ខេត្ដសៀមរាប ៖ រដ្ឋមន្ដ្រីក្រសួងទេសចរណ៍លោកថោង ខុន កាលពីថ្ងៃទី៧ តុលា នេះបានធ្វើការទទួច ដល់អាជ្ញាធរខេត្ដសៀមរាប រួមទាំងជំនាញពាក់ព័ន្ធដទៃទៀតរួមគ្នាធ្វើការដោះស្រាយបញ្ចប់ឱ្យបានឆាប់នូវវិវាទរវាងម្ចាស់សណ្ឋាគារអង្គរវិឡា បូតានិខល រីសត (Angkor Village Botanical Resort) និងសណ្ឋាគារអង្គរវិឡា (Angkor Village) ជាមួយក្រុមបុគ្គលិក និងកម្មករដែលកើតឡើងតាំងពីដើមខែសីហា ឆ្នាំ២០១១រហូតមក ចៀសវាងជះឥទ្ធិពលមិនល្អដល់ក្រុងទេសចរណ៍សៀមរាបដែលត្រូវបានចាត់ទុកជាតំបន់ប៉ូលនៃទេសចរណ៍ជាតិ ព្រោះតែការធ្វើកូដកម្មតវ៉ាម្ដងហើយម្ដងទៀត។
ការទទូចឱ្យមានការដោះស្រាយបញ្ចប់វិវាទនេះ ដែលថ្លែងឡើងដោយលោករដ្ឋមន្ដ្រីនៃក្រសួងទេសចរណ៍នេះ ធ្វើឡើងនៅពេលបុគ្គលិកនិងកម្មករនៃសណ្ឋាគារទាំងពីរខាងលើមានប្រមាណជិត១០០នាក់កំពុងបន្ដធ្វើកូដកម្មឥតកំណត់ពេលមួយ ក្នុងគោលបំណងទាមទារឱ្យមានការទទួលយកបុគ្គលិកសណ្ឋាគារចំនួន៦៧ នាក់ដែលត្រូវបានគេបណ្ដេញចេញពីការងារបានចូលបំរើការដូចដើមវិញ។
រដ្ឋមន្ដ្រីក្រសួងទេសចរណ៍លោកថោង ខុន បានមានប្រសាសន៍ប្រាប់តាមទូរស័ព្ទកាលពីព្រឹកថ្ងៃទី៧ តុលា នេះថា យើងមិនចង់ឱ្យមានការធ្វើកូដកម្មដ៏រ៉ាំរ៉ៃប្រឆាំងទៅនិងម្ចាស់សណា្ឋគារយ៉ាងដូច្នេះទេ ហើយក៏ជឿថាម្ចាស់ឧស្សាហ៍កម្មសណ្ឋាគារផ្សេងទៀតដែលមានចំនួនរាប់រយនៅសៀមរាបក៏គេមិនគាំទ្រឱ្យធ្វើអ៊ីចឹងទេ។ ដូច្នេះមិនត្រូវបណ្ដែតបណ្ដោយអូសបន្លាយពេលយូរតទៅ
ទៀតទេ គួរតែអាជ្ញាធរ និងជំនាញពាក់ព័ន្ធផ្សេងៗ ជាពិសេសម្ចាស់សណ្ឋាគារ ដែលមានបញ្ហាហ្នឹងតែម្ដងរួមគ្នាដោះស្រាយបញ្ចប់វិវាទឱ្យ បានឆាប់ទៅ កុំទុកនៅរ៉ាំរ៉ៃអុីចឹងទៀត វាមិនសមភ្នែកមើលទេសម្រាប់ក្រុងទេសចរណ៍សៀមរាបដែលចាត់ទុកទៅនឹងតំបន់ប៉ូលនៃទេសចរណ៍ជាតិទាំងមូល។
លោកបានបញ្ចាក់បន្ថែមដោយលើកជាចម្ងល់ថា យើងឆ្ងល់ណាស់ថានៅខេត្ដសៀមរាបមានសណ្ឋាគាររាប់រយ ចុះហេតុអ្វីបានជាមានតែសណ្ឋាគារអង្គរវិឡា បូតានិខល រីសត មួយកើតមានបញ្ហាយ៉ាងដូច្នេះទេ។ ប៉ុន្ដែយើងមិនអាចនិយាយថាវិវាទរវាងនិយោជិកនិងនិយោជកនៃសណ្ឋាគារហ្នឹងម្ខាងណាត្រូវម្ខាងណាខុសនោះទេ តែការដោះស្រាយគ្នាត្រូវតែឱ្យមានភាពយុត្ដិធម៌ គឺឈ្នះៗទាំងសងខាងដោយផ្អែកទៅលើលក្ខន្ដិកៈការងារ និងច្បាប់ការងារជាគោល។ ក្នុងករណីម្ចាស់សណ្ឋាគារគេថា គេខាតមិនអាចបន្ដដំណើរការអាជីវកម្មរបស់ខ្លួនបានតទៅទៀត សូមឱ្យគេដាក់ពាក្យឈប់មកក្រសួងមក និងសងលុយទៅបុគ្គលិកឱ្យគ្រប់ចំនួនទៅ ដើម្បីឱ្យពួកគេទៅរកកាងារធ្វើនៅកន្លែងផ្សេងទៀត ព្រោះមិនមានតែសណ្ឋាគារមួយហ្នឹងឯណា ហើយចំពោះអ្នកណាប្រព្រឹត្តខុសច្បាប់សូមឱ្យតុលាការកាត់ទោសទៅវាបាត់ទៅហើយ។
សូមរំលឹកថា ចាប់តាំងពីព្រឹកថ្ងៃទី៥ តុលា រហូតមកមានរយៈពេលបីថ្ងៃមកហើយ ក្រុមបុគ្គលិក និងកម្មករបម្រើការនៅក្នុងសណ្ឋាគារអង្គរវិឡា (AngkorVillage Botanical Resort) និងសណ្ឋាគារអង្គរ(Angkor Village)ប្រមាណជាង៩០នាក់បានធ្វើការប្រមូលផ្ដុំគ្នាជាលើកទី៣ ធ្វើកូដកម្មអហិង្សានៅពីមុនសណ្ឋាគារ«អង្គររីសត» ស្ថិតនៅក្នុងភូមិទ្រាំង សង្កាត់ស្លក្រាមក្រុងសៀមរាប ដោយម្នាក់ៗបានកាន់
បដា និងរូបថតសម្ដេចទាំងបីរួមទាំងមីក្រូស្រែកខ្លាំងនៅមុខសណ្ឋាគារនោះ ដើម្បីទាញចំណាប់អារម្មណ៍ថ្នាក់ដឹកនាំខេត្ដ និងម្ចាស់សណ្ឋាគារទទួលយកបុគ្គលិកចំនួន៦៧នាក់ដែលគេបណ្ដេញចេញដោយសាតែបង្កើតសហជីព បានចូលធ្វើការវិញ។
ទាក់ទិនទៅនឹងវិវាទនោះដែរ អនុប្រធានសហពន្ធ័សហជីពកម្មករនិយោជិតវិស័យទេសចរណ៍ និងសេវាកម្មកម្ពុជាលោកម៉ម រិទ្ធី ដែលបានផ្ដួចផ្ដើមបង្កើតឱ្យមានកូដកម្មប្រឆាំងទៅនឹងនិយោជកសណ្ឋាគារទាំងពីរខាងលើបានថ្លែងប្រាប់កាលពីព្រឹកថ្ងៃទី៧នេះដោយព្រមានថាបុគ្គលិកទាំងអស់និងបន្ដធ្វើកូដកម្មដោយគ្មានពេលកំណត់រហូតដល់មានដំណោះស្រាយសមរម្យមួយជូនដល់បុគ្គលិកទាំង៦៧នាក់ ដែល ត្រូវបានម្ចាស់សណ្ឋាគារបណ្ដេញចោលទាំងគ្មានកំហុស ព្រោះតែពួកគាត់បង្កើតជាសហជីពនេះ។
លោកបានបញ្ជាក់ទៀតថា ចាប់តាំងពីមានវិវាទរហូតមក យើងបានធ្វើកូដកម្មតវ៉ាចំនួន២លើករួចមកហើយដោយក្នុងចន្លោះពេលនោះគឺកាលពីថ្ងៃទី៣០ កញ្ញា កន្លងទៅក្រុមប្រឹក្សាអាជ្ញាកណ្ដាលបានចេញសេចក្ដីសម្រេចបង្គាប់ឱ្យសណ្ឋាគារអង្គរវិឡាបូតានិខលរីសត (Angkor Village Botanical Resort) និងសណ្ឋាគារអង្គរ(Angkor Village) ហ្នឹងទទួលយកបុគ្គលិក និងកម្មករទាំង៦៧នាក់ ដែលត្រូវបានបណ្ដេញចេញពីការងារនោះបានចូលធ្វើការឡើងវិញ។ ក៏ប៉ុន្ដែម្ចាស់សណ្ឋាគារបានជំទាស់ទៅនិងសេចក្ដីសម្រេចនោះ។
ថ្វីបើមានកូដកម្មនៅពីមុខសណ្ឋាគាររបស់ខ្លួនក្ដីម្ចាស់សណ្ឋាគារមិនបានចេញមកធ្វើការសម្របសម្រួលជាមួយបុគ្គលិកទាំងនោះទេ ដោយគ្រាន់តែឆ្លើយតបទៅនឹងការទាមទាររបស់បុគ្គលិកកម្មករទាំងនោះ តាមរយៈការបោះពុម្ពអក្សលើបដាមួយផ្ទាំង ដែលដាក់តាំងនៅពីមុខសណ្ឋាគារថា រយៈពេល១៧ឆ្នាំមកហើយសណ្ឋាគារអង្គរវិឡាបានផ្ដល់ជូននូវភ្ញៀវទេសចរណ៍ដែលមកស្នាក់នៅកន្លែងមួយដែល បង្ហាញអំពីវប្បធម៌ខ្មែរមានបរិស្ថានស្រស់ស្អាត កាផ្ដល់សេវាដ៏ល្អបំផុត។
នៅក្នុងប្រកាសនោះបានបញ្ជាក់ទៀតថាកន្លែងដែលភ្ញៀវទេសចរណ៍មកស្នាក់នៅ និងលំហែកាយជាកន្លែង ដែលមានភាពរូសរាយរាក់ទាក់ និងបរិយាកាសស្ងៀមស្ងាត់។ ដូច្នេះ
ដើម្បីធានានិងរក្សាសេវាកម្មនេះ គេមិនអាចទទួលយកអ្នកដែលមានការប្រមាថដាក់ថ្នាំពុលក្នុងអាហារ និងធ្វើកូដកម្មខុសច្បាប់ ឬក៏ការរំខានផ្សេងៗ ដែលធ្វើដោយសហជីពបានទេ។
ទោះបីយ៉ាងនេះក្ដីគេមានការសង្ឈឹមជឿជាក់ថា ចំពោះករណីវិវាទដ៏ចំរូងចំរាស់រវាងនិយោជិក និងនិយោជក នៃសណ្ឋាគារខាងលើនិងត្រូវបានអាជ្ញាធរខេត្ដជំនះដោះស្រាយចប់សព្វគ្រប់នាពេលឆាប់ៗ នេះជាក់ជាមិនខាន ដើម្បីកុំឱ្យមានការជះឥទ្ធិពលមិនល្អសាយភាយដល់តំបន់ទេសចរណ៍សំខាន់មួយនេះ។
គួរកត់សម្គាល់ថា ថ្ងៃទី៧ តុលា កម្លាំងប៉ូលិសបង្ក្រាបត្រូវបានដាក់ពង្រាយដើម្បីការពារសុវត្ថិភាព៕
ចែករំលែកព័តមាននេះ