រាជធានីភ្នំពេញ ៖ នៅព្រឹកថ្ងៃទី១០ តុលា នាយកដ្ឋាននគរបាលប្រឆាំងការជួញដូរមនុស្ស និងការពារអនីតិជនក្រសួងមហាផ្ទៃ បានបញ្ជូនខ្លួនបុរសខ្មែរម្នាក់ទៅសាលាដំបូងរាជធានីភ្នំពេញ ដោយចោទពីបទនាំស្ត្រីខ្មែរទៅលក់នៅប្រទេសចិន ។
បុរសដែលត្រូវចោទនេះឈ្មោះញ៉ វេង ហៅគុ យូលេង អាយុ៣៨ឆ្នាំ មុខរបរលក់មាសប្តូរប្រាក់នៅផ្សារចាស់ និងស្នាក់នៅផ្ទះលេខ៦៧AE1z ផ្លូវលេខ១៣៤ សង្កាត់ផ្សារដេប៉ូ២ ខណ្ឌទួលគោក ។ ជននេះត្រូវបានចាប់ខ្លួនកាលពីថ្ងៃទី៧ តុលា តាមពាក្យបណ្តឹងរបស់ឈ្មោះយ៉ាំ សុដា ភេទស្រី អាយុ៤១ឆ្នាំ ត្រូវជាអាណាព្យាបាលជនរងគ្រោះដោយចោទប្រកាន់ថា បានឆបោក និងនាំខ្លួនកូនស្រីគាត់ទៅលក់នៅស្រុកចិន ។
គួរបញ្ជាក់ថា កាលពីអំឡុងខែឧសភា ឆ្នាំ២០១១ ឈ្មោះសុខ រី ភេទស្រី អាយុ៥២ឆ្នាំ ត្រូវជាម្តាយក្មេករបស់មេខ្យល់ឈ្មោះញ៉ វេង ឈ្មោះប្រើផ្លូវការ គុ យូលេង បានឃោសនាលួងលោមថា គាត់មានកូនប្រសាឈ្មោះវេង រកស៊ីនាំនារីខ្មែរទៅរៀបការជាមួយបុរសជនជាតិចិននៅប្រទេសចិន បើបានទៅនឹងមានជីវភាពធូរធារ ហើយឱ្យថ្លៃទឹកដោះចំនួន៥០០ដុល្លារ ។ បន្ទាប់ពីព្រមព្រៀងគ្នាមក ឈ្មោះគុ យូលេង បានទំនាក់ទំនង និងចាត់ចែងដោយឱ្យសាមីខ្លួនមើលរូបថតគ្នាទៅវិញទៅមក និងរត់ការបំពេញបែបបទធ្វើលិខិតឆ្លងដែន និងធ្វើទិដ្ឋាការទេសចរណ៍ស្ថានទូតចិន ដែលការចំណាយទាំងអស់លើឈ្មោះគុ យូលេង អ្នកចេញ។ នៅថ្ងៃទី១០ កក្កដា ឆ្នាំ២០១១ ឈ្មោះគុ យូលេង បាននាំ និងបញ្ជូននារីពីរនាក់ ទៅប្រទេសចិនតាមច្រកទ្វារព្រលានយន្តហោះអន្តរជាតិភ្នំពេញ ។ ពេលទៅដល់ប្រទេសចិន មានឈ្មោះធីតា ភេទស្រី អាយុ២៩ឆ្នាំ
ត្រូវជាប្អូនបង្កើតរបស់មេខ្យល់ឈ្មោះគុ យូលេង ជាអ្នកទទួល បាននាំទៅជួបជនជាតិចិនដែលបានព្រមព្រៀងគ្នា ពេលមើលរូបថតតាមអីុមែល ប៉ុន្តែនៅពេលជួបរូបមនុស្សពិត សាមីខ្លួនខាងស្រីមិនពេញចិត្តបុរសនោះទេ ក៏បានប្តូរចិត្តបដិសេធមិនព្រមរៀបការជាមួយបុរសនោះវិញ ហើយឈ្មោះធីតា បានគំរាមកំហែងទាំងសាមីខ្លួន និងម្តាយនៅកម្ពុជាថា បើមិនព្រមយកបុរសនោះទេ ត្រូវលក់ដីស្រែចម្ការ ផ្ទះសម្បែង ទ្រព្យសម្បត្តិយកសងគេមិនគ្រប់ផង។ ពេលនោះដោយសាមីខ្លួនមានតែម្នាក់ឯងគ្មានទីពឹងទាល់ច្រកក៏បណ្តោយតាមគេ។
តាមការបំភ្លឺរបស់ឈ្មោះយ៉ាំ សុដា ភេទស្រី អាយុ៤១ឆ្នាំ ទីលំនៅភូមិកោះកណ្តាល ឃុំពាមកោះស្នា ស្រុកស្ទឹងត្រង់ ខេត្តកំពង់ចាម បានឱ្យដឹងថា កាលពីថ្ងៃទី៦ មិថុនា ២០១១ មានឈ្មោះសុខ រី ភេទស្រី អាយុ៥២ឆ្នាំ នៅឃុំជាមួយគ្នាបានសួរខ្លួនថា តើចង់ឱ្យកូនរៀបការទៅប្រទេសចិនឬទេ បើចង់ឱ្យទៅទាក់ទងជាមួយឈ្មោះញ៉ វេង ភេទប្រុស អាយុប្រហែល៣៥ឆ្នាំ ទូរស័ព្ទលេខ០៩៣ ៩១៤ ៥៩៦ មានទីលំនៅផ្ទះលេខ៦៧AE1Z ផ្លូវលេខ១៣៤ សង្កាត់ផ្សារដេប៉ូ២ ខណ្ឌទួលគោក រាជធានីភ្នំពេញ ជាអ្នករកស៊ីនាំកូនក្រមុំទៅរៀបការនៅប្រទេសចិន។ បន្ទាប់មក ឈ្មោះយ៉ាំ សុដា បានយករូបថតកូនស្រីរបស់ខ្លួន ឈ្មោះធឿន សេងលី ទៅឱ្យឈ្មោះញ៉ វេង ផ្ញើឱ្យបុរសជនជាតិចិនមើល។ នៅថ្ងៃដដែលនោះ ប្រពន្ធរបស់ឈ្មោះញ៉ វេង បានទូរស័ព្ទប្រាប់ឈ្មោះយ៉ាំ សុដា ឱ្យនាំកូនស្រីឡើងមកភ្នំពេញដើម្បីមើលរូបកូនកំលោះតាមអ៊ីមែល។
ក្រោយពីបានឃើញរូបគ្នាទៅវិញទៅមក ភាគីកូនក្រមុំ កូនកំលោះបានព្រមព្រៀងគ្នា។ ក្រោយមក ឈ្មោះញ៉ វេង បាននាំឈ្មោះធឿន សេងលី ធ្វើលិខិតឆ្លងដែន ហើយនៅថ្ងៃទី១០ កក្កដា ២០១១ ឈ្មោះញ៉ វេង ជូនដំណើរត្រឹមព្រលានយន្តហោះភ្នំពេញ។ ពេលទៅដល់ប្រទេសចិន ឈ្មោះញ៉ ធីតា ជាអ្នកទទួល និងនាំឱ្យជួបជាមួយកូនកំលោះ។ នៅពេលឃើញរូបកូនកំលោះពិត ឈ្មោះធឿន សេងលី មិនពេញចិត្តក៏បដិសេធមិនព្រមរៀបការជាមួយបុរសជនជាតិចិននោះវិញ ប៉ុន្តែឈ្មោះញ៉ ធីតា មិនព្រម ហើយបង្ខំ និងគំរាមថា បើមិនព្រមត្រូវលក់ដីស្រែចម្ការផ្ទះសម្បែងសងគេ និងបានទូរស័ព្ទមកគំរាមកំហែងឈ្មោះយ៉ាំ សុដា ជាម្តាយថែមទៀត ព្រមទាំងបានប្រាប់ទៅម្តាយកូនកំលោះឱ្យដកលិខិតឆ្លងដែនទៀតផង។
នារីដែលខកខ្លួនបានឱ្យដឹងថា ពេលទៅដល់ប្រទេសចិនមានឈ្មោះធីតា ត្រូវជាប្អូនបង្កើតរបស់ឈ្មោះវេង មកទទួលជាមួយកូនកំលោះ ហើយឱ្យចុះហត្ថលេខាលើលិខិតជាភាសាចិនដោយមិនបានប្រាប់អ្វីទេ។ នៅពេលឃើញរូបកូនកំលោះពិត នាងធឿន សេងលី មិនពេញចិត្ត ហើយបានប្រកែកមិនព្រមយកបុរសនោះទេ ប៉ុន្តែត្រូវបានឈ្មោះធីតាគំរាមថា បើមិនព្រមទេត្រូវលក់ដីស្រែចម្ការ ផ្ទះសម្បែង ទ្រព្យសម្បត្តិមកសងគេមិនគ្រាន់ផង។ ដោយមានការភ័យខ្លាច ព្រោះមានតែម្នាក់ឯង មិនចេះភាសា ពុំដឹងទៅទីណា គេមានបក្សពួកច្រើនក៏យល់ព្រមធ្វើតាមគេទៅ។ ក្រោយមកបានទូរស័ព្ទមកប្រាប់ម្តាយឱ្យជួយសង្គ្រោះ ម្យា៉ងទៀតលិខិតឆ្លងដែនរបស់ខ្លួនត្រូវបានឈ្មោះធីតា ប្រាប់ម្តាយកូនកំលោះឱ្យដកទុកដោយសារខ្លាចសាមីខ្លួនលួចរត់ចេញ ។
ចំណែកការសារភាពរបស់ឈ្មោះគុ យូលេង ហៅវេង បានឱ្យដឹងថា កន្លងមកធ្លាប់បាននាំនារីខ្មែរនៅភូមិដីដុះ ឃុំពាមកោះស្នា ស្រុកស្ទឹងត្រង់ ខេត្តកំពង់ចាម ឱ្យរៀបការជាមួយបុរសជនជាតិចិន នៅប្រទេសចិន ដោយមានដៃគូនៅប្រទេសចិនត្រូវជាប្អូនបង្កើតឈ្មោះគុ ធីតា ភេទស្រី ជាអ្នកទទួល និងចាត់ចែងនៅទីនោះ ។ ចំណែកនាងធឿន សេងលី និងឈ្មោះស្រ៊ី សេងហ៊ី សុំឱ្យជួយរកប្តីជនជាតិចិនឱ្យ បន្ទាប់មកក្រោមការចាត់ចែងរបស់ខ្លួន កូនកំលោះ កូនក្រមុំបានមើលរូបថតគ្នាទៅវិញទៅមក ហើយបានយកលុយពីកូនកំលោះចំនួន៥មឺុនយ័ន ដើម្បីរត់បែបបទជូនភាគីខាងស្រីទៅប្រទេសចិន ។ បន្ទាប់ពីរៀបចំបែបបទរួចហើយ ខ្លួនក៏បានបញ្ជូននាង ធឿន សេងលី និងឈ្មោះស្រ៊ី សេងហ៊ី ឡើងយន្តហោះទៅប្រទេសចិន តាមច្រកទ្វារអន្តរជាតិភ្នំពេញ ដោយប្រើប្រាស់ទិដ្ឋាការទេសចរណ៍ និងឱ្យថ្លៃទឹកដោះទៅអាណាព្យាបាលសាមីខ្លួនទាំងពីរចំនួន៥០០ដុល្លារ ។
មន្ត្រីប៉ូលិសឱ្យដឹងថា រឿងរ៉ាវខាងលើនេះ គឺពិតជាបានរៀបចំជាបណ្តាញឃោសនា លួងលោម បោកបញ្ឆោត និងនាំយកនារី២នាក់ទៅប្រទេសចិន និងបង្ខំឱ្យរៀបការជាមួយបុរសជនជាតិចិន ក្នុងគោលបំណងស្វែងរកប្រយោជន៍ ដោយបង្ខំឱ្យជនរងគ្រោះរៀបអាពាហ៍ពិពាហ៍ផ្ទុយពីឆន្ទៈ ជាការប្រព្រឹត្តបំពានមាត្រា១០នៃច្បាប់ស្តីពីការបង្ក្រាបអំពើជួញដូរមនុស្ស និងអំពើធ្វើអាជីវកម្មផ្លូវភេទ ។ ម្យ៉ាងទៀត បានប្រព្រឹត្តក្នុងបទកំហែងយកដែលបំពានមាត្រា៣៦៣ នៃក្រមព្រហ្មទណ្ឌ ។ លើសពីនេះទៅទៀត ការរៀបចំជាបណ្តាញមេខ្យល់ទំនាក់ទំនងដើម្បីរៀបការជាមួយជនបរទេស គឺជាការប្រព្រឹត្តល្មើសទៅនឹងអនុក្រឹត្យលេខ១៨៣ ស្តីពីបែបបទ និងនីតិវិធីនៃការរៀបអាពាហ៍ពិពាហ៍រវាងពលរដ្ឋខ្មែរ និងជនបរទេស ៕
ចែករំលែកព័តមាននេះ