ខេត្តកណ្តាល ៖ ការប្រមូលសំរាមពីទីប្រជុំជនយកទៅចោលក្រៅក្រុង គឺជាសកម្មភាពមួយមិនអាចមើលរំលងឡើយ ប៉ុន្តែប្លែកតែក្រុងតាខ្មៅ គេប្រមូលសំរាមយកមកចាក់គរចោលដូចភ្នំ នៅក្នុងក្រុងដែលជាទីប្រជុំជនទៅវិញ ។ បើយើងធ្វើដំណើរតាមផ្លូវខាងជើងផ្សារតាខ្មៅចាស់ ជាប់មាត់ស្ទឹងព្រែកត្នោត ប្រាកដជាបានឃើញគំនរសំរាមជាកាកសំណល់ផ្សេងៗដែលខាងក្រុមហ៊ុនផ្សារតាខ្មៅចាស់បានប្រមូលយកមកចាក់ចោលនៅទីនោះ កំពុងជះក្លិនស្អុយអសោចិ៍ជាពន់ពេក ធ្វើឱ្យបាត់សោភ័ណភាព និងអាប់មុខមាត់អាជ្ញាធរក្នុងតំបន់នេះជាខ្លាំង ប៉ុន្តែមិនដឹងហេតុអ្វីបានជាអាជ្ញាធរមិនមានចំណាត់ការលើបញ្ហាគំនរសំរាមនេះ ទោះបីជាអាជ្ញាធរបានចំណាយថវិកាអស់ជាច្រើន ដើម្បីស្ថាបនាច្រាំងព្រែកត្នោតឱ្យមានសោភ័ណភាពស្រស់ត្រកាលកាលពីពេលថ្មីៗកន្លងមកនេះក្តី ។
តាមប្រភពពីប្រជាពលរដ្ឋដែលរស់នៅខាងជើងផ្សារតាខ្មៅចាស់ជិតមាត់ស្ទឹងព្រែកត្នោត ក្បែរគំនរសំរាមនោះបានត្អូញត្អែរថា សព្វថ្ងៃគាត់រស់នៅទីនោះដោយបង្ខំចិត្ត និងទ្រាំរស់ជាមួយក្លិនស្អុយអសោចិ៍ចេញពីគំនរសំរាមនេះ ។ បញ្ហាមួយទៀត គឺសត្វរុយ និងមូសជាប្រភពចំលងមេរោគកើតកាន់តែច្រើនបើពួកគាត់មិនមានការប្រុងប្រយ័ត្នខ្ពស់ទេ កូនចៅងាយទទួលការចំលងរោគយ៉ាងលឿនបំផុត ។ ប្រភពដដែលបន្តថា ពួកគាត់រស់នៅក្បែរនេះ គឺហាក់បីដូចជាសាំជាមួយក្លិនស្អុយនេះទៅហើយ ប៉ុន្តែបើអ្នកធ្វើដំណើរឆ្លងកាត់តាមផ្លូវនេះវិញ គឺម្នាក់ៗយកដៃខ្ទប់ច្រមុះមាត់ ព្រោះទ្រាំមិនបាននឹងក្លិនស្អុយអាក្រក់នេះ ពិសេសពេលមានភ្លៀងធ្លាក់មកម្តងៗកាកសំណល់និងសំរាមហូរតាមទឹកភ្លៀងជះក្លិនស្អុយទ្រាំស្ទើរដាច់ខ្យល់ ។
ប្រជាពលរដ្ឋបានស្តីបន្ទោសថា មកពីក្រុមហ៊ុនផ្សារតាខ្មៅចាស់មានលោកអ៊ិន យ៉ុម ជាប្រធានផ្សារបញ្ជាឱ្យប្រមូលសំរាមពីទីផ្សេងៗ និងក្នុងផ្សារផង មកចាក់គរទុកចោលនៅទីនេះ ពេលខ្លះរហូតដល់ទៅ៤ឬ៥ថ្ងៃ ទើបគេប្រមូលដឹកចេញម្តង ។ ប្រជាពលរដ្ឋបានលើកឡើងថា កន្លងមកអាជ្ញាធរខេត្ត-ក្រុងបានប្រឹងប្រែងស្ថាបនាច្រាំងស្ទឹងព្រែកត្នោតទាំងសងខាងដោយចាក់បេតុងចំណាយអស់ថវិកាជាច្រើនលានរៀល ដើម្បីកែលំអសោភ័ណភាពទាក់ទាញភ្នែកមហាជន និងជាមុខមាត់ថ្មីរបស់ក្រុងផង ចុះហេតុអ្វីបានជាអនុញ្ញាតឱ្យខាងក្រុមហ៊ុនផ្សារប្រមូលសំរាមយកមកទុកគរចោលនៅក្បែរច្រាំងស្ទឹងនេះទៅវិញ ។ កន្លែងនេះក៏ជាចំណុចស្នូលនៃការលំហែកាយរបស់ប្រជាពលរដ្ឋផងដែរ ៕
ចែករំលែកព័តមាននេះ