រាជធានីភ្នំពេញ ៖ លោកម៉ម ប៊ុនហេង រដ្ឋមន្ត្រីក្រសួងសុខាភិបាល និងជាប្រធានក្រុមការងារចុះជួយខណ្ឌសែនសុខ និងលោកឃួង ស្រេង អភិបាលខណ្ឌ លោកជា ខេមា លោកចេង មុនីរ៉ា អភិបាលរងខណ្ឌ នាល្ងាចថ្ងៃទី៤ តុលា បានអញ្ជើញចែកអំណោយជូនប្រជាពលរដ្ឋចំនួន២១៧គ្រួសារ នៅ៣ភូមិ ក្នុងសង្កាត់ព្រែកព្នៅ ដែលរងគ្រោះដោយទឹកជំនន់ចាប់តាំងពីចុងខែកញ្ញា រហូតដល់ខែតុលានេះ ។
រាជធានីភ្នំពេញ ៖ លោកម៉ម ប៊ុនហេង រដ្ឋមន្ត្រីក្រសួងសុខាភិបាល និងជាប្រធានក្រុមការងារចុះជួយខណ្ឌសែនសុខ និងលោកឃួង ស្រេង អភិបាលខណ្ឌ លោកជា ខេមា លោកចេង មុនីរ៉ា អភិបាលរងខណ្ឌ នាល្ងាចថ្ងៃទី៤ តុលា បានអញ្ជើញចែកអំណោយជូនប្រជាពលរដ្ឋចំនួន២១៧គ្រួសារ នៅ៣ភូមិ ក្នុងសង្កាត់ព្រែកព្នៅ ដែលរងគ្រោះដោយទឹកជំនន់ចាប់តាំងពីចុងខែកញ្ញា រហូតដល់ខែតុលានេះ ។ ការចែកអំណោយនេះ ធ្វើឡើងនៅបរិវេណអនុវិទ្យាល័យព្រែកព្នៅ ស្ថិតក្នុងសង្កាត់ព្រែកព្នៅ ខណ្ឌសែនសុខ។
លោកឃួង ស្រេង អភិបាលខណ្ឌសែនសុខ និងជាប្រធានគណៈកម្មាធិការគណបក្សប្រជាជនខណ្ឌ បានមានប្រសាសន៍ពីផលប៉ះពាល់ដោយសារទឹកជំនន់ទន្លេមេគង្គ នៅក្នុងខណ្ឌសែនសុខថា ចាប់ពីថ្ងៃទី២៣ កញ្ញា មកដល់ថ្ងៃទី៤ តុលា ឆ្នាំ២០១១ ប្រជាពលរដ្ឋរងគ្រោះសរុបមានចំនួន១.៥៨៩គ្រួសារ គិតជាមនុស្សរាយចំនួន៦.៩៩៨នាក់ និងផ្ទះ១.៤៣៦ខ្នង ត្រូវលិច។ ចំពោះប្រជាពលរដ្ឋដែលរងគ្រោះដោយទឹកជំនន់លិចលង់ទាំងស្រុងមានចំនួន៥៨២គ្រួសារ និងចំនួន៣៦៥គ្រួសារ បានទទួលអំណោយពីសាលារាជធានីភ្នំពេញ គឺមកពីសង្កាត់សំរោង និងសង្កាត់ពញាពន់ ។ អំណោយដែលប្រជាពលរដ្ឋទទួលបានពីអាជ្ញាធរក្នុង១គ្រួសារៗមានអង្ករ១០គីឡូក្រាម មី១កេសតូច ទឹកត្រី៣ដប ទឹកស៊ីអុីវ៣ដប និងទឹកបរិសុទ្ធដបធំចំនួន៦ដប។
លោកអភិបាលខណ្ឌបន្តថា ផ្លូវលំក្រួសក្រហមចំនួន១៩ខ្សែ ប្រវែង៦.១៤៨ម៉ែត្រ ផ្លូវបេតុង១ខ្សែប្រវែង៩២ម៉ែត្រ អគារកងទ័ពចំនួន១៣ខ្នង រងការខូចខាត។ ទីធ្លាសាលាចំនួន៤ និងវត្តចំនួន២ត្រូវទឹកលិច ថែមទាំងផ្អៀងកុដិឈើទំហំ៣ម៉ែត្រ គុណ៣ម៉ែត្រ អស់ចំនួន២ផងដែរ។ ចំពោះសន្ទូងចំនួន១៥៥ហិកតា ត្រូវទឹកលិច ក្នុងនោះចំនួន១០០ហិកតា ត្រូវខូចខាតទាំងស្រុង។
លោកម៉ម ប៊ុនហេង រដ្ឋមន្ត្រីក្រសួងសុខាភិបាល បានមានប្រសាសន៍ពាំនាំនូវការសាកសួរសុខទុក្ខពីសំណាក់សម្តេចតេជោហ៊ុន សែន និងលោកជំទាវកិត្តិព្រឹទ្ធបណ្ឌិតប៊ុន រ៉ានី ហ៊ុន សែន និងបានបញ្ជាក់ថា ការផ្តល់អំណោយតិចតួចនេះ គ្រាន់តែជាការសម្រន់បន្ធូរជីវភាពប្រចាំថ្ងៃរបស់បងប្អូនប៉ុណ្ណោះ ។ ចំពោះការព្រួយបារម្ភនៅពេលទឹកស្រក គឺប្រជាពលរដ្ឋអាចជួបប្រទះនឹងជំងឺរាករូស ជាពិសេសក្មេងអាចជួបបញ្ហានេះធ្ងន់ធ្ងរ ដែលអាចស្លាប់បាន ដូច្នេះត្រូវហូបទឹកឆ្អិនជាប់ជានិច្ច និងពេលបន្ទោបង់រួចហើយត្រូវជីកកប់ បើពុំដូច្នេះទេ ប្រជាពលរដ្ឋអាចប៉ះនឹងជំងឺមួយទៀត គឺអាសន្នរោគ រាក ក្អួតជាដើម។
លោករដ្ឋមន្ត្រីបន្តថា ចំពោះបន្លែឆៅដែលយកទៅលាងទឹកទន្លេ ពុំអាចស្អាតដូចទឹកម៉ាស៊ីននោះទេ ដូច្នេះប្រជាពលរដ្ឋគួរចៀសវាងហូបបន្លែឆៅ គឺត្រូវចំអិន។ ឯក្មេងៗត្រូវសម្រាកក្នុងមុង ដើម្បីចៀសវាងមូសខ្លាខាំ កើតជំងឺគ្រុនឈាម ហើយនៅពេលទៅផ្ទះវិញ ត្រូវសម្អាតជុំវិញផ្ទះកុំឱ្យទឹកដក់ នាំឱ្យកើតមូសខ្លាដែលជាភ្នាក់ងារចម្លងជំងឺគ្រុនឈាម ៕
ចែករំលែកព័តមាននេះ