រាជធានីភ្នំពេញ ៖ ក្រសួងកសិកម្មបានចេញលិខិតជូនដំណឹងដល់គ្រប់ក្រុមហ៊ុនអាជីវកម្មនាំចូល ផលិត និងវេចខ្ចប់ជាថ្មីលើសម្ភារកសិកម្មទាំងអស់រួមមានជីកសិកម្ម ថ្នាំកសិកម្ម គ្រាប់ពូជដំណាំ ចំណីសត្វ និងបសុឱសថត្រូវធ្វើការចុះបញ្ជីនូវមុខសម្ភារកសិកម្មទាំងអស់នោះ និងបំពេញនូវលក្ខខណ្ឌបច្ចេកទេសមួយចំនួនទៀត។ ក្នុងនោះបានតម្រូវឱ្យមានការបកប្រែជាភាសាខ្មែរនៅលើសំបកវេចខ្ចប់សម្ភារកសិកម្ម ក្នុងន័យសំខាន់ដើម្បីកំណត់នូវអត្តសញ្ញាណប្រភេទមុខសម្ភារកសិកម្មនីមួយៗ បង្ហាញពីរបៀបប្រើប្រាស់សម្ភារកសិកម្មឱ្យចំគោលដៅ ប្រើប្រាស់ក្នុងការកម្ចាត់នូវសមាសភាពចង្រៃទៅតាមប្រភេទដំណាំនីមួយៗ ក៏ដូចជាការជួយសម្រួលដល់កសិករ អាចទិញសម្ភារកសិកម្មយកទៅប្រើប្រាស់បានត្រឹមត្រូវ ព្រមទាំងធានានូវគុណភាព ប្រសិទ្ធភាព និងសុវត្ថិភាពផងដែរ។ នៅពេលធ្វើការចុះបញ្ជិកាផលិតផលសម្ភារកសិកម្មរបស់ខ្លួន ក្រុមហ៊ុនអាជីវកម្មនាំចូលផលិត និងវេចខ្ចប់ជាថ្មីសម្ភារកសិកម្ម បានបំពេញនូវកាតព្វកិច្ចរបស់ខ្លួន ដោយបានធ្វើការជូនភ្ជាប់នូវគំរូស្លាកសញ្ញាសំបកវេចខ្ចប់សម្ភារកសិកម្មបកប្រែជាភាសាខ្មែរ ។ ការចាត់វិធាន ការនេះដោយសារក្រសួងកសិកម្ម រុក្ខា ប្រមាញ់ និងនេសាទ បានសង្កេតឃើញថា មានក្រុមហ៊ុនអាជីវកម្មសម្ភារកសិកម្មមួយចំនួនមិនបានអនុវត្តបទបញ្ជាស្របតាមការកំណត់របស់ក្រសួងឡើយ ដោយបានធ្វើការនាំចូូល ផលិត វេចខ្ចប់ជាថ្មី និងធ្វើការផ្គត់ផ្គង់ចែកចាយសម្ភារកសិកម្មដែលបានចុះបញ្ជិការួច ប៉ុន្តែមានស្លាកសញ្ញាលើសំបកវេចខ្ចប់នៅតែជាភាសាបរទេស ឬខុសពីការអះអាងនៅពេលស្នើសុំចុះបញ្ជិកា ។
ចំពោះមុខ ក្នុងគោលបំណងធានាបាននូវភាពស្របច្បាប់និងដើម្បីការពារផលប្រយោជន៍ដល់កសិករ និងអ្នកប្រើប្រាស់សម្ភារកសិកម្មគ្រប់់ប្រភេទនៅក្នុងផលិតផលកសិកម្ម ឱ្យឆ្លើយតបទៅនឹងគោលនយោបាយជំរុញផលិតកម្មស្រូវនិងការនាំចេញអង្កររបស់រាជរដ្ឋាភិបាល ក្រសួងកសិកម្ម រុក្ខាប្រមាញ់ និងនេសាទ សូមធ្វើការណែនាំនិងដាក់បទបញ្ជាដល់បណ្តាក្រុមហ៊ុនអាជីវកម្មនាំចូល ផលិត និងវេចខ្ចប់ជាថ្មីសម្ភារកសិកម្មទាំងអស់ថា ចាប់ពីពេលនេះតទៅ ក្រសួងកសិកម្ម រុក្ខាប្រមាញ់ និងនេសាទ នឹងបដិសេធលើរាល់សំណើសុំនាំចូលសម្ភារកសិកម្មរបស់ក្រុមហ៊ុននាំចូលទាំងឡាយណាដែលមិនបានភ្ជាប់គំរូសំបកវេចខ្ចប់ជាក់ស្តែង ដែលមានស្លាកសញ្ញាព័ត៌មានជាភាសាខ្មែរត្រឹមត្រូវ និងបានទទួលស្គាល់នៅពេលចុះបញ្ជិការួច ។ ក្នុងករណីក្រុមហ៊ុននៅតែប្រើប្រាស់ស្លាកសញ្ញាព័ត៌មានជាភាសាបរទេសលើសំបកវេចខ្ចប់សម្ភារកសិកម្មដែលនាំចូល ផលិត ឬវេចខ្ចប់ជាថ្មីជាក់ស្តែង ហើយធ្វើការផ្គត់ផ្គង់ចែកចាយលើទីផ្សារផ្ទុយពីនីតិវិធីដែលបានកំណត់ នោះក្រសួងកសិកម្ម រុក្ខាប្រមាញ់ និងនេសាទនឹងចាត់វិធានការបញ្ឈប់អាជីវកម្មរបស់ក្រុមហ៊ុន ដោយលុបចោលនូវលិខិតអនុញ្ញាតធ្វើអាជីវកម្ម វិញ្ញាបនបត្របញ្ជាក់បញ្ជិកា និងលិខិតអនុញ្ញាតឱ្យនាំចូល ឬអនុវត្តចំណាត់ការតាមផ្លូវតុលាការ។
លិខិតនោះ ត្រូវបានក្រសួងកសិកម្មធ្វើការផ្សព្វផ្សាយនៅទីស្តីការក្រសួងរបស់ខ្លួនកាលពីថ្ងៃទី១២ តុលា កន្លងមក ក្នុងពិធីបើកសិក្ខាសាលាស្តីពីព័ត៌មានបង្ហាញផ្លូវ និងកាតព្វកិច្ចពាណិជ្ជកម្មសម្ភារកសិកម្ម ក្រោមអធិបតីភាពលោកបណ្ឌិតច័ន្ទ សារុន រដ្ឋមន្ត្រីក្រសួងកសិកម្ម រុក្ខាប្រមាញ់និងនេសាទ ។
លោករដ្ឋមន្ត្រីច័ន្ទ សារុន បានថ្លែងថា មកដល់បច្ចុប្បន្ននេះ ពិតមែនតែក្រសួងកសិកម្ម រុក្ខាប្រមាញ់ និងនេសាទ បានជំរុញការអនុវត្តកម្មវិធីផ្សព្វផ្សាយអប់រំការយល់ដឹងដល់ពាណិជ្ជករ សម្ភារកសិកម្ម និងបានជំរុញការអនុវត្តច្បាប់លើការធ្វើពាណិជ្ជកម្មសម្ភារកសិកម្មនៅតាមរាជធានី ខេត្ត ដោយបានចាត់វិធានការទណ្ឌកម្មលើក្រុមហ៊ុននាំចូលផ្គត់ផ្គង់ចែកចាយ និងមូលដ្ឋានអាជីវកម្មខុសច្បាប់ជាច្រើនករណីក៏ដោយ ក៏ក្រសួងនៅតែទទួលស្គាល់ថា នៅជួបបញ្ហាប្រឈមជាច្រើនទៀតក្នុងការគ្រប់គ្រងការធ្វើពាណិជ្ជកម្មសម្ភារកសិកម្ម ដូចជា ៈ
១-សម្ភារកសិកម្មមួយចំនួននៅតែនាំចូលពីបណ្តាប្រទេសជិតខាងដោយល្មើសច្បាប់ និងចរាចរនៅលើទីផ្សារដោយគ្មានការធានាបមាណីយគុណភាព និងគ្មានស្លាកសញ្ញាព័ត៌មានជាភាសាខ្មែរ ឬភាគច្រើនមានជាភាសាបរទេសលើសំបកវេចខ្ចប់ ។
២-សម្ភារកសិកម្មមួយចំនួនត្រូវបានពាណិជ្ជករដែលទទួលផ្គត់ផ្គង់ចែកចាយបន្តពីក្រុមហ៊ុននាំចូល ឬពាណិជ្ជករលក់ដុំលក់រាយផ្ទាល់តាមបណ្តាដេប៉ូក្នុងរាជធានី-ខេត្ត បានធ្វើការលាយផ្សំក្លែងគុណភាព ឬប្តូរសំបកវេចខ្ចប់ ឬត្រូវបានដឹកជញ្ជូនចល័តលក់ឬលក់បណ្តាក់តាមភូមិ-ឃុំដល់កសិករផ្ទាល់ដោយអសីលធម៌បំផុត ។
៣-ក្រុមហ៊ុនមួយចំនួនដែលបានទទួលលិខិតអនុញ្ញាតឱ្យនាំចូល និងបានចុះបញ្ជិកាប្រភេទសម្ភារកសិកម្មដោយក្រសួងរួចហើយ ប៉ុន្តែនៅពេលនាំចូលជាក់ស្តែង ក្រុមហ៊ុនបាននាំចូលសម្ភារកសិកម្មអន់គុណភាព ជាពិសេសនៅតែប្រើសំបកវេចខ្ចប់ដែលមានស្លាកសញ្ញាព័ត៌មានជាភាសាបរទេស ឬក្រុមហ៊ុនមួួយចំនួនបានផ្ទេរការផ្គត់ផ្គង់ចែកចាយបន្ត ដោយគ្មានការទទួលខុសត្រូវចំពោះការអនុវត្តច្បាប់ឡើយ ។
៤-រាជរដ្ឋាភិបាលបានផ្តល់គោលនយោបាយអនុគ្រោះពន្ធលើការនាំចូលសម្ភារកសិកម្ម ប៉ុន្តែចំពោះមុខ កសិករនៅមិនទាន់ទទួលបាននូវផលប្រយោជន៍នេះនៅឡើយ ផ្ទុយមកវិញកសិករបានចំណាយ ឬបុលប្រាក់ដើម្បីទិញសម្ភារកសិកម្មដែលក្លែងគុណភាព គ្មានប្រសិទ្ធភាព និងមិនអាចយល់បានពីសេចក្តីណែនាំប្រើប្រាស់ជាភាសាបរទេសនៅលើស្លាកព័ត៌មានសំបកវេចខ្ចប់ ឬកសិករនៅតែទិញសម្ភារកសិកម្មដែលមានប្រភពនាំចូលដោយល្មើសច្បាប់តាមរយៈការបោកប្រាស់របស់ពាណិជ្ជករ។
៥-ការអប់រំផ្សព្វផ្សាយការយល់ដឹងចំពោះពាណិជ្ជករលក់ដូរ ក៏ដូចជាចំពោះកសិករដែលប្រើប្រាស់សម្ភារកសិកម្ម ត្រូវបានអនុវត្តនិងបង្កើនសកម្មភាពជារៀងរាល់ឆ្នាំ ប៉ុន្តែការទទួលយកចំណេះដឹង ជាពិសេសការកែប្រែទម្លាប់ ឬប្រពៃណីរបស់ពាណិជ្ជករនិងកសិករ គឺជាការលំបាក និងទាមទារពេលវេលា ។
៦-បញ្ហាក្លែងបន្លំប្រភេទគុណភាព សំបកវេចខ្ចប់ ម៉ាកសញ្ញានៅក្នុងពាណិជ្ជកម្មសម្ភារកសិកម្មរវាងពាណិជ្ជករខ្លួនឯងតែងតែកើតមានជាប្រចាំ ដែលមិនទាន់មានយន្តការដោះស្រាយឱ្យមានប្រសិទ្ធភាពឡើយ ប៉ុន្តែផលវិបាកនៃបញ្ហានេះបានធ្លាក់មកលើកសិករដែលជាអ្នកទទួលរងគ្រោះទៅវិញ ។
ចំពោះសកម្មភាពធ្វើអាជីវកម្មសម្ភារកសិកម្មប្រកបដោយអសីលធម៌ និងអំពើកេងប្រវ័ញ្ចបែបនេះមិនគ្រាន់តែជាអំពើល្មើសនិងបទប្បញ្ញត្តិច្បាប់ប៉ុណ្ណោះទេ ប៉ុន្តែគឺជាទង្វើដោយចេតនាប្រឆាំងនឹងយុទ្ធសាស្ត្រកាត់បន្ថយភាពក្រីក្រ ប្រឆាំងនឹងគោលនយោបាយជំរុញផលិតកម្មស្រូវ និងការនាំចេញអង្កររបស់រាជរដ្ឋាភិបាល និងជាពិសេសគឺជាអំពើវិទ្ធង្សនាសេដ្ឋកិច្ចដោយចំហដែលប្រព្រឹត្តដោយអាជីវករទុច្ចរិតមួយក្រុមតូច និងជារបាំងដ៏សំខាន់ក្នុងការអភិវឌ្ឍសង្គមសេដ្ឋកិច្ចជាតិ និងការលើកកម្ពស់សេដ្ឋកិច្ចមូលដ្ឋានជនបទ ។
លោករដ្ឋមន្ត្រីច័ន្ទ សារុន បន្តថា ក្នុងនាមក្រសួងកសិកម្ម រុក្ខាប្រមាញ់ និងនេសាទ លោកសូមដាក់ចេញនូវវិធានការមួយចំនួនដល់ពាណិជ្ជករសម្ភារកសិកម្ម ដោយត្រូវអនុវត្តកាតព្វកិច្ចដូចខាងក្រោមៈ
១-ត្រូវមានភាពស្មោះត្រង់និងមានសីលធម៌ ក្នុងមុខរបររបស់ខ្លួន ដោយមិនត្រូវប្រព្រឹត្តអំពើក្លែងបន្លំគុណភាព កែច្នៃផលិតផលខុសពីគុណភាពដើម ឬក្លែងបន្លំសំបកវេចខ្ចប់ និងត្រូវចៀសវាងទិញចូលសម្រាប់លក់នូវសម្ភារកសិកម្មដែលរត់ពន្ធឬលួចលាក់នាំចូលពីប្រទេសជិតខាងឬមានប្រភពចេញពីអំពើល្មើសច្បាប់ផ្សេងទៀត។
២-ត្រូវគោរពនិងអនុវត្តរាល់នីតិវិធី បទបញ្ជា និងសេចក្តីណែនាំរបស់ក្រសួងកសិកម្ម រុក្ខាប្រមាញ់ និងនេសាទ ដោយត្រូវសហការល្អជាមួយអង្គភាពនីតិកម្មកសិកម្មមានសមត្ថកិច្ច និងត្រូវចូលរួមតាមដាន ឬត្រូវផ្តល់ព័ត៌មានអំពីបទល្មើសក្លែងបន្លំគុណភាព ក្លែងបន្លំសំបកវេចខ្ចប់សម្ភារកសិកម្ម ដើម្បីមន្ត្រីមានសមត្ថកិច្ចចាត់វិធានការតាមនីតិវិធី ។
៣-ពាណិជ្ជករលក់ដុំលក់រាយ ឬសាខាផ្គត់ផ្គង់ចែកចាយសម្ភារកសិកម្មទាំងអស់នៅតាមបណ្តាខេត្ត រាជធានី ត្រូវមានកាតព្វកិច្ចឆ្លងកាត់វគ្គអប់រំសមត្ថភាពវិជ្ជាជីវៈក្នុងមុខរបររបស់ខ្លួន ត្រូវមានលិខិតអនុញ្ញាតលក់ដុំលក់រាយ និងត្រូវមានបញ្ជីប្រភេទសម្ភារកសិកម្មដែលខ្លួនស្នើសុំលក់ដូរ និងបញ្ជីឈ្មោះក្រុមហ៊ុុនដែលផ្គត់ផ្គង់ផលិតផលទាំងនេះឱ្យដេប៉ូរបស់ខ្លួន ដើម្បីធានាភាពស្របច្បាប់នៃប្រភពសម្ភារកសិកម្មដែលត្រូវលក់ចែកចាយឱ្យកសិករ ។
៤-ពាណិជ្ជករដែលទទួលផ្គត់ផ្គង់ចែកចាយសម្ភារកសិកម្មបន្តពីក្រុមហ៊ុននាំចូលដល់បណ្តាដេប៉ូលក់ដុំលក់រាយក្នុងរាជធានី ខេត្ត ត្រូវមានលិខិតអនុញ្ញាតធ្វើអាជីវកម្មសម្ភារកសិកម្ម ត្រូវមានកិច្ចសន្យាធ្វើជាអ្នកផ្គត់ផ្គង់ចែកចាយរបស់ក្រុមហ៊ុន និងត្រូវមានបញ្ជីឈ្មោះដេប៉ូឬសាខាលក់ដុំលក់រាយតាមរាជធានី ខេត្ត ដែលទទួលយកការផ្គត់ផ្គង់របស់ខ្លួន និងត្រូវទទួលខុសត្រូវរួមចំពោះសាខាលក់ដុំលក់រាយតាមរាជធានី ខេត្ត ដែលទទួលការផ្គត់ផ្គង់របស់ខ្លួន និងត្រូវទទួលខុសត្រូវរួមចំពោះមុខច្បាប់ជាមួយក្រុមហ៊ុននាំចូល និងពាណិជ្ជករលក់ដុំលក់រាយក្នុងខ្សែចង្វាក់ពាណិជ្ជកម្មរបស់ខ្លួន ។
៥-បណ្តាសាខាផ្គត់ផ្គង់ចែកចាយ និងពាណិជ្ជករលក់ដុំលក់រាយសម្ភារកសិកម្ម ត្រូវទិញចូលសម្រាប់លក់តែសម្ភារកសិកម្មណាដែលមានប្រភពស្របច្បាប់តាមប្រព័ន្ធខ្សែចង្វាក់នាំចូលឬផលិតដោយក្រុមហ៊ុនដែលក្រសួងកសិកម្ម រុក្ខា ប្រមាញ់និងនេសាទ បានផ្តល់លិខិតអនុញ្ញាត បានចុះបញ្ជិកាផលិតផលរួច និងត្រូវមានស្លាកសញ្ញាព័ត៌មានជាភាសាខ្មែរនៅលើសំបកវេចខ្ចប់ដែលមានលេខបញ្ជិការបស់ក្រសួងសម្គាល់ជាចាំបាច់ ។
ផ្អែកលើមូលបញ្ហាដូចបានរៀបរាប់ខាងលើលោកសូមឆ្លៀតឱកាសនេះ លើកយកនូវអនុសាសន៍មួយចំនួនបន្ថែមទៀតជាជំនួយស្មារតីជូនអង្គសិក្ខាសាលាធ្វើការពិចារណា និងយកជាគតិដើម្បីប្រតិបត្តិតាមចំណុចដូចខាងក្រោមៈ
១-ក្រុមហ៊ុនដែលប្រកបមុខរបរពាណិជ្ជកម្មសម្ភារកសិកម្មទាំាងអស់ត្រូវស្វែងយល់ និងត្រូវមានការយល់ដឹងអំពីព័ត៌មានបង្ហាញផ្លូវនិងកាតព្វកិច្ចពាណិជ្ជករសម្ភារកសិកម្ម ព្រមទាំងបណ្តានីតិវិធី បទបញ្ជាបច្ចេកទេសក្នុងការធ្វើពាណិជ្ជកម្មសម្ភារកសិកម្ម ជាពិសេសបមាណីយនៃសំបកវេចខ្ចប់ និងស្លាកសញ្ញាព័ត៌មានដែលក្រសួងកសិកម្ម រុក្ខាប្រមាញ់ និងនេសាទ បានលើកជាប្រធានបទសម្រាប់ផ្សព្វផ្សាយក្នុងអង្គសិក្ខាសាលានេះ ។
២-ក្រុមហ៊ុនទាំងអស់ត្រូវពិចារណាលើគំនិតផ្តួចផ្តើមឱ្យមានការចងក្រងជាសមាគមពាណិជ្ជករសម្ភារកសិកម្ម ដើម្បីបង្កើតនូវយន្តការរួមមួយដែលបំពេញតួនាទីក្នុងការសម្របសម្រួលនិងសហប្រតិបត្តិការរវាងផ្នែកឯកជនជាមួយក្រសួងកសិកម្ម រុក្ខាប្រមាញ់ និងនេសាទ និងជាពិសេសគឺការអនុវត្តក្រមសីលធម៌ដែលជាបទបញ្ជាផ្ទៃក្នុងរបស់សមាគម ព្រមទាំងបំពេញតួនាទីជាយន្តការមជ្ឈត្តកម្មក្នុងការដោះស្រាយរាល់ទំនាក់ទំនងរវាងពាណិជ្ជករសម្ភារកសិកម្មនៅក្នុងដំណើរធុរកិច្ចរបស់ខ្លួន ។
៣-ក្រសួងកសិកម្មរុក្ខាប្រមាញ់និងនេសាទ នឹងបំពេញតួនាទីជាអ្នកសម្របសម្រួលក្នុងការបង្កើតសមាគមពាណិជ្ជករសម្ភារកសិកម្ម និងដើម្បីជួយជំរុញឱ្យសមាគមនេះអាចបង្កើតឡើងនិងបំពេញអាណត្តិរបស់ខ្លួនប្រកបដោយជោគជ័យ។
៤-នាយកដ្ឋាននីតិកម្មកសិកម្ម ត្រូវធ្វើបទបង្ហាញ និងពន្យល់ដល់ពាណិជ្ជករសម្ភារ កសិកម្មទាំងអស់នៅក្នុងអង្គសិក្ខាសាលានេះ នូវបណ្តានីតិវិធី និងបទបង្ហាញបច្ចេកទេស ព្រមទាំងការតម្រូវបមាណីយដែលត្រូវអនុវត្តក្នុងពាណិជ្ជកម្មសម្ភារកសិកម្ម ដើម្បីឱ្យបណ្តាក្រុមហ៊ុនពាណិជ្ជកម្មសម្ភារកសិកម្មអាចអនុវត្តបានល្អប្រសើរនូវធុរកិច្ចរបស់ខ្លួន ។
៥-ព័ត៌មានបង្ហាញផ្លូវ ត្រូវជួយសម្រួលដល់ពាណិជ្ជកម្មរបស់ក្រុមហ៊ុន និងត្រូវកាត់បន្ថយរបាំងអសកម្មទាំងឡាយដែលមិនចាំបាច់ ដោយធានាបាននូវតម្លាភាពនៅក្នុងការបម្រើសេវាកម្មសាធារណៈ ការផ្តល់លិខិតអនុញ្ញាត ឬការចុះបញ្ជិកាប្រភេទសម្ភារកសិកម្ម ។
៦-ចំពោះមុខ សូមលោកប្រធានមន្ទីរ និងការិយាល័យជំនាញក្រោមឱវាទ ជំរុញការចាត់វិធានការត្រួតពិនិត្យនិងអនុវត្តច្បាប់ឱ្យបានម៉ឺងម៉ាត់បំផុតចំពោះសកម្មភាពល្មើសច្បាប់ក្នុងការធ្វើអាជីវកម្មជីកសិកម្ម និងថ្នាំកសិកម្មនៅក្នុងមូលដ្ឋានសាមី ដោយត្រូវចាត់វិធានការផ្សព្វផ្សាយអប់រំដល់អាជីវករសម្ភារកសិកម្មនៅក្នុងមូលដ្ឋានសាមីឱ្យបានដាច់ខាតតាមវិធានការគតិយុត្ត និងបច្ចេកទេសនៅក្នុងមុខរបររបស់ខ្លួន និងត្រូវចាត់វិធានការចំពោះមន្ត្រីអសកម្ម និងបង្កឱ្យមានការខាតបង់ដល់ផលប្រយោជន៍កសិករ ។
៧-កន្លងមក យើងសង្កេតឃើញថា មានក្រុមហ៊ុនមួយចំនួនតែងប្រើរូបភាពផ្សាយពាណិជ្ជកម្ម ឬធ្វើអំណោយដល់មន្ទីរ ឬអង្គភាពរដ្ឋផ្សេងៗ ឬដល់ក្រុមកសិករតែម្តងនៅមុនពេលដែលខ្លួនបានច្បាប់ធ្វើអាជីវកម្ម ឬចុះបញ្ជិកាជាដើម។ តាមរូបភាពនេះក៏មិនអាចទទួលយកបានឡើយ ពីព្រោះអង្គភាពជំនាញមិនទាន់បានធ្វើការ ពិសោធន៍ជាក់លាក់ ហើយដែលអាចបង្កហានិភ័យជាយថាហេតុ។ ដូច្នេះអង្គភាពជំនាញពាក់ព័ន្ធក៏ដូចជាមន្ទីរកសិកម្មរាជធានី ខេត្តទាំងអស់ត្រូវមានការប្រុងប្រយ័ត្នចំពោះករណីនេះ ដោយត្រូវស្នើសុំក្រសួងជាមុន ឬត្រូវពិនិត្យលើលិខិតអនុញ្ញាតឬបញ្ជិកាចេញដោយក្រសួងជាមុន ៕
ចែករំលែកព័តមាននេះ