រាជធានីភ្នំពេញ ៖ ប្រជាពលរដ្ឋទូទាំងប្រទេសជាពិសេសអ្នករស់នៅក្នុងរាជធានីភ្នំពេញដែលបានតាមដានបទល្មើសរបស់សិស្សមេធាវី ឈ្មោះជីប ធី និងតារាកំប្លែងនាងក្អយ ដែលកំពុងគេចខ្លួនពីដីកានាំខ្លួន និងចាប់ខ្លួនរបស់សាលាដំបូងរាជធានីភ្នំពេញ ហើយចេះតែបានសុខរហូតនោះ តើដល់ពេលណាទើបសមត្ថកិច្ចចាប់ខ្លួនអ្នកទាំង២នោះមកជំនុំជម្រះពីបទរំលោភសេពសន្ថវៈ និងឆបោក (រំលោភសេចក្តីទុកចិត្ត) ប្រាក់ ឬរថយន្តជាច្រើនគ្រឿង?
លោកជីប ធី សិស្សមេធាវីប្រើល្បិចលួងលោមរំលោភសេពសន្ថវៈកូនស្រីរបស់មិត្តភក្តិដែលយកទៅផ្ញើ (រស់នៅជាមួយ) នាងម្នាក់នេះ គឺជាក្មេងស្រីដែលមានអាយុទើបតែ១៥ឆ្នាំ ប៉ុណ្ណោះត្រូវក្លាយជាចំណីតណ្ហារបស់លោកជីប ធី អស់ពេលជាច្រើនខែ ទម្រាំឪពុកម្តាយតស៊ូមតិផ្នែកផ្លូវច្បាប់សង្គ្រោះនាងចេញរួចពីបិសាចតណ្ហានេះ ។ មិនតែប៉ុណ្ណោះ ឈ្មោះជីប ធី អាងខ្លួនចេះ-យល់ដឹងផ្នែកផ្លូវច្បាប់ ក៏ប្រើល្បិចអង្គុយលើច្បាប់បោកបញ្ឆោតឪពុករបស់ក្មេងស្រីរងគ្រោះ ឱ្យមកយកលុយជំងឺចិត្តពីខ្លួន លុះឪពុកនាងមកដល់ ស្រាប់តែឱ្យប៉ូលិសចាប់ខ្លួនបុរសនោះតែម្តង…មានន័យថា កូនស្រីជំទង់ក្លាយជាចំណីតណ្ហារបស់លោកជីប ធី ហើយខ្លួនឯង (ឪពុករបស់ក្មេងស្រី) ជាប់គុកដោយសារឈ្មោះជីប ធី ប្រើល្បិចហៅប៉ូលិសចាប់ថែមទៀត…ឥឡូវដឹងរឿងបិសាចតណ្ហានេះអស់ហើយ តើដល់ពេលណាទើបសមត្ថកិច្ចចាប់ខ្លួនជននេះ?
ចំណែកនាងក្អយ ពូកែខាងប្រើល្បិចជួលរថយន្តគេជិះមានការ ឬដឹកអីវ៉ាន់ សំអាងការរបស់នាង ឬដឹកអីវ៉ាន់ វង់តន្ត្រីរបស់នាងរួចហើយយកទៅបញ្ចាំបានប្រាក់រាប់សិបម៉ឺនដុល្លារ ដើរលេងស៊ីចាយហ៊ឺហា និងលេងល្បែងស៊ីសងនៅតាមកាស៊ីណូចាញ់ហ្មត់អស់…ប៉ូលិសដឹងឫសគល់រឿងច្បាស់ណាស់ ប៉ុន្តែមិនហ៊ានចាប់ខ្លួននាងក្អយទេ ព្រោះថា មានមេធំមួយនៅក្រសួងមហាផ្ទៃឈរពាំងពីមុខ។ ឱ…លោកធំប៉ូលិសអ្ហើយ! ឈរពាំងមុខជនសង្គមងងឹតបែបនេះតើមានតម្លៃទេ? ឬមួយខ្លួនឯងជាប់ពាក់ព័ន្ធហ៊ុនហយជាមួយនាងក្អយដែរ? បើអញ្ចឹងមែន គួរតែចាប់ទាំងអស់ ព្រោះថា ក្នុងជួរប៉ូលិសក្រសួងមហាផ្ទៃមិនមែនមានធំតែលោកប៉ូលិសម្នាក់ហ្នឹងឯណា?
អ្នកតាមដានរឿងនេះបានធ្វើការរិះគន់ខ្លាំងៗថា គិតមកដល់ថ្ងៃទី៣០ កញ្ញា ២០០១ រឿងនាង ក្អយ ប្រហែលជាង៣ខែហើយ រីឯរឿងជីប ធី ក៏ប្រហែលជាង២ខែដែរ ហើយលោកជីប ធី និងនាងក្អយ សុទ្ធតែមានដីកានាំខ្លួនលើកទី១ លើកទី២ ទៀតផង ដឹងថា ពួកគេរស់នៅឯណា ហើយ ម៉េចមិនចាប់យកមកឱ្យតុលាការជម្រះទោស? តាមប្រភពព័ត៌មានលួចខ្សឹបថា នាងក្អយ ទៅលាក់ខ្លួននៅឯខេត្តព្រៃវែងចំណែកជីប ធី ទៅលាក់ខ្លួននៅឯខេត្តកំពត រឿងនេះប៉ូលិសអាចដឹងច្បាស់ណាស់ ហេតុម៉េចមិនចាប់អ្នកទាំង២នោះមកផ្តន្ទាទោស? ប្រសិនបើប៉ូលិសជំនាញឆ្លើយថា អត់ដឹងអ្នកទាំង២នោះទៅលាក់ខ្លួននៅកន្លែងណា នេះមានន័យថា ប៉ូលិសខ្សោយ… គួរតែចុះចេញពីមុខតំណែងទុកឱ្យប៉ូលិសពិតប្រាកដ ឬអ្នកធ្វើការពិតប្រាកដគេចាត់ការវិញ ។
មួយវិញទៀត ជនដៃដល់ឈ្មោះមាំង បាញ់បុរស២នាក់ស្លាប់ ពេលយប់ខណៈបុរស២នាក់នោះឃាត់ដំណើររបស់គេ ហើយគេបាញ់ការពារខ្លួនសោះ ប្រកាសចាប់គេ និងជូនរង្វាន់ច្រើនទៀត? ចុះរឿងនាងក្អយ បោកប្រាស់គេច្រើននាក់យករថយន្តទំនើបៗច្រើនគ្រឿងបញ្ចាំ-លក់ ដោយសេរី យកលុយដើរស៊ីចាយហ៊ឺហា លេងល្បែងក្នុងកាស៊ីណូ និងឈ្មោះជីប ធី ខ្លួនឯងរៀនច្បាប់ (សិស្សមេធាវី) យកច្បាប់មកជាន់ឈ្លី ដោយប្រើល្បិចលួងលោមរំលោភសេពសន្ថវៈ ក្មេងស្រីអាយុ១៥ឆ្នាំ និងចាប់ឪពុករបស់នាងដាក់គុកថែមទៀត ហេតុអ្វីសមត្ថកិច្ចមិនចាប់ខ្លួន? ឬមួយប៉ូលិសគិតថា តុលាការចេញដីកានាំខ្លួន ខ្ជិលចាប់ រង់ចាំដីកាចាប់ខ្លួនសឹមចាប់? ឬមួយប៉ូលិសទុកឱ្យពេលវេលាកន្លងផុតទី ហើយគេរាល់គ្នាភ្លេច ប៉ូលិសមិនចាំបាច់ចាប់ខ្លួននាំតែហត់ ហើយជនសង្គមងងឹតទាំង២នោះរួចខ្លួនដោយស្រួល? ប្រសិនជាបែបនេះ មែន គឺមានតែប៉ូលិសអង្គភាពនោះទេ ដែលលើកទឹកចិត្តដល់លជនសង្គមងងឹត ៕
ចែករំលែកព័តមាននេះ