រាជធានីភ្នំពេញ ៖ គណៈគ្រប់គ្រង បុគ្គលិក សាស្ត្រាចារ្យ និងនិស្សិតសាកលវិទ្យាល័យភ្នំពេញអន្តរជាតិជាង២០០នាក់ បានចូលរួមបរិច្ចាគឈាម កាលពីថ្ងៃទី៥ តុលា នៅសាកលវិទ្យាល័យភ្នំពេញអន្តរជាតិ ក្រោមអធិបតីភាពលោកហុក គឹមចេង ប្រធានមជ្ឈមណ្ឌលជាតិផ្តល់ឈាម។
លោកហុក គឹមចេង បានមានមតិសំណេះសំណាលក្នុងឱកាសនោះថា ឆ្លើយតបទៅនឹងអនុសាសន៍របស់សម្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដែលបានធ្វើការអំពាវនាវសូមឱ្យមានការបរិច្ចាគឈាមជាសាធារណៈ ដើម្បីបង្កើតធនាគារឈាមនោះ ឥឡូវនេះសកម្មភាពផ្តល់ឈាមមានការកើនឡើងគួរឱ្យកត់សម្គាល់ គឺមានចំនួន៥៥ភាគរយ ដែលពីមុនមានតែ២៥ភាគរយប៉ុណ្ណោះ ។
សាកលវិទ្យាល័យភ្នំេពញអន្តរជាតិ គឺជាសាកលវិទ្យាល័យមួយដែលបានបង្កើតបរិយាកាសសិក្សាប្រកបដោយផាសុកភាព ផ្តល់នូវកម្មវិធីសិក្សាទាន់សម័យ និងភាពច្នៃប្រឌិតប្រកបដោយគុណភាព ដើម្បីធ្វើយ៉ាងណាឱ្យនិស្សិតទាំងអស់មានចំណេះដឹងពិតប្រាកដ និងផ្សារភ្ជាប់ជាមួយបទពិសោធន៍ជាក់ស្តែងដែលជាតម្រូវការទីផ្សារការងារ។
សាកលវិទ្យាល័យភ្នំពេញអន្តរជាតិ ត្រូវបានបង្កើតឡើងនៅឆ្នាំ២០០៦ ក្រោមការទទួលស្គាល់ពីរាជរដ្ឋាភិបាល និងគណៈកម្មាធិការទទួលស្គាល់គុណភាពអប់រំនៃកម្ពុជា មានបណ្តុះបណ្តាលថ្នាក់ឧត្តមសិក្សា និងក្រោយឧត្តម សិក្សា រួមមានបរិញ្ញាបត្រ បរិញ្ញាបត្រជាន់ខ្ពស់ និងថ្នាក់បណ្ឌិត ដែលមានជំនាញសំខាន់ៗដូចជាគណនេយ្យ គ្រប់គ្រងទីផ្សារគ្រប់គ្រងសណ្ឋាគារទេសចរណ៍ សេដ្ឋកិច្ច ធនាគារហិរញ្ញវត្ថុ ច្បាប់ រដ្ឋបាលសាធារណៈ វិទ្យាសាស្ត្រកុំព្យូទ័រ និងអក្សរសាស្ត្រអង់គ្លេស ។ សាកលវិទ្យាល័យភ្នំពេញអន្តរជាតិ ផ្តល់ឱកាសដល់និស្សិតសិក្សាទាំងទ្រឹស្តី និងការអនុវត្តជាក់ស្តែង ជាសាកលវិទ្យា័យនាំមុខមួយដែលមានកេរ្តិ៍ឈ្មោះល្បីល្បាញនៅក្នុងប្រទេសកម្ពុជា ៕
ចែករំលែកព័តមាននេះ