ខេត្តបាត់ដំបង ៖ ចាងហ្វាងកាសែតដែលមិនសូវឮឈ្មោះម្នាក់បាននិយាយថា លោកបានសម្រេចដាក់ពាក្យបណ្តឹងកាលពីសប្តាហ៍មុនទៅកាន់តំណាងអយ្យការអមសាលាដំបូងខេត្ត ប្រឆាំងទៅនឹងមេបនល្បែងដ៏ធំម្នាក់នៅស្រុកបវេល ដែលបានទូរស័ព្ទមកគំរាមរកសម្លាប់ក្រោយពីលោកបានផ្តល់ព័ត៌មានពីបនល្បែងស៊ីសងរបស់ដង្ខៅនេះដល់សមត្ថកិច្ច ។
នៅក្នុងបណ្តឹងមួយច្បាប់ដែលកោះសន្តិភាពបានទទួល គឺ ដើមបណ្តឹងក្នុងសំណុំរឿងនេះឈ្មោះម៉ឹង កំសត់ ភេទប្រុស អាយុ៣៧ឆ្នាំ មានមុខងារជាចាងហ្វាងការផ្សាយរបស់កាសែត «សម្លេងចៅកម្សត់» រស់នៅភូមិទី៣ ភូមិប៉ោយសំរោង ឃុំតាពូង ស្រុកថ្មគោល ។ កម្មវត្ថុនៃបណ្តឹងនេះលោកម៉ឹង កំសត់ សុំប្តឹងឈ្មោះឡាយ សែ ភេទប្រុស អាយុជាង៣០ឆ្នាំ រស់នៅភូមិបវេល១ ឃុំបវេល ស្រុកបវេល ។
លោកម៉ឹង កំសត់ បាននិយាយថា បណ្តឹងនេះត្រូវបានដាក់ចូលទៅកាន់តំណាងអយ្យការអមសាលាដំបូងខេត្តរួចហើយ កាលពីថ្ងៃទី២៨ កុម្ភៈ កន្លងទៅ ។ លោកចាងហ្វាងកាសែតរូបនេះបាននិយាយថា មេបនល្បែងឈ្មោះឡាយ សែ បានទូរស័ព្ទមកគំរាមចង់សម្លាប់រូបលោកកាលពីព្រឹកថ្ងៃទី១៩ កុម្ភៈ កន្លងទៅ ។
តាមរយៈលេខទូរស័ព្ទរបស់លោកឡាយ សែ ០១២ ៦១៣ ៣៣៦ ដែលមានក្នុងបណ្តឹងរបស់លោកចាងហ្វាងកាសែតរូបនេះ កោះសន្តិភាពបានព្យាយាមសុំការពន្យល់ពីចុងចម្លើយឈ្មោះឡាយ សែ តាមរយៈលេខទូរស័ព្ទខាងលើនេះកាលពីព្រឹកថ្ងៃទី៦ មីនា ប៉ុន្តែម្ចាស់ទូរស័ព្ទបានឆ្លើយបដិសេធថា ខ្លួនមិនមែនឈ្មោះឡាយ សែ ទេ គឺខ្លួននៅឯខេត្តសៀមរាប។ ប៉ុន្តែសំឡេងនេះគឺស្រដៀងគ្នាទៅនឹងសំឡេងដែលលោកម៉ឹង កំសត់ ថតបានក្នុងគ្រាដែលឈ្មោះសែ ទូរស័ព្ទមកគំរាមរកសម្លាប់ ។
នៅក្នុងខ្សែអាត់សំឡេងដែលឈ្មោះឡាយ សែ ទូរស័ព្ទគំរាមរកសម្លាប់លោកម៉ឹង កំសត់ កាលពីថ្ងៃទី១៩ កុម្ភៈ ដង្ខៅល្បែងឈ្មោះសែ បានគំរាមខ្លាំងៗថា «អាកំសត់អ្ហែងស្អប់ខ្ពើមជីវិតហើយ…អញចង់សម្លាប់អ្ហែងតែម្តង»។ ជននេះមិននិយាយហេតុផលទេដោយគិតតែពីគំរាមបន្តថា «អញចង់សម្លាប់អ្ហែងតែម្តង បើអ្ហែងចង់ខ្លាំងជាមួយអញ» ប៉ុន្តែលោកម៉ឹង កំសត់ បានបំភ្លឺថា ឈ្មោះឡាយ សែ នេះជាមេល្បែងដ៏ធំនៅស្រុកបវេល មានសង្វៀនបញ្ជល់មាន់ អាប៉ោង និងបៀ ។ មេល្បែងរូបនេះបានខឹងសម្បា ព្រោះតែរូបលោកបានរាយការណ៍ប្រាប់សមត្ថកិច្ចឱ្យចុះបង្ក្រាបបនល្បែងនោះ កាលពីថ្ងៃទី១៦ កុម្ភៈ លុះដល់ថ្ងៃទី១៩ កុម្ភៈ ក៏ទូរស័ព្ទគំរាមចង់សម្លាប់រូបលោកតែម្តង ៕
ចែករំលែកព័តមាននេះ