រាជធានីភ្នំពេញ ៖ សពស្ត្រីម្នាក់ត្រូវបានអ្នកនេសាទបង់សំណាញ់នៅតាមដងទន្លេមេគង្គ ជាប់សំណាញ់បណ្តាលឱ្យគាត់ភ្ញាក់ខ្លួនក្រញាង ព្រឺសម្បុរខ្ញាក ទម្លាក់សំណាញ់ចោល ស្ទុះរត់ឡើងមកលើគោកសិន…បាត់ភ័យ និងដកដង្ហើមស្រួលបួល ទើបចុះទៅទាញសំណាញ់ និងសពឡើងគោក កាលពីវេលាម៉ោង១០ព្រឹកថ្ងៃទី១០ មីនា ២០១១ បន្ទាប់មកទើបរាយការណ៍ដល់សមត្ថកិច្ចប៉ូលិសប៉ុស្តិ៍ជ្រោយចង្វា ខណ្ឌឫស្សីកែវ មកពិនិត្យសព ។
សពស្ត្រីម្នាក់នេះពុំទាន់ត្រូវគេស្គាល់អត្តសញ្ញាណនៅឡើយទេ មានអាយុប្រមាណជាង៤០ឆ្នាំ ស្លៀកខោឈុតដេកយប់ និងមានតែអាវទ្រនាប់ពណ៌ខ្មៅប៉ុណ្ណោះ។ តាមសម្តីឈ្មោះសុះ ហានីហ្វា ហៅម៉ាប់ ភេទប្រុស អាយុ១៨ឆ្នាំ ជាសិស្សវិទ្យាល័យជា ស៊ីម ជ្រោយចង្វា មានទីលំនៅភូមិទី៣ សង្កាត់ជ្រោយចង្វា ខណ្ឌឫស្សីកែវ បានឱ្យដឹងថា នៅព្រឹកថ្ងៃកើតហេតុ ខ្លួនរួមទាំងមិត្តភក្តិចំនួន២នាក់ គឺឈ្មោះអ៊ីសា និងឈ្មោះសៃនី បាននាំគ្នាជិះទូកទៅបង់សំណាញ់តាមដងទន្លេមេគង្គមុខផ្ទះ ។ នៅពេលបង់សំណាញ់បាន៤សំណាញ់ក៏ជាប់សពស្ត្រីម្នាក់ ហើយបានអូសយកមកដាក់នៅមាត់ទឹក…ប៉ុន្តែមុននេះ ភ័យស្ទើរលស់ព្រលឹងទៅហើយ ។
ភ្លាមៗក៏មានការភ្ញាក់ផ្អើលដល់ប្រជាពលរដ្ឋក្បែរខាង ហើយរាយការណ៍ប្រាប់សមត្ថកិច្ច ។ សពស្ត្រីម្នាក់នោះត្រូវបានយុវជនដែលបង់សំណាញ់ជាប់នៅចម្ងាយប្រមាណ៦ម៉ែត្រ ពីមាត់ច្រាំង ។ ទោះបីជាយ៉ាងណា គេពុំទាន់ដឹងថា ស្ត្រីនោះស្លាប់ដោយសារអ្វីឡើយ ។ តាមសមត្ថកិច្ចឱ្យដឹងថា សពស្ត្រីនេះអាចស្លាប់កាលពីវេលាយប់ថ្ងៃទី៩ មីនា ហើយមិនទាន់អណ្តែតក៏ត្រូវបានគេបង់សំណាញ់ជាប់តែម្តង ៕
ចែករំលែកព័តមាននេះ