រាជធានីភ្នំពេញ ៖ ការប្រកួតកីឡាវាយសីដណ្តើមជើងឯកទូទាំងប្រទេសឆ្នាំ២០១១ ដែលធ្វើឡើងតាមកម្មវិធីរបស់ក្រសួងអប់រំ យុវជន និងកីឡាបានចាប់ផ្តើមធ្វើពីថ្ងៃទី១១ ដល់ថ្ងៃទី១៥ តែតុលា នៅពហុកីឡដ្ឋានជាតិ។
លោកជាម សុភា ប្រធានគណៈកម្មការរៀបចំការប្រកួតបានឱ្យដឹងថា ការប្រកួតឆ្នាំនេះមានក្លឹប និងសមាគមចូលរួមចំនួន១២ ក្នុងនោះមានក្លឹបមុនីឋាបនា ក្លឹបខេមរៈ សមាគមអគ្គស្នងការនគរបាលជាតិ សមាគមទីចាត់ការបច្ចេកទេស ក្លឹបព្រះខ័នរាជ្យ ក្លឹបត្រពាំងផ្លុង ក្លឹបខេត្តកំពង់ចាម ក្លឹបខេត្តស្វាយរៀង ក្លឹបខេត្តស្ទឹងត្រែង ក្លឹបបៃតងកម្ពុជា ក្លឹបខេត្តកំពង់ឆ្នាំង និងក្លឹបសហព័ន្ធកីឡា។ ចំពោះកីឡាករ កីឡាការិនីចូលរួមមានរហូតដល់ទៅ១៨៣នាក់ ក្នុងនោះស្ត្រី១២នាក់ រីឯវិញ្ញាសាប្រកួតមានចំនួន១២ក្របខណ្ឌ។ ក្របខណ្ឌក១ មានប្រកួតវាយទោ ប្រកួតវាយគូ ប្រកួតវាយគូអាយុលើ១៩ឆ្នាំ និងប្រកួតវាយទោលអាយុលើ១៩ឆ្នាំ។ ក្របខណ្ឌក២ មានប្រកួតវាយគូ ប្រកួតវាយទោល ប្រកួតវាយគូ អាយុក្រោម១៦ឆ្នាំ ប្រកួតវាយទោលអាយុក្រោម១៦ឆ្នាំ ប្រកួតវាយគូនារី ប្រកួតវាយទោលនារី ប្រកួតអាយុចាប់ពី៤០ឆ្នាំឡើង និងប្រកួតជាក្រុម។
លោកប្រធានគណៈកម្មការរៀបចំការប្រកួតបានឱ្យដឹងបន្តទៀតថា ឆ្នាំនេះទាំងចំនួនក្លឹប និងកីឡាករ កីឡាការិនី មានការកើនឡើងច្រើនជាងបណ្តាឆ្នាំមុនៗ។ ចំពោះលទ្ធផលនេះបានបង្ហាញឱ្យឃើញពីការខិតខំប្រឹងប្រែងរបស់ប្រធានសហព័ន្ធកីឡាវាយសីកម្ពុជា លោកឧត្តមសេនីយ៍លី កុសល ដែលបានយកចិត្តទុកដាក់ និងបំផុសឱ្យមានការចូលរួមចាប់តាំងពីស្រទាប់យុវវ័យរហូតដល់អ្នកដែលមានវ័យច្រើន ធ្វើយ៉ាងណាដើម្បីអភិវឌ្ឍន៍វិស័យកីឡាវាយសីនៅកម្ពុជាឱ្យមានការរីកចម្រើន ដូចបណ្តាប្រទេសក្នុងតំបន់ផងដែរ៕
ចែករំលែកព័តមាននេះ