថ្មីនេះ គេត្រូវគិតទៅដល់បងប្អូនយើង៩នាក់ ដែលស្លាប់ដោយទុក្ករកម្មលើនាវា MAVI MARMARA ។ ដំបូងត្រូវមានការសុំទោសរួចត្រូវមានការចេញសងការខូចខាត ។
អាជ្ញាធរអ៊ីស្រាអែលនិយាយថា ខ្លួននឹងមិនធ្វើការសុំទោសឡើយ ៕
ចែករំលែកព័តមាននេះ