រាជធានីភ្នំពេញ ៖ ទេយ្យទានជាគ្រឿងឧបភោគ-បរិភោគ សម្ភារប្រើប្រាស់ចំនួន៣១មុខ និងថវិកា៣.០៧០.០០០រៀល ដែលគិតជាថវិកាទាំងអស់សរុបស្មើនឹង១១.៨១៥.០០០រៀល ត្រូវបានព្រះទេពសត្ថា ឃី សុវណ្ណរតនា ព្រះចៅអធិការវត្ដមង្គលវន័ ហៅស្វាយដង្គុំ ប្រគល់ជូនដល់កាកបាទក្រហមកម្ពុជាសាខារាជធានីភ្នំពេញ នារសៀលថ្ងៃទី១ តុលា ឆ្នាំ២០១១ ដែលអញ្ជើញទៅទទួលដោយ លោកប៉ា សុជាតិវង្ស សមាជិកគណៈកម្មាធិការកណ្ដាលកាកបាទក្រហមកម្ពុជា និងជាប្រធានគណៈកម្មាធិការសាខាកាកបាទក្រហមកម្ពុជារាធានីភ្នំពេញ ព្រមទាំងលោកជំទាវ រួមដំណើរដោយ លោកជំទាវ លោកឧកញ៉ា លោក-លោកស្រី ក្នុងជួរគណៈកម្មាធិការសាខា មន្ដ្រីប្រតិបត្ដិសាខាជាច្រើនរូបទៀត ។
ព្រះទេពសត្ថា ឃី សុវណ្ណរតនា បានសង្ឃដីកាថា ដោយទទួលដំណឹងអំពីគ្រោះទឹកជំនន់ដែលបានជោរជន់លិចលង់ទៅលើលំនៅដ្ឋានរបស់ប្រជាពលរដ្ឋយើងនៅតាមមូលដ្ឋានមួយចំនួន ក្នុងរាជធានីភ្នំពេញរបស់យើងនេះ ទើបព្រះអង្គមាននូវទេយ្យទានបន្ដិចបន្ដួចនេះដើម្បីរួមចំណែកជួយសម្រាលដល់ការលំបាករបស់បងប្អូនជនរងគ្រោះយើង តាមរយៈសាខា ក៏ដូចជា កាកបាទក្រហមកម្ពុជា ក្រោមការដឹកនាំដ៏ត្រឹមត្រូវប្រកបដោយភាពច្នៃប្រឌិតនៃលោកជំទាវកិត្ដិព្រឹទ្ធបណ្ឌិតប៊ុន រ៉ានី ហ៊ុន សែន ជាប្រមុខដឹកនាំ។
លោកប៉ា សុជាតិវង្ស បានមានប្រសាសន៍ពាំនាំនូវការផ្ដាំផ្ញើសាកសួរសុខទុក្ខពីសំណាក់ លោកជំទាវកិត្ដិព្រឹទ្ធបណ្ឌិតប៊ុន រ៉ានី ហ៊ុន សែន ប្រធានកាកបាទក្រហមកម្ពុជា និងសូមថ្លែងអំណរព្រះគុណដ៏ជ្រាលជ្រៅបំផុតចំពោះព្រះទេពសត្ថា ឃី សុវណ្ណរតនា ដែលបានប្រគល់នូវទេយ្យទានជូនដល់សាខារាជធានីភ្នំពេញ ចំពេលដែលសាខាកំពុងត្រូវការក្នុងការជួយសង្គ្រោះដល់ប្រជាពលរដ្ឋយើងដែលកំពុងរងគ្រោះ ដោយសារទឹកជំនន់ នៅតាមបណ្ដាមូលដ្ឋានមួយចំនួន ដែលនេះបានសរបញ្ជាក់ឱ្យឃើញពីសិល្បៈនៃការចែករំលែកដ៏ល្អក្នុងការជួយគ្នាទៅវិញទៅមករបស់ខ្មែរយើង ក៏ដូចជាការផ្សារភ្ជាប់គ្នាពីវិស័យពុទ្ធចក្រ និងអាណាចក្រផងដែរ ។
ទន្ទឹមនឹងនោះ លោកក៏បានជម្រាបប្រគេន អំពីសកម្មភាពរបស់កាកបាទក្រហមកម្ពុជាក្រោមការដឹកនាំដ៏ឈ្លាសវៃប្រកបដោយគតិបណ្ឌិតនៃលោកជំទាវកិត្ដិព្រឹទ្ឋបណ្ឌិតប្រធាន
ប៊ុន រ៉ានី ហ៊ុន សែន ជាប្រមុខដឹកនាំគឺមានការរីកចំរើនយ៉ាងខ្លាំងទៅក្នុងតំបន់ ហើយលោកជំទាវបានយកចិត្ដទុកដាក់ក្នុងការរៀបចំរចនាសម្ព័ន្ឋតាំងពីថ្នាក់កណ្ដាលរហូតដល់មូលដ្ឋានការអភិវឌ្ឍន៍ស្ថាប័ន ធនធានមនុស្ស ធនធានហិរញវត្ថុ គិតគូរពីសុខុមាលភាពរបស់ប្រជាពលរដ្ឋ និងឆ្លើយតបចំពោះគ្រោះមហន្ដរាយនានាបានទាន់ពេលវេលា ដែលធ្វើឱ្យសប្បុរសជនទាំងជាតិ អន្ដរជាតិមានការជឿជាក់គាំទ្រ ហើយបានក្លាយជាកាកបាទក្រហមដែលឈានមុខគេ ក៏ដូចជារួមចំណែកក្នុងការពន្លឿនការអនុវត្ដន៍យុទ្ធសាស្ដ្រកាត់បន្ថយភាពក្រីក្រនៃរាជរដ្ឋាភិបាលផងដែរ។
ចុងបញ្ចប់ លោកប្រធានគណៈកម្មាធិការសាខាក៏សូមសន្យាថា សាខានឹងពាំនាំយកទេយ្យទានទាំងនេះទៅជួយឱ្យដល់ដៃប្រជាពលរដ្ឋយើងដែលកំពុងរងគ្រោះដោយសារទឹកជំនន់ ក៏ដូចជាទទួលរងគ្រោះដោយគ្រោះមហន្ដរាយផ្សេងៗនៅក្នុងរាជធានីភ្នំពេញយើង ឱ្យស្របតាមទឹកព្រះទ័យរបស់ព្រះអង្គជាម្ចាស់ទេយ្យទាន៕
ចែករំលែកព័តមាននេះ