រាជធានីភ្នំពេញ ៖ ហ៊ុល ដារ៉ា មកពីក្លឹបសាលវ័ន្តកីឡា ជួបរាជសីហ៍ បាបា មកពីក្លឹបសម្រែករាជសីហ៍ បង្ក្រាបគ្រឿងញៀន នៅលើសង្វៀន CTN ថ្ងៃសុក្រទី៣០ កញ្ញា នេះ ខណៈអ៊ឹង បូរ៉ា មកពីក្លឹបសិង្ហកីឡាជួបជ័យ វណ្ណៈ មកពីក្លឹបឃ្លាំងមឿងកីឡា។ រវាង២គូខាងលើនេះប្រកួតគ្នាក្នុងវគ្គជម្រុះវិលជុំខាងពូល A ដើម្បីឈានទៅដណ្តើមតំណែងខ្សែក្រវាត់ខារ៉ាបាវទម្ងន់៥៤គីឡូក្រាម។
ហ៊ុល ដារ៉ា ការប្រកួតរបស់គេកន្លងមកសរុបបាន៤លើករួចមកហើយ ប៉ុន្តែក្នុងនោះឈ្នះតែ១ប្រកួតទេ។ ដូច្នេះនៅសល់តែការប្រកួត១លើកនេះទៀត នឹងត្រូវបញ្ចប់ ប៉ុន្តែអ្វីដែលសំខាន់នោះសម្រាប់ការប្រកួតលើកនេះ បើទោះជាដារ៉ាចាញ់ ឬឈ្នះនោះក៏ចៀសមិនផុតពីហាលខោត្រឡប់ទៅផ្ទះវិញដែរ។
ចំណែករាជសីហ៍ បាបា វិញក៏មិនខុសពីដារ៉ាប៉ុន្មានដែរ ព្រោះថា ការប្រកួតទាំង៤លើករបស់គេមកនោះឈ្នះ២ចាញ់២ មាន៨ពិន្ទុ។ ការប្រកួតលើកចុងក្រោយ បើទោះជាឈ្នះក៏មិនសូវជាមានសង្ឃឹមបន្តការប្រកួតប៉ុន្មានដែរ។ ជ័យវណ្ណៈ និងអ៊ឹង បូរ៉ា ដែលមានពិន្ទុដាច់គេនៅក្នុងពូល A ។ ពួកគេពេលនេះប្រកួតបាន៤លើករួចមកហើយក្នុងនោះមិនទាន់ស្គាល់ចាញ់ឡើយ សរុបមាន១២ពិន្ទុ។ ដូច្នេះសម្រាប់ការប្រកួតលើកនេះចាញ់ ឬឈ្នះគឺពួកគេមិនខ្វល់ទេ។ រវាងគូនេះប្រជែងគ្នាយកលេខ១ ក្នុងពូលតែប៉ុណ្ណោះ។
ដោយឡែកសម្រាប់គូប្រកួតមិត្តភាពនៅក្នុងសប្តាហ៍នេះផាន់ សុវណ្ណ ក្លឹបមិត្តប៉ូលិសជួបប្រកួតជាមួយ ពេជ្រ ប៊ុនថេន មកពីក្លឹបខេមរិន្ទមានរិទ្ធ។ ឈិន ធារ៉ា មកពីក្លឹបអន្លង់វែង ជួបជាមួយឡុង ប៊ុនយីម មកពីក្លឹបសាលវ័ន្តកីឡា។ ចាន់ បូរី មកពីក្លឹបខេត្តកំពង់ឆ្នាំងជួបយឹម វិចិត្រ មកពីក្លឹបឥន្ទ្រីកីឡា ជាលក្ខណៈសាកល៕
ចែករំលែកព័តមាននេះ