មានលេចឮព័ត៌មានពីភាពចំរូងចំរាសថ្មីទៀត នៅតំបន់មានជំលោះព្រំដែនរវាងប្រទេសថៃ និងប្រទេសកម្ពុជា ក្រោយពីមានរបាយការណ៍ថា កម្ពុជាបង្ហូតទង់ជាតិនៅវត្តកែវសិក្ខាគិរីស្វារៈ ក្រោយពីបំផ្លាញចោលផ្ទាំងថ្មនៅបរិវេណទល់មុខវត្តនេះមក ។ ទាក់ទិននឹងបញ្ហានេះយោងតាមកាសែតបាងកកប៉ុស្តិ៍កាលពីល្ងាចថ្ងៃទី២៧ មករា ផ្សាយឱ្យដឹងថា នៅពេលត្រូវគេជូនដំណឹងអំពីការបង្ហូតទង់ជាតិរបស់កម្ពុជានេះ លោកនាយករដ្ឋមន្ត្រីអាប់ភីស៊ីត វ៉េចាជីវ៉ា ថ្លែងថា «ប្រសិនបើជារឿងពិត ទង់ជាតិនោះត្រូវរុះរើចេញវិញជាបន្ទាន់» ។ ប៉ុន្តែទោះបីជាបែបណា លោកអាប់ភីស៊ីត ថ្លែងថា រូបលោកមិនទាន់ដឹងច្បាស់ថា តើទង់ជាតិនោះត្រូវដាក់បង្ហូរនៅកន្លែងណានោះទេ ។
សំនួរសួរថា តើអ្វីដែលកើតឡើងកាលពី២-៣សប្តាហ៍មុន អាចត្រូវលើកយកមកពិភាក្សាគ្នានៅក្នុងកិច្ចប្រជុំគណៈកម្មាធិការបេតិកភណ្ឌពិភពលោកដែរឬក៏អត់ ។ លោកអាប់ភីស៊ីត អះអាងថា «ពិតណាស់ យើងនឹងត្រូវតែរាយការណ៍ពីបញ្ហាទាំងនេះជូនគណៈកម្មាធិការបេតិកភណ្ឌពិភពលោក ដើម្បីឱ្យដឹងថា តើគណៈកម្មាធិការចង់បន្តនីតិវិធីនៃការគ្រប់គ្រងតំបន់មានជំលោះរវាងប្រទេសថៃ និងប្រទេសកម្ពុជាទៀត ឬក៏យ៉ាងណា ។
ជាមួយគ្នានេះ កាសែតឌឹកណេស្សិន នៅថ្ងៃទី២៨ មករា បានផ្សាយដោយដកស្រង់សំដីលោកនាយករដ្ឋមន្ត្រីអាប់ភីស៊ីត ដែលថ្លែងកាលពីល្ងាចថ្ងៃទី២៧ មករា ថា កម្ពុជាពុំមានសិទ្ធិបង្ហូតទង់ជាតិរបស់ខ្លួននៅតំបន់មានជំលោះប្រាសាទព្រះវិហារនោះទេ ។ លោកអាប់ភីស៊ីត ថ្លែងទៀតថា «ប្រសិនបើមានទង់ជាតិនោះមែន គេត្រូវតែដកទង់ជាតិនោះចេញវិញជាបន្ទាន់» ។
លោកអាប់ភីស៊ីត ធ្វើការអត្ថាធិប្បាយដូច្នេះក្រោយពីក្រុមជ្រុលនិយមសៀមអាវលឿង លើកឡើងពីបញ្ហាទង់ជាតិនោះក្នុងអំឡុងពេលនៃការធ្វើបាតុកម្មនៅបរិវេណខាងក្រៅវិមានរដ្ឋាភិបាលកាលពី ថ្ងៃទី២៧ មករា ។
មុននេះកម្ពុជាបានឯកភាពតាមការទាមទាររបស់ថៃម្តងរួចហើយ ដោយបំផ្លាញចោលវិញនូវផ្ទាំងថ្មចារឹកនៅទល់មុខវត្តកែវសិក្ខាគិរីស្វារៈ ។ កាសែតឌឹណេស្សិនបានដកស្រង់សំដីលោកអាប់ភីស៊ីត ដែលថ្លែងជាថ្មីទៀតថា «កម្ពុជាពុំមានសិទ្ធិទាមទារយកអធិបតេយ្យភាពនៅតំបន់មានជំលោះនោះតែម្នាក់ឯងបានឡើយ ព្រោះថៃទាមទារយកដីនៅតំបន់នោះដែរ» ។ លោកអាប់ភីស៊ីត ថ្លែងប្រាប់អ្នកកាសែតកាលពីថ្ងៃទី២៧ មករា ថា «ជំលោះជាបន្តជាមួយកម្ពុជានឹងជាលេសមួយសំរាប់លោក ដើម្បីបន្តរារាំងផែនការគ្រប់គ្រងប្រាសាទព្រះវិហារជាឯកតោភាគីរបស់កម្ពុជា» ៕
ចែករំលែកព័តមាននេះ