កាលពីថ្ងៃទី១៦ កញ្ញា កន្លងមកនេះកាសែតបារាំង LE MONDE បានចុះផ្សាយអត្ថបទមួយអំពីការរួមភេទដោយដាក់ចំណងជើងអត្ថបទនេះថា ការរួមរ័កគ្នាញឹកញាប់គឺរស់បានយូរ។ អត្ថបទនោះបានដកស្រង់ការវាយតម្លៃរបស់វេជ្ជបណ្ឌិតខាងជំងឺបេះដូង និងអាហារបំប៉នមួយរូបលោក FREDERIC SALDMANN ដែលនិយាយថា ការរួមរ័កមេត្រី១២លើកក្នុងមួយខែជួយបង្កើនអាយុបាន១០ឆ្នាំ។
យោងតាមកាសែត LE MONDE ថា ការរួមភេទរួមចំណែកដល់សុខុមាលភាពផ្តល់សុភមង្គល ហើយទីបំផុតធ្វើឱ្យយឺតយ៉ាវដល់ដំណើរការនៃការឆាប់ចាស់។ ការផលិតអ័រម៉ូនក្នុងពេលរួមភេទផ្តល់នូវថាមពល ហើយធ្វើឱ្យយើងកាន់តែមានភាពរឹងប៉ឹងដោយមិននិយាយពីរឿងសប្បាយរីករាយផងទេ។
ការសិក្សាជាច្រើនចេញផ្សាយចាប់តាំងពីជាង១០ឆ្នាំមកនេះបង្ហាញថា ការរួមរ័កពុំត្រឹមតែល្អសម្រាប់ផ្លូវចិត្តប៉ុណ្ណោះទេ ក៏ប៉ុន្តែជួយធ្វើឱ្យមានសុខភាពល្អ និងមានអាយុវែងទៀតផង។ រាល់សរីរាង្គទទួលបានគុណប្រយោជន៍ពីការរួមភេទដែលគេពេញចិត្ត។ ពុំមានហេតុផលណាមួយចាត់ទុកការរួមរ័កជារឿងមិនល្អឡើយ។
កាលពីឆ្នាំ២០០៧ការសិក្សាធ្វើឡើងដោយគ្រូពេទ្យជំនាញខាងខួរក្បាលជនជាតិអង់គ្លេសលោក DAVID WEEK នៃមន្ទីរពេទ្យ ROYAL EDINBURGH HOSPITAL បង្ហាញថា ជីវិតរួមភេទសកម្មអាចជួយពន្យារដំណើរការនៃការឆាប់ចាស់។ នារី និងបុរស៣.៥០០នាក់មានអាយុពី២០ទៅ១០៤ឆ្នាំបានចូលរួមក្នុងការសិក្សានេះ ហើយគេពិនិត្យឃើញចំណុចរួម២គឺ សកម្មភាពរួមភេទយ៉ាងសកម្ម ហើយពួកគេមើលទៅហាក់ដូចជានៅក្មេងជាងអាយុ។
ក្នុងសៀវភៅរបស់លោកមានចំណងជើងថា ជីវិត និងពេលវេលា ចេញផ្សាយដោយក្រុមហ៊ុនបោះពុម្ព FLAM-MARION លោក FREDERIC SALDMANN អ្នកជំនាញខាងបេះដូង និងអាហារបំប៉នអះអាងថា មានទំនាក់ទំនងមួយរវាងការរួមភេទ អាយុយឺនយូរ និងសុខភាព។ ការរួមភេទផ្តល់នូវសុខុមាលភាព ហើយជួយអ្នកដែលរួមភេទបាន១២ដងក្នុងមួយខែបង្កើនអាយុបាន១០ឆ្នាំ។ ការរួមភេទធ្វើឱ្យបាត់រោគតប់ប្រមល់ STRESS និងភាពតានតឹងក្នុងអារម្មណ៍ ធ្វើឱ្យបាត់ឈឺខ្នង និងរោយកញ្ចឹង.ក។ និយាយរួមវាជួយផ្តល់ថាមពល។ ទន្ទឹមនឹងនេះញ៉ាំងឱ្យមានការបញ្ចេញឈាមសំបូរដោយអុកស៊ីហ្សែន និងអ័រម៉ូនដល់បណ្តាកោសិកា ហើយរុញច្រានចោលឈាមអាក្រក់ និងលាយសារធាតុពុល។ ការរួមរ័កធ្វើឱ្យបេះដូង និងសួតមានដំណើរការល្អ ក៏ប៉ុន្តែត្រូវមានការប្រុងប្រយ័ត្ន ជាពិសេសចំពោះពួកអ្នកមានបញ្ហាបេះដូងធ្ងន់ធ្ងរ។
ការរួមភេទក៏ជួយឱ្យយើងអាចទប់ទល់ប្រឆាំងបញ្ហាទាំងឡាយដូចជាការព្រឺរងា រោគសញ្ញានៃជំងឺគ្រុនផ្តាសាយ ជាដើម ហើយអាចជួយខ្លាំងបំផុតដល់ចលនាសាច់ដុំ។ អ្នកឯកទេសរូបនេះបន្តថា ការរួមភេទទៀងទាត់ជួយទប់ស្កាត់ជំងឺជាច្រើន ជាពិសេសជំងឺមហារីក PROSTATE សម្រាប់បុរស និងជំងឺមហារីកដោះសម្រាប់នារី ឬជំងឺបេះដូង។ ប្រការនេះវាកាន់តែសំខាន់ថែមទៀត ព្រោះឧប្បត្តិហេតុនៃជំងឺគាំងបេះដូងមានការកើនឡើងជាមួយមនុស្សដែលមានអាយុកាន់តែច្រើន ជាពិសេសពេលសកម្មភាពរួមភេទចុះថយ។ ដោយសារការរីកចំរើនខាងវេជ្ជសាស្ត្រដែលជួយសម្រួលការរក្សាការរួមភេទដែលពេញចិត្តមនុស្សទាំងឡាយបានស្គាល់រសជាតិនៃជីវិត ៕
ចែករំលែកព័តមាននេះ