រាជធានីភ្នំពេញ ៖ កាលពីព្រឹកថ្ងៃទី៣ តុលា ឆ្នាំ២០១១ លោកសុះ ម៉ាច ប្រធានសមាគមសិល្បករខ្មែរ បានផ្តល់ថវិកាចំនួន២០ម៉ឺនរៀល ដល់លោកឈិន វណ្ណារ៉េត អាយុ៤៨ឆ្នាំ អតីតសិល្បករសៀករហស្សកម្ម នៅសាកលវិទ្យាល័យភូមិន្ទវិចិត្រសិល្បៈ (បច្ចុប្បន្នបាត់បង់សមត្ថភាពពលកម្ម) ដោយជំងឺខ្សោយ ខ្វះអាហារូបត្ថម្ភ។
រាជធានីភ្នំពេញ ៖ កាលពីព្រឹកថ្ងៃទី៣ តុលា ឆ្នាំ២០១១ លោកសុះ ម៉ាច ប្រធានសមាគមសិល្បករខ្មែរ បានផ្តល់ថវិកាចំនួន២០ម៉ឺនរៀល ដល់លោកឈិន វណ្ណារ៉េត អាយុ៤៨ឆ្នាំ អតីតសិល្បករសៀករហស្សកម្ម នៅសាកលវិទ្យាល័យភូមិន្ទវិចិត្រសិល្បៈ (បច្ចុប្បន្នបាត់បង់សមត្ថភាពពលកម្ម) ដោយជំងឺខ្សោយ ខ្វះអាហារូបត្ថម្ភ។
លោកឈិន វណ្ណារ៉េត មានប្រពន្ធឈ្មោះរឿន សឿន អាយុ៣៥ឆ្នាំ មានកូនក្នុងបន្ទុក៨នាក់ ស្រី៤នាក់ ប្រុស៤នាក់។ បច្ចុប្បន្នលោកស្នាក់នៅភូមិត្រាល ឃុំកំពង់ពពិល ស្រុកពារាំង ខេត្តព្រៃវែង បានរងគ្រោះដោយទឹកជំនន់លិចផ្ទះ។ លោករៀបរាប់ប្រាប់អ្នកយកព័ត៌មានថា លោកបានចូលបម្រើសិល្បៈសៀកតាំងពី ឆ្នាំ១៩៨៤ មកនៅសាកលវិទ្យាល័យភូមិន្ទវិចិត្រសិល្បៈ តែបានបាត់បង់សមត្ថភាពពលកម្មជាច្រើនឆ្នាំហើយ ដោយសារមានជំងឺខ្សោយប្រចាំកាយ។ នៅរដូវវស្សានេះ ផ្ទះរបស់លោកក៏ដូចជាអ្នកភូមិប្រមាណ៣០គ្រួសារទៀត រងគ្រោះដោយទឹកជំនន់លិចផ្ទះ។ ថ្មីៗនេះ ប្រធានក្រុមបានដើរកត់ឈ្មោះប្រជាជនរងគ្រោះចំនួន៣០គ្រួសារ ទាំងផ្ទះគ្រួសាររបស់លោកផង តែកាលពីថ្ងៃទី២ តុលា មានគណៈប្រតិភូទៅពីភ្នំពេញ ចែកអំណោយ ស្រាប់តែបាត់ឈ្មោះគ្រួសាររបស់លោក និងប្រជាជនមួយចំនួនទៀត។ មានប្រជាជនតែ៧គ្រួសារប៉ុណ្ណោះបានទទួលអំណោយពីគណៈប្រតិភូ។
លោកសុះ ម៉ាច និងក្រុមការងារបានផ្តល់អំណោយដែលបានមកពីសប្បុរសជននានាជួយសមាគមសិល្បករខ្មែរផ្តល់ជូូនគ្រួសារលោកឈិន វណ្ណារ៉េត ចំនួន២០ម៉ឺនរៀល។
ក្រោយពីផ្តល់អំណោយជូនលោកវណ្ណារ៉េត រួចមក លោកសុះ ម៉ាច និងក្រុមការងារសមាគមបាននាំលោកយាយឡេង បូ អាយុ៧២ឆ្នាំ អតីតជាសិល្បការិនីល្ខោនបាសាក់មហាជន ដែលមានជំងឺប្រចាំកាយ (ជំងឺកកឈាមស្មាខាងឆ្វេង) ទៅព្យាបាល។ កាលពីអំឡុងឆ្នាំ១៩៨៨ ពេលលោកយាយសម្តែងជាតួម្តាយអង្គុលីមាលត្រូវអង្គុលីមាតាមសម្លាប់ លោកយាយរត់ចូលខាងក្នុងឆាក ប៉ះនឹងបង្គោលឈើជ្រុង ដួលរលំលើស្មា បណ្តាលឱ្យគ្រាំរហូតមកដល់បច្ចុប្បន្ន ។
លោកយាយឡេង បូ បានឱ្យដឹងថា លោកយាយចូលបម្រើសិល្បៈតាំងពីអាយុ១៣ឆ្នាំ មកម៉្លេះ ពេលនេះមានវ័យចាស់ជរា មិនចង់បានអ្វីក្រៅពីហូបឆ្ងាញ់ និងរស់នៅបន្តមួយរយៈទៀតប៉ុណ្ណោះ។ លោកយាយគ្មានកូន គ្មានប្តី គ្មានបងប្អូនទេ សព្វថ្ងៃរស់នៅក្នុងសមាគមរបស់លោកតាហ្វ៊ុយ ហ្សូ ។
ដោយឃើញលោកយាយឡេង បូ មានជំងឺ លោកសុះ ម៉ាច និងក្រុមការងារបានអញ្ជើញលោកយាយទៅឱ្យគ្រូពេទ្យពិនិត្យ និងព្យាបាលនៅមន្ទីរពេទ្យព្រះកេតុមាលា កាលពីព្រឹកថ្ងៃទី៣ តុលា ឆ្នាំ២០១១ ដោយចំណាយថវិការបស់សមាគមប្រមាណជាង៨០ម៉ឺនរៀល ដោយគិតទាំងការពិនិត្យ និងថ្នាំសម្រាប់ព្យាបាលរហូតជាសះស្បើយ។
លោកយាយឡេង បូ និងលោកឈិន វណ្ណារ៉េត បានថ្លែងអំណរគុណចំពោះលោកសុះ ម៉ាច និងក្រុមការងារសមាគមសិល្បករខ្មែរដែលតែងតែយកចិត្តទុកដាក់ចំពោះសិល្បករ សិល្បការិនីចាស់ជរា បាត់បង់សមត្ថភាពពលកម្ម។
លោកយាយ ឡេង បូ អំពាវនាវចំពោះសិល្បករ សិល្បការិនីជំនាន់ក្រោយ និងសប្បុរសជននានាឱ្យគាំទ្រសមាគមសិល្បករខ្មែរបន្តទៀត៕
ចែករំលែកព័តមាននេះ