រាជធានីភ្នំពេញ ៖ ក្នុងគំរោងមូលដ្ឋានសំរាប់អប់រំ បណ្តុះបណ្តាលវិជ្ជាជីវៈអាចារ្យ ដើម្បីសង្គមខ្មែរនៅថ្ងៃអនាគត វិទ្យាស្ថានមនុស្សសាស្ត្រ និងវិទ្យាសាស្ត្រសង្គមនៃរាជបណ្ឌិត្យសភាកម្ពុជា បានរៀបចំសិក្ខាសាលារយៈពេលពេញមួយថ្ងៃស្តីពីអាចារ្យក្នុងសង្គមខ្មែរបច្ចុប្បន្ន ។ សិក្ខាសាលានេះ បានប្រព្រឹត្តធ្វើឡើងកាលពីថ្ងៃទី១០ កញ្ញា ក្រោមអធិបតីភាពលោកបណ្ឌិតសភាចារ្យព្រុំ ម៉ាល់ ទីប្រឹក្សាអមទីស្តីការគណៈរដ្ឋមន្ត្រី ។ តាមរបាយការណ៍បូកសរុបរបស់លោកសោម សុមុនី ប្រធានវិទ្យាស្ថានមនុស្សសាស្ត្រ និងវិទ្យាសាស្ត្រសង្គមនៃរាជបណ្ឌិត្យសភាកម្ពុជាបានឱ្យដឹងថា សិក្ខាសាលានេះទទួលបានការឧបត្ថម្ភថវិកាពីរាជរដ្ឋាភិបាលកម្ពុជា ។ សិក្ខាកាមចូលរួមចំនួនជាង២០០នាក់ មកពីគ្រប់មជ្ឈដ្ឋានដូចជាព្រះសង្ឃ អាចារ្យ យាយជី តាជី មន្ត្រីជំនាញផ្នែកធម្មការ និងសាសនា នៅតាមបណ្តាខេត្តទូទាំងប្រទេស មន្ត្រីរាជការ សិស្ស និស្សិត និងអ្នកសារព័ត៌មានផងដែរ ដែលសុទ្ធសឹងជាអ្នកមានចំណេះដឹងខាងសាសនា ជំនឿប្រពៃណីទំនៀមទំលាប់នៅក្នុងសង្គមខ្មែរ បានចូលរួមពិភាក្សាយ៉ាងផុលផុស និងផ្លាស់ប្តូរបទពិសោធន៍ចំណេះដឹងដែលពាក់ព័ន្ធទៅនឹងអាចារ្យ ស្វែងយល់អំពីបញ្ញត្តិនៃពាក្យអាចារ្យនៅក្នុងសង្គមខ្មែរ ស្វែងយល់អំពីការប្រតិបត្តិ និងការបណ្តុះបណ្តាលអាចារ្យ កំណត់ឱ្យបានត្រឹមត្រូវ និងច្បាស់លាស់អំពីប្រភេទនៃអាចារ្យនីមួយៗ ស្វែងយល់អំពីលក្ខណសម្បត្តិរបស់អាចារ្យ ដើម្បីធ្វើជាមូលដ្ឋានក្នុងការជ្រើសរើសអាចារ្យ និងដើម្បីចងក្រងទុកជាឯកសារ សំរាប់ប្រភេទនីមួយៗនៃអាចារ្យ ។
លោកសោម សុមុនី បញ្ជាក់ថា អង្គសិក្ខាសាលាបានទទួលអនុសាសន៍មួយចំនួនដូចជា ត្រូវកំណត់ឱ្យបានច្បាស់នូវតួនាទី និងភារកិច្ចរបស់អាចារ្យ អាចារ្យគួរតែមានក្រមសីលធម៌ច្បាស់លាស់ អាចារ្យត្រូវតែចេះច្បាប់រដ្ឋ ចំណេះដឹងទាំងផ្លូវ លោក និងផ្លូវធម៌ ។ ក្រសួងធម្មការ និងសាសនា និងក្រសួងវប្បធម៌ និងវិចិត្រសិល្បៈគួរតែសហការគ្នាដើម្បីបង្កើនការយកចិត្តទុកដាក់ដល់ការអប់រំ និងបណ្តុះបណ្តាលអាចារ្យទូទាំងប្រទេស ។ ក្រសួងនិងស្ថាប័នពាក់ព័ន្ធ ត្រូវមានយន្តការត្រួតពិនិត្យច្បាស់លាស់មុននឹងចាត់តាំងឱ្យធ្វើជាអាចារ្យ អាចារ្យគួរមានអាយុតិចបំផុត៥៥ឆ្នាំ ចំណេះដឹងខ្ពស់ អត្តចរិត និងគុណធម៌ល្អ ចងក្រងលទ្ធផលសិក្ខាសាលា និងធ្វើការបោះពុម្ពផ្សាយ ។ សូមកុំឱ្យមានការបែងចែកឋានៈរបស់អាចារ្យដូចជា អាចារ្យវត្ត អាចារ្យវាំង សូមឱ្យមានកម្មវិធីបែបនេះយ៉ាងហោចណាស់មួយឆ្នាំម្តង ហើយសមាជិកភាគច្រើនត្រូវមានតួនាទីជាអាចារ្យ និងអ្នកមានចំណេះដឹងផ្នែកវប្បធម៌ សាសនា សូមកុំឱ្យប្រើពាក្យវិសោធនកម្មក្នុងពេលកាត់សក់នៃពិធីរៀបអាពាហ៍ពិពាហ៍ ។
លោកព្រុំ ម៉ាល់ បានថ្លែងថា អាចារ្យគឺជាបុគ្គលដែលគួរជាទីគោរព ពីព្រោះគាត់ជាអ្នកបង្កើតទំនាក់ទំនងល្អរវាងពុទ្ធបរិស័ទ និងព្រះសង្ឃ ហើយរាល់កម្មវិធីទាំងអស់របស់ព្រះពុទ្ធសាសនាត្រូវមានការចូលរួមពីអាចារ្យទើបកម្មវិធីនេះមានដំណើរការប្រកបដោយភាពរលូន។ អាចារ្យដើរតួនាទីជាអ្នកកាន់កម្មវិធីផង សូត្រធម៌ឆ្លើយឆ្លងជាមួយព្រះសង្ឃផង នាំពុទ្ធបរិស័ទ្ធឱ្យចេះសូត្រធម៌តាមផង និងជួយសំរបសំរួលចាត់ចែងទេយ្យវត្ថុ និងថវិកាប្រគេនព្រះសង្ឃផង ។ នៅក្នុងពិធីបិទសិក្ខាសាលា លោកជំទាវខ្លូត ធីតា ប្រធានរាជបណ្ឌិត្យសភាកម្ពុជា បានថ្លែងថា សិក្ខាសាលានេះពិតជាមានសារសំខាន់ណាស់ព្រោះបានដាស់សតិអារម្មណ៍ពុទ្ធសាសនិកជនកម្ពុជាឱ្យរឹតតែយល់អំពីតួនាទីរបស់អាចារ្យ ចេះរួមចំណែករក្សាតំលៃអាចារ្យក្នុងសម័យពហុវប្បធម៌ ៕
ចែករំលែកព័តមាននេះ