រាជធានីភ្នំពេញ ៖ រដ្ឋមន្ត្រីក្រសួងការបរទេសនៃប្រទេសស៊ែប៊ី លោកវុក ហ្សេរ៉េមីក បានមកដល់ប្រទេសកម្ពុជាកាលពីវេលាយប់ថ្ងៃច័ន្ទ ទី១០ តុលា ហើយនៅវេលាម៉ោង១០និង៣០នាទីព្រឹកថ្ងៃទី១១ តុលា ២០១១ នេះ លោកវុក ហ្សេរ៉េមីក ត្រូវបានស្វាគមន៍ដោយលោកឧបនាយករដ្ឋមន្ត្រីហោ ណាំហុង
រាជធានីភ្នំពេញ ៖ រដ្ឋមន្ត្រីក្រសួងការបរទេសនៃប្រទេសស៊ែប៊ី លោកវុក ហ្សេរ៉េមីក បានមកដល់ប្រទេសកម្ពុជាកាលពីវេលាយប់ថ្ងៃច័ន្ទ ទី១០ តុលា ហើយនៅវេលាម៉ោង១០និង៣០នាទីព្រឹកថ្ងៃទី១១ តុលា ២០១១ នេះ លោកវុក ហ្សេរ៉េមីក ត្រូវបានស្វាគមន៍ដោយលោកឧបនាយករដ្ឋមន្ត្រីហោ ណាំហុង ជួបពិភាក្សាការងារនៅទីស្តីការក្រសួងការបរទេសលើអ្វីដែលហៅថារឹតចំណងមិត្តភាព និងកិច្ចសហប្រតិបត្តិការរវាងប្រទេសទាំងពីរ។
បើតាមអ្នកនាំពាក្យក្រសួងការបរទេសលោកកុយ គួង គឺកម្ពុជា-សាធារណរដ្ឋស៊ែប៊ី មានទំនាក់ទំនងការទូតជាមួយគ្នាតាំងពីឆ្នាំ១៩៥៧មកម៉្លេះដែលពេលនោះស៊ែប៊ីស្ថិតនៅក្នុងសហព័ន្ឋយូហ្គោស្លីវី ។ យោងតាមសេចក្តីជូនព័ត៌មានរបស់ក្រសួង ការបរទេស និងសហប្រតិបត្តិការអន្តរជាតិចេញផ្សាយជាសាធារណៈកាលពីថ្ងៃទី៧ តុលា បានបញ្ជាក់ថា ក្នុងអំឡុងពេលដំណើរបំពេញទស្សនកិច្ចផ្លូវការរយៈពេល២ថ្ងៃនៅកម្ពុជា តាមការអញ្ជើញរបស់លោកប្រមុខការទូតកម្ពុជា ហោ ណាំហុង នោះ រដ្ឋមន្រ្តីការបរទេសនៃសាធារណរដ្ឋស៊ែប៊ី លោកវុក ហ្សេរ៉េមីក នឹងជួបពិភាក្សាទ្វេភាគីជាមួយលោកឧបនាយករដ្ឋមន្រ្តីហោ ណាំហុង រដ្ឋមន្រ្តីការបរទេស និងសហប្រតិបត្តិការអន្តរជាតិ និងចូលជួបសម្តែងការគួរសមជាមួយសម្តេចអគ្គមហាសេនាបតីតេជោហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា និងមុនពេលចាកចេញពីកម្ពុជានៅថ្ងៃទី១១ តុលា លោករដ្ឋមន្រ្តីការបរទេសនៃប្រទេសស៊ែប៊ី នឹងអញ្ជើញទៅទស្សនកិច្ចសារមន្ទីរជាតិក្នុងរាជធានីភ្នំពេញផងដែរ៕
ចែករំលែកព័តមាននេះ