រាជធានីភ្នំពេញ ៖ គិតតាំងពីរសៀលថ្ងៃទី២៤ កញ្ញា រហូតដល់ថ្ងៃទី៣ តុលា ឆ្នាំ២០១១ លោកគួច ចំរើន អភិបាលខណ្ឌមានជ័យបានចលនាមន្ត្រីរាជការ និងសប្បុរសជនក្នុងមូលដ្ឋានឱ្យយកចិត្តទុកដាក់ជួយសង្គ្រោះអ្នករងគ្រោះ ដោយសារទឹកជំនន់រយៈពេលជាង២សប្តាហ៍កន្លងមកនេះ។
ដោយឡែកប្រជាពលរដ្ឋរស់នៅភូមិដើមស្លែង សង្កាត់ច្បារអំពៅទី២ ដែលរងគ្រោះធ្ងន់ធ្ងរ ជាងគេនោះត្រូវលោកគួច ចំរើន និងលោកយិន វុធ ចៅសង្កាត់ច្បារអំពៅទី២ សហការជាមួយព្រះតេជគុណហោ សុខុន ចៅអធិការវត្តច្បារអំពៅនាំយកស្បៀងអាហារទៅចែកជូនជាបន្តបន្ទាប់រយៈពេលបីថ្ងៃជាប់គ្នា គឺថ្ងៃទី១ ទី២ និងទី៣ តុលា។ ព្រះតេជគុណហោ សុខុន សន្យាបន្តចែកជូនប្រជាពលរដ្ឋរងគ្រោះនៅក្នុងសង្កាត់ច្បារអំពៅទី២ឱ្យបានគ្រប់ៗគ្នា ដើម្បីចូលរួមរំលែកការលំបាក។
សកម្មភាពចែកអំណោយនេះ លោកអភិបាលខណ្ឌបានដឹកនាំលោកហ៊ុយ សារុន អភិបាលរងខណ្ឌ លោកហៀក ចាន់លាងអភិបាលរងខណ្ឌ និងលោកស្រីបី ណៃ អភិបាលរងខណ្ឌចែកអំណោយជូនដល់ប្រជាពលរដ្ឋគ្រប់ខ្នងផ្ទះ ដែលកំពុងរស់នៅក្នុងទឹក ដោយជិះទូកដឹកជញ្ជូនស្បៀងអាហារយកទៅចែកជូន៕
ចែករំលែកព័តមាននេះ